Ndawi 3 - Ala Wone Peenok Peebi Mbanak

Ndawut mbagangge logonet, ndawi pereegerak wone Aput Abatalom nen Ndawut wariyak eeke kenok, mbagangge logonet, ndawi pereegerak yi aret.

¹ Nogoba Kaliku ALA wae. It nawim apit nen tebenogo paniyak eekwi, Pilak yogo logonet, nooriyak eekwi,

² It apit nen nabok mbanggo logonet, “Ala nen agap ndarigin lek o,” yinuk, yogwe, Eeko agaarik o.

³ Togop eekwi kwe, Kaliku nogoba ALA wae. Tiyappanega kat aret me, nuut tiyappanege, Kat nggeemu kwak nobarogo panege, Eeru o.

⁴ Niniki puru ari logonet, Noone nggwok paga Kaliku ALA yokkege neenok, Kabuut leenak menggim paga nen Onggo yo'nege menggendak o.

⁵ An nogo yikit nduk winnage, ti'nuk, neenik age, Eeke neegak, Kaliku ALA nen niniki eyak wappanege menggendak o.

⁶ Togop me, Aakumi ineenggi linggininaburak meek aago Neeben peenok-peenok wanggeppaninuk wonogwe kwe, It paga nagabiti mbake lek o.

⁷ It ninom wim mbanak abok aret Ineegwak nenenogo nappiige, It maluk eeka ineyak langgunogo nappiige, Eeke menggendak me, Kaliku ALA wae. Kenegen an liippanege, Ndi, nogoba Ala wae. Kat nen an nagap ndake, Eeru o.

⁸ Kaliku ALA ninagap ndari wage menggendak me, Kale'nggen kapuri ninoba pinanege logot o.