Ndawi 29 - Ala Wone Peenok Peebi Mbanak

O wiya enggela'me Aliku ALA oone yereegerak wone Ndawut nen ndawi yi aret pereegerak o.

¹ Kit kinayuk warak monggotak yi wae. At Aliku ALA alut eekwi, At abu tiyanak omaawi lombok menggerak me wogoppugwi, Eeko logonip o.

² Aliku ALA endage abu iya me, tiyappugwi, At kikak nakeelik alik leenak mondok iya lombok menggerak me, Ayuk wuko logonet alut eekwi, Eeko logonip o.

³ Aliku ALA oone niyo irimbaga nen ari, Ala abu tiyanak lombok menggerak nogo, Oone ngguurubu pogom ari, Aliku ALA oone yi nggwok yenggenak laut nogo Ogombaga ngguurubu kwak eerogo nappit nage, Eeke menggerak.

⁴ At Aliku ALA oone mondok omaawi lombok ari, Oone mondok iya me, “Wi!” yogwe iigak ari,

⁵ Aliku ALA oone paga eyo nggabina yigirogo wurake, Eyo nggabina Libanon mendek kalenogo nappit nage, Eeke menggerak o.

⁶ Tapi aagalogwe ku'mbo wanggak nogo mengga kwak Puut Libanon togop aret ku'mbo wanggak nage, Lembu nggwiya wali mbo wanggak nogo mengga kwak, Puut Tiriyon togop aret agan nage, Eeko menggaarak.

⁷ O yabok kilanogo nappit nage menggi kwak, Aliku ALA oone togop aret eerogo nappit nage,

⁸ Aliku ALA oone paga nen O karume nuk-nuk eerogo pege, O Kareti karume ndipuk eerogo pit nage,

⁹ At Aliku ALA oone ari paga Rusa aagalogwe peranogo wuppiige, At oone ari paga eyonggaame abok aret puluk ko eerogo pege, Eeke menggerak o. At awi wurik me, aakumi kunduk abok aret inalitak lombok ayuk wuko logonet, Inoone nggwok paga endage tiyappogo menggaarak o.

¹⁰ Niyo wu'nuk wage paga Aliku ALA ogombaga kwi'na'nuk wone lengganogo yoranet wage, At endagembogut mondok-mondok logonet, wone lengganogo yorage, Eeke logogin o.

¹¹ Aliku ALA nen at apuri omaawi eeppiige, Iniki ugun tayenak logowak nduk, Aliku ALA ale'nggen inoba piige, Eeke menggerak o.