Ndawi 28 - Ala Wone Peenok Peebi Mbanak

“Nanggeemu kwak ti, ALA aret,” yereegerak wone Ndawi yi, Ndawut nen aret pereegerak.

¹ Kaliku ALA wae. Kat nayugum kwak aret me, Noone nggwok yokkege agarik o. Noone yokkege yi, Karuk logu negen eeppunuk wonage keenok, Aakumi kambunuk nogo menggam unggwi nogwe kwak, An nage neyo, yokkege neegak, Onggo yo'nega'lek koone lek puk logorak mage o.

² “Yeenggwa niru o,” yinuk, noone nggwok yokkege, Mage Lombok Menggim pa'nggwe neenggi nappege, “Nabuwa mbaru o,” yinuk, tamban eeke, Eeke neegak, Karuk konengge logot o.

³ It maluk eeka inom, maluk eerit nugu menggaarak inom, Wogoren nage logonet, Ninom wo'neren nage ti mage o. It aap ti, iniki obeelom mbaruwak nduk, Inoreewi inom wone abe yogwe kwe, iniki perak, Aakumi maluk eeppiyoorak mba'nuk, agan nugu menggaarak.

⁴ It maluk eerit nogwe nogo inom, Inobaabut nggolawe nen eerit nugwi nogo inom, Onggo eeppiige, Yi maluk ndi maluk eerit nugwi nogo onggo eeppiige, Eekaarak ndak-ndak aaninggin inoba piige, Eeru o.

⁵ Kaliku ALA ogobakkigirogo pereegindak inom, Kat eerit nage nagagindak inom, “Abu iya o,” yinuk, tiyappega'lek me, Kat nen maluk inoba kwippiinok, Peebi obeelom eerogo piyaamunggun lek o.

⁶ An nen Kaliku ALA nggino yokkigirak nogo ndak-ndak noone konenggendak me, Kat kendage tiyanak aret logowak o.

⁷ Nomaawi inom, nanggeemu kwak inom, Kaliku ALA kat aret o. Niniki koba panggonak wonage neenok, Yeenggwa nege menggendak me, Niniki ale'nggen alik negen ee'nake, “Wa!” lombok yokkege, Eeke logonet, Ndawi wake agarik o.

⁸ Kapuri inomaawi eeppiige menggendak ti, Kaliku ALA aret o. Ndi, aap amburu kilirogo mippereegindak nogo Agap ndarak logowak nduk, Yugum pak wurogo pereegi kwak kat mban aret o.

⁹ Kapuri yi, inagap ndarogo piige, Yate kwak kale'nggen inoba piige, Ndomba ndegeninaka kwak, kat aret age, Inarum logonet, mondok-mondok ndegeninake, Eeke logomunggun o.