Ndawi 26 - Ala Wone Peenok Peebi Mbanak

Aap iniki abe nen tamban eereegerak wone Ndawi yi, Ndawut nen aret pereegerak.

¹ Kaliku ALA wae. An maluk noba lenggenggulik kagak nege, Niniki yungguppegak eekeelik Kaliku ALA koba panggombege, Eeke minggirak me, “Aap yi abe aret kagi,” nombaru o.

^2-3 Kaliku ALA wae. Kat aakumi inabuwa mba'nuk, Kiniki kunik aganabit nage nogo An nenggaawak paga wonage, Kat ari menggendak ti, abet aret me, aret eerit nage, Eeke minggirak mbake kwe, Kat nen aret nabut mbangge, Niniki wakkagak eeke, Ninikime koongge minggirak inom, Nobaabut eeke minggirak inom, liippanege, Eeru o.

⁴ It aap inambokan lagangga ninom kwi'nage, Iniki mbere ninom wone koongge,

⁵ Maluk eeka kuwak eekwi me ninom kuwak eeke, It maluk eeka ninom nege, Eeriyak neebi lombok mbake minggirak o.

⁶ Kaliku ALA wae. An maluk eekeelik neyaawak nduk neenggi kooppunuk, Kake kani kunggo menggam yendok-wandok nege logonet,

⁷ Ndawi, “Wa!” yogwe mendek Noone nggwok paga warit nege, Kat iya tit eeke menggendak abok aret mbininit nege, Eeke minggirak o.

⁸ Kaliku ALA wae. Kawi wurik kat menggenom inom, kendage tiyanak lombok menggenom inom, Niniki kunik minggirak o.

^9-10 It aap maluk eeka nen, aap inamiya nengga nen, Aakumi maluk eeppiyoorak kote koonogo punuk, eerit nugwi, Ndi, koonogo pegaatak eeruwak nduk, ineenggi abe'nggan paga kiraarogo wogorogwe, Eeko menggaarak nogo ti, Inooke logonet, an ninom nooriyak mage o.

¹¹ An koonak mban eerit nege me, Nabuwa mba'nuk wondet eerogo panu o.

¹² An niyok o kobappaga yappunuk mi'ndak wonage me, Kapuri apit kuwak aago wonogwe inenggela'me Kaliku ALA kalut eeke logogin o.