Ndawi 23 - Ala Wone Peenok Peebi Mbanak

“An ndegennaka abe ti, Aliku ALA aret,” yereegerak wone Ndawut nen ndawi yi aret pereegerak.

¹ Ndomba ndegeninako mengga kwak, An ndegennaka Kaliku ALA aret o. An namendek lek ambi lek, wonage mban aret o.

² Iri'ngga mili wonage me wimbanege, Wo'neren niyo yenggenak abolok lek me pani nage,

³ Niniki lek age kenok, obaane'me kwippanege, Kat kendage abe logowak nduk, Tu obeelom paga ni'neren nage, Eeke menggendak o.

⁴ An tu nggelo'me o apit paga nage neegak, Kat nimbirak nage me, “Maluk noba ariminggi ilik?” yinuk, Nagabiti mbakak nagin lek o. Kowaanggun inom, kandomba wogoninaka ya'nggage inom, Ti paga niniki eyak wappanege menggendak o.

⁵ It ninom wim mbanak inenggaanom paga nambi-mbiingga pipuk eerogo panege, Amburu nanobak paga kilirogo panege, Obeelom eeppanegak mban eeke paga nagiwa'na uum kilu-kilu eerogo panege, Eeke menggendak o.

⁶ Obeelom eeppanit nage, Nabuwa nen kiniki kunik ee'nabit nage, Abet aret eeke keegak, Kambi noorak kuli aret ari nagin o. Ndi, Kaliku ALA wonage menggenom nogome An mondok-mondok aret ye mbambatinuk logogin o.