Ndawi 19 - Ala Wone Peenok Peebi Mbanak

Mbogut-nggween ogobakkigirik paga Ala iya tit mbako menggaarak wone Ndawut nen ndawi ambi pereegerak yi aret me, it ndawi tiyangga inowe wogoreegwaarak.

¹ Mbogut nen, “Ala abu tiyanak menggerak o,” yinuk, ari, Ndi, o oolo we wonage yi nen, “At eenggi paga ogobakkigirogo paneegerak iya o,” yinuk, ari, Yogo menggaarak.

² Ne yogondak nen ne ko'lu yoga'mban eeke, Oonikiya yogondak nen Oonikiya ko'lu eenu eeppega'mban eeke, Eeko menggaarak.

³ It nogo ti, aakumi inoone yogo mengga kwak yogwe, Ndi, aakumi inoone konenggo mengga kwak konenggwi, Eekulik kwe, Inoone yogwe ti, konengga'lek ti lek abok kin lombok konenggo menggaarak.

⁴ It inoone o nggween paga yime abok aret wiganinuk nage, Inoone yagaatak nogo, O irip-irip ndak wa'narit nage, Eeke menggerak o. Kat Ala nen oonegen ake awooliya mbogut paga wurogo pege,

⁵ Aap akwe kolaakit nduk, Ago ogoorak me nen wundi wage kwak, Aap aa'nduk nggare agan unggwi nage paga Endage tiyanak nogo nen ambinom nggare agan naakit nduk ale'nggen mbake kwak,

⁶ Oonegen o irip ambi me nen wundi woraanuk, Nage menggim aret nage nagaatik, o irip ambi me unggwi nage me, Mo andi lek me ambime kumaa'nari noorak lek aret o.

⁷ Kaliku ALA yereegindak liiru mbanak nogo ti, Nit aakumi eeppinaniyak ambi yobok yaga'lek mondok ndak-ndak eeppinaniyak mbanak wonage, Nit niniki kinik lek nogo, niniki kinik warak eerogo pinangge, Eeko logorak Kaliku ALA yaga'ndak nogo, niniki ti paga panggonak logorak op me, Nineenggo'lek kenok, niniki warak eeppinanege, Eeke menggerak o.

⁸ Kaliku ALA nen eeko logorak wone yo'nirage nogo ti, A'me nggelok mban age menggerak me, Aakumi inale'nggen mbaruwak nduk eeppiige, Kaliku ALA kawone, “Yogop ee'nu ndogop ee'nu,” yugu nogo Tabarak lek kin paga wonage me, Aakumi iniki eya eerogo piige, Eeke menggerak o.

⁹ Aap Kaliku ALA inagabiti mbakwi nogo ti, Kikak naka'lek abu obeelom aret me, Mondok-mondok aret logogin o. Alik eekwi niinok Kaliku ALA nen Onggo eeppinaniyak kawone yugu nogo ti, Ndak-ndak eeppinaniyak nduk wonage, A'me lik togon eeppinaniyak nduk wonage, Eeke menggerak.

¹⁰ Mbuti emas onggo iya kenok kwaarit nugwi, Abinak pindan-pindan eeke kenok iniki kunik eekwi, Eeko menggaarak ti, iya kwe, Kaliku ALA kawone yugu nogo perak, Mondok iya lombok aret agaarik o. Ndi, nggiin amburu ombat abe kogwe, Nggiin pugunik me nen amburu puk wanggak eeke nogo ombat tele kogwe, Eekwi ti iya negen kwe, Ti kunduk meek o. Kaliku ALA kawone yugu nogo ti, Ombat abu abe mondok alik lombok agaarik o.

¹¹ Wone ari menggendak abok aret nen An kayeloman maluk eeke nogo neenu eeppanege me, Liirogon porogo wonage neenok, Onggo mondok nggwok aret kolaagin o.

¹² Aap ta nen at tu abe kagak nomoninuk nage nogo eenu mbakop? An liippega'lek we ugun aret eerit nage nogo, Maluk neegendak kenok, nomaluk ti mbo nappege,

¹³ Ndi, “Maluk eerikit,” mba'nuk eeke neyo, kat unde wo'nake, Maluk nogo nen, “Maluk mban eeru o,” yo'nege kero, narum wonage, Eeke logot o. Togop eeke keenok, maluk ambi noba lenggenak kagak nage, Ndi, maluk nggwok ambi eeke, Eerigin lek Ugun aret logogin o.

¹⁴ Kaliku ALA wae. Nayugum kwak inom, nili yaga inom, kat aret me, Noone ari minggirak inom, Ninikime koonit nage minggirak inom, Obeelom aret neyaanok lak, Ao, kombake minggirak o.