Ndawi 17 - Ala Wone Peenok Peebi Mbanak

Maluk eerulik kwe, mugurok nogogwaarak wone At Ndawut tamban eereegerak.

¹ Kaliku ALA wae. Kat nen liirogon a'me nggelok eeppanege logonok nduk, Yokkege me, karuk konengge, Noone nggwok paga yokkege yi, liippanege, An pilit lek abet aret tamban paga yokkege me, karuk nggoongge, Eeke logot o.

² It aakumi obeelom eekwi nogo Kat kenegen maloppiige menggendak me, An obeelom eeke ilik, maluk eeke a? Kat nen mban nawone mbanogo yo'niriyak op aret o.

³ “Noone paga nen maluk ambi eerigin lek o,” yinuk, wone nggaruk togon koonggirak me, Kat nen niniki kwaake, Oonikiya liippanit unggwage, An nabut liirogon mbangge, Eeremenggendak kwe, An maluk eekirak ambi lek aret kaamunggun o.

⁴ It aakumi eerit nogo menggaarak inawone o! It iniki worokot linik eerit nugwi iigak, An togop eeka'lek koone yo'nege menggendak ndak-ndak Niniki lombok arum wakkolage logonet,

⁵ Kat kiyok mugurok mban nage minggirak me, An niyok eraabin perak togon noolik o.

⁶ Ala wae. An yokkege neenok, Noone karuk konengge menggendak me, Noone nggwok paga yokkege agarik o. An yokkege yi, karuk nggoongge, An tamban eeke yi, karuk konengge, Eeru o.

⁷ Inom ogoorak nen it inoorukwak, Kabu'me ari unggwogwe iinok, Keenggi abe'nggan paga inagap ndaka kat yi, Aakumi kiniki kunik lombok aganake menggendak paga, “Wi!” kugwi nogo, Eeke keyaawak nduk, eeru o.

^8-9 Kenegen awuluk kwak eerogo paninuk narum logot o. Ndi, it maluk eeka nen nooriyak eekwi, Nawim nen nenggaawak lek eerogo paniyak nduk an wangge'nakwi, Eekwi nogo nen pi'nakwi iyo, Ka'naabit abu'me kumaappaninuk logot o.

¹⁰ Inabuwa mbaka'lek it inake mban koonggo'net nugwi, Wogoppako logonet, wone agan nugwi, Eeko menggaarak.

¹¹ An niyok mugurok woraanuk wangge'nakwi, Nggween paga mbo nggimbanuwok nduk inigen wo'nakwi, Eeko agaarik o.

¹² Singa noorak mbaketak nogo naakit nduk, eyak nde ari wonage, Singa awooluk nen noorak mendek eyak nggerenggaakit nduk kumaarak pogonik wonage, Eeke menggi kwak, An togop eeppanugo agaarik o.

¹³ Togop me, Kaliku ALA wae. Kat pilak yu o. Pilak ari logomenggendik, Kinom perenggolage logonet tebenogo piige, Kat keegin tiyak ari logonet, Aap maluk eeka ineenggime nen an ndinnake, Eeru o.

¹⁴ Kaliku ALA wae. It aakumi nggween paga mendek nen Nggween paga mendek mban kuwak eeriyak mbakwi yi, Inenggela'me nen keenggi omaawi paga nagap ndaru o. Aaninggin inoba piyoorak koonogo piigendak nogo Ambi mbo puurak mage o. Ata, abok aret nggwik togon inoba piige, Inapuri kunduk, ineyate kwak inoba kwippiige, Ndi, ando ndiinik inombowologwe inoba kwippiige, Eeru o.

¹⁵ An perak, obeelom mban eeke minggirak me, Kenggaawak nenegen kage, Neenik a'nuk kenete nonggop menggendak nogo nenegen keege, Eeke logominggirik, Niniki abu ndonggo yigin o.