Ndawi 147 - Ala Wone Peenok Peebi Mbanak

At Omaawi Lombok Menggerak Ala tiyappogo logorak wone

¹ At Aliku ALA tiyappogo logowok o. Ndawi wako logonet, ninogoba Ala tiyappogo logorak ti, Abu obeelom aret o. At tiyappugwi paga ale'nggen ee'ninake me, At tiyappogo logorak ti op lombok aret o.

² Aliku ALA nen o Yerutalem obaane'me wurogo pege, It Iterali wogoren mbo piya nagagerak nogo kuwak eerogo piige,

³ Iniki wakkologwe nogo obeelom eerogo piige, Inawin kunik nogo nggerenogo piige, Eeke agaarik o.

⁴ At nen laaluguragan ineebe, “Ndogop kuli o,” yinuk, lingginogo piige, Inalitak inendage toonogo piinok inendage kungge, Eeke menggerak o.

⁵ Ninogoba ti, nggwok lombok logonet, Omaawi mondok iya wonage, Wone ambi eenggo'lek lek abok aret eenu wonage, Eeke menggerak o.

⁶ Aliku ALA nen it aap tebembiinok wonogwe nogo, Pilanogo mippiige menggerak kwe, It aap maluk mendek perak, Nggween paga inuut ngguluk nappiige menggerak o.

⁷ Ndawi tiyanggo logonet, Aliku ALA, “Wa,” yogwi, Ninogoba Ala aruk konenuwak nen nggitat eeko logonet, ndawi wakwi, Eeko logonip o.

⁸ At nen mbogut paga ndugwi lenggenogo pege, O mayu nen nggween miin eerogo puwak nduk, pipuk eerogo pege, Puut-puut paga iri'ngga laganuwak nduk, eeppit nage,

⁹ Aap inaanggumi inambi noorak wogorage, Towe ya'ngge-ya'ngge inaagalogwe yirak-nggirak yogwe iinok, inambi wogorage, Eeke menggerak o.

¹⁰ At nen kuda omaawi mendek inikilom mbake, Aap inogowa ambik iniki kunik eeginake, Eekeelik o.

¹¹ It aap at inagabiti ombakwi kenok perak, Aliku ALA nen inikilom mbake, Iniki kunik eeginabit wundi wage nogo Yi aap ndi aap iniki ti paga lunik wonogwe iinok, Ale'nggen inombake, Eeke menggerak o.

^12-13 At Aliku ALA nen kat Yerutalem yi, Karu unggwogo menggam wa'mbit omaawi narogo pit nage, Kaagalogwe kenggela'me wonogwe nogo Inale'nggen eerogo piinet nage, Eeke menggerak me, Kat Yerutalem yi wae. Aliku ALA alut eeke, Kat puut Tiyon yi wae. Kogoba Ala tiyappege, Eeko logonip o.

¹⁴ At nen kiniki ugun tayenak logomunggup nduk, Kinawi paga obeelom eerogo pege, Ndonggorogon nonggo logomunggup nen Kinambi gandum abe kenok mban wokkirage, Eeke menggerak o.

¹⁵ At nen o nggween yi, wone lengganogo yoge kenok, Oone wuppi wage nogo mbet-mbet aret eerit nage,

¹⁶ Ndomba eeruwak kwak Ndugu-ndugu nggween paga lenggenogo wurabit wage, Konaananggen luurik nogo wun negen yumbunogo pit nage,

¹⁷ O mayu anggen nogo yugum anggen negen Namburogo wurabit wage, Eeke menggerak o. At togwi eerogo nappit wage ti kunduk iya me, Aap ta nen ko wappunuk logorak mbakop? Lek aret o!

¹⁸ At nen mayu anggen nogo, “Niyo aru o,” Yoge kenok, niyo aret age, O wiya at unde me, nappi wage kenok, niyo aret a'nuk nage, Eeke menggerak o.

¹⁹ At oone nogo Yakup yoge, At wone lengganak inom, eeko logorak wone inom, Iterali yoge,

²⁰ Ndi, eeko logorak wone nogo Yi aakumi ndi aakumi abok aret togop yoraga'lek Iterali mendek kenok mban yorage, Eereegerak o. Aliku ALA tiyappogo logowok o.