Ndawi 135 - Ala Wone Peenok Peebi Mbanak

Aliku ALA tiyappogo logorak wone

¹ At Aliku ALA tiyappogo logowok o. At Aliku ALA endage tiyappugwi, Kit Aliku ALA ayeloman mini yi wae.

² At Aliku ALA awi wurik me inom, Ninogoba Ala awi wurik oore'nggam inom, Ake eeko monggotak yi, Aliku ALA wogoppugwi, Eeko logonip o.

^3-4 At mendek logowak nduk, Aliku ALA nen Yakup miirogo pege, Iniki kundugu lombok logowak nduk Iterali leenogo pege, Eereegerak paga Aliku ALA abu obeelom mban wonage me, tiyappugwi, It aakumi at endage kunggo logonet, Inale'nggen kogo menggaarak me, at endage tiyappugwi, Eeko logonip o.

⁵ At Aliku ALA ti, mondok iya lombok wonage, Yi kugi ndi kugi abok aret tebenak iigak, ninogoba Ala perak, mondok tiyanak wonage, Eeke menggerak an neenu aret o.

⁶ At Aliku ALA nen mbogut paga inom, Nggween paga inom, niyo kole laut paga inom, Yi nggwok yenggenak ogu kiiniki lombok paga inom, “Yogop eerikit,” mbake nogo ti aret eeke menggerak o.

⁷ At piirogo menggim nen Ndugwi o nggween irip-irip nen nippit wage, Mayu wage kagak o kimbik kilanogo nappit wage, O wiya warit woraawak nduk, wumbit wage, Eeke menggerak o.

⁸ At lombok nen aap Metit mendek Inapuri manggu ndarak inom, Inaanggumi iyaalok ndarak inom, inoorogo piige,

⁹ Kat o Metit yi wae. Kat kenggela'me time eerubok mendek iya tit eeke, ineenu agak mendek eeke, Eeke logonet, Aap Pirawun inom, at inom eeko menggaarak abok inom, Aaninggin inoba piige,

¹⁰ At nen aret yi aakumi ndi aakumi ambik tebenogo piige, Aap inendagembogut inomaawi lombok menggaarak

¹¹ Aap Amori mendek inowe endagembogut Tikon inom, It o Mbatan mendek inowe endagembogut Ok inom, It aap o Kanan mendek inoweewi inendagembogut abok aret inom, inoorogo piige,

¹² Inooppiinok, Inanggween nogo waganogo eyate kwak wogorage, At apuri Iterali eyate kwak unde eerogo piige, Eereegerak.

^13-14 Kaliku ALA wae. Kat kapuri inaana'le mbanogo piige, Kayeloman mini inabuwa nen eeppiige, Eerumunggun me, Kaliku ALA wae. Kendage mondok-mondok ki aret wonage, Kaliku ALA wae. Yogondak ndarak inom, Peebi nda'narit wundi wogo logorak inom, Kendage mondok-mondok aberak wonogwe, Eeko logogun o.

¹⁵ Yi aakumi ndi aakumi inayuk wukwi inagugiwak ti, mbuti perak inom, mbuti emas inom, Nogo paga ogobakkigirik wonage o. Aakumi ineenggi paga nen aret ogobakkigirik me,

¹⁶ Inambe wonage kwe, wone mbanggwi, Inigen wonage kwe, inigen kogwe,

¹⁷ Inaruk wonage kwe, inaruk konenggwi, Inambe wonage kwe, inambe aagi wunabi wogwe, Eekulik aret menggaarak o.

¹⁸ It aap ti mendek ogobakkigikwi, Iniki ti paga panggombunuk wonogwe, eekwi ti, Inagugiwak ti kwak aret arugun o.

¹⁹ Kit Iterali mendek yi wae. Aliku ALA tiyappugwi, Kit Karun mendek yi wae. Aliku ALA tiyappugwi,

²⁰ Kit Lewi mendek yi wae. Aliku ALA tiyappugwi, Ala kinagabiti mbaka yi wae. Aliku ALA tiyappugwi, Eeko logonip o.

²¹ It o Tiyon wonogwe nogo nen Aliku ALA tiyappugwi, At Yerutalem mondok menggerak nogo tiyappugwi, Eeko logonip o. Aliku ALA tiyappogo logowok o!