Ndawi 132 - Ala Wone Peenok Peebi Mbanak

Aliku ALA awi wurik tiyappereegerak wone Ndawi warit lagi nogogwaarak.

¹ Kaliku ALA wae. At Ndawut aaninggin-paaninggin oba age kagak, Ogogumbuk puk wonagagerak nogo aberu o.

² At nen kumbuk mbanogo Kaliku ALA yokkege, Yakup ogoba Komaawi Lombok Menggendak nogo kendage kunogo kumbuk mbangge, Eeke logonet,

^3-5 “Kaliku ALA logowam kwaarogo pege, Yakup ogoba Komaawi Lombok Menggendak kawi awo pipuk eerogo pege, Eeka'lek logonet, An nawi wurik me unggwi nage, Nogo yikit nduk, nogo yege minggim lagangge, Nenegen kubu kage, nogo lomok ari, Eerigin mondok lek o,” Yinuk, yereegerak o.

⁶ Nit o Eparata logonet, ninaruk konenggwi, O Yaat yabu yarak me Ala wone yugu aloobut mbanak me Yonggolak wonage me, kwaakkogwe, eereegurak o.

⁷ Togop me, nit nen yogo logonet, “Nit at wonage menggim nogome nogwe, At abu'me tebe yi unggunuk, alut eekwi, Eeri nawok o,” Yinuk, yogo nogogurik,

⁸ “Kaliku ALA wae. Yogondak aret O kat tat yonggonggolage logowam komaawi wonage kogo menggam aloobut mbanak me Yime mondok-mondok logonok nduk, wambi mok o.

⁹ It kat keebe unde nogo nen Inayum abe yirik kwak abe mendek mban eerit nogwe, It kapuri kake leenak inale'nggen nen keekok yogwe, Eeko logowak o,” Yinuk, yereegerak o.

¹⁰ Kat kayeloman Ndawut eerit nage paga Amburu eerogo mippereegindak nogo mbo puurak mage o.

¹¹ Kaliku ALA nen wone kumbuk mbanogo Ndawut yoge, Lek arigin lek a'me aruwak nduk, kumbuk mbanogo yoge, Eeke logonet, “Kat kaput ambi ndaremenggendak nen Kat wone lengganogo yorage menggenom Kwippiminggirak wone lengganogo yorage logogin o.

¹² An nen wone koonogo pereegirak nogo inom, Yogop ee'nu ndogop ee'nu, mamuniraminggirak inom, Kat kapuri liirogon porogo wonogwe iinok, It inapuri nen aret kat koone lengganogo Yorage menggenom mondok-mondok unde logogun o,” Yinuk, kumbuk mbanogo yoreegindak nogo o.

¹³ Ti yoreegindak nogo ti, Kaliku ALA nen o Tiyon leenogo pege, “An o yime aret logokit o,” mba'nuk ari, Eeke logonet,

¹⁴ “Niniki uugwe lombok mbakirak me, O yime mondok-mondok aret yonggonggolage, O yime nen aret wone lengganogo wumbege, Eeke logogin o.

¹⁵ An nen o Tiyon yime Yi mendek ndi mendek kalo logonogo wogoge, Aap o yime ineenggi lek tebenak wonogwe nogo Inambi ndonggorogon nawak nduk wogorage,

¹⁶ It aap an neebe unde o yime wonogwe nogo Aakumi inake eerit nugwi paga aakumi nen, “Ninagap ndarak aret kogo o,” mbaruwak nduk, Yum yippiigo mengga kwak eeppiige, O Tiyon apuri an nake leenak nogo inale'nggen nen keekok yogo logowak nduk eerogo piige,

¹⁷ O yime aap Ndawut nogo Endage nggwok wigak ari logowak nduk eerogo pege, An amburu eerogo mippereegirak ndi wuninik kwak At endage ki logowak nduk, eeppege,

¹⁸ Ndi, at awim nogo inenggali ti, Yum yirik kwak nugu logowak nduk eeppiige, Eerigin kwe, At Ndawut perak, Endagembogut logonet wone lengganogo yorage menggim ti, Nggare-nggare kwak me, abinak lan ari logogin o,” Yinuk, yoreegindak nogo o!