Ndawi 130 - Ala Wone Peenok Peebi Mbanak

Aaninggin oba age kenok, Aliku ALA yoreegerak wone Ndawi warit lagi nogogwaarak.

¹ Kaliku ALA wae. An yigeebu mondok ayilik warak me, Wambeegirak negen logonet, Noone nggwok paga yokkege agarik o.

² Ala wae. Noone yokkege yi, karuk konengge, Yeenggwa nenok nduk nabuwa warak nggo-nggo logonet, Nggino yokkege yi, liippanege, Eeru o.

³ Kaliku ALA wae. Ninomaluk nogo kat liiru mbanogo pege logonetak en, Aap ta nen oone ambi yenetak mbakop? Lek aret kwe,

⁴ Kat nen ninomaluk lek eerogo mbo pege menggendak me, Kat paga ninagabiti kombako monggoorak o.

⁵ Kaliku ALA nen an yeenggwa nenok nduk tokkeege, Niniki nen mbet-mbet eeppani woraawak lak, “Ao,” mbake, Koone yereegindak nogo niniki lunik wonage, Eeke agarik o.

⁶ It aap oonikiya tum waka nen o weege kero tokkogwe, It aap oonikiya tum waka nen o weege kero tokkogwe, Eekwi ti, Iniki mbuuluk negen lunik wonogwe kwe, Kat Ala mbet-mbet yeenggwa nenok nduk, Niniki lunik ti, mondok iya aret agaarik o.

⁷ Togop me, kit Iterali yi wae. At Aliku ALA kinabuwa nen Iniki mondok kunik mban eekkinake, Eebi mbaka'lek wondet eerogo pinagagak mban eeke, Eeke logogin me, At paga kiniki lunik logonip o.

⁸ At lombok nen Kit Iterali yi maluk ndi maluk eekwi abok aret Lek eerogo pinagage, wondet eerogo pinagage, Eeke logogin o.