Ndawi 129 - Ala Wone Peenok Peebi Mbanak

Wondet eeppiyaawak nduk, tamban eereegwaarak wone Ndawi warit lagi nogogwaarak.

¹ “O aa'nduk kat Iterali tawe paga Piyak-payak eekkabit nogo nogogwaarak nogo yu o,” Yoge kenok at nen ari logonet,

² “Lek o. An aa'nduk tawe paga Piyak-payak ee'nabit nogo nogogwaarak nogo kwe, It nen an tebenogo panulik aret o.

³ It nggween kabungga nen nggween kabunit nogo logonet, Yomban nggorek waganggo mengga kwak, Namborowak paga togop aret nawinde-nobaande eerogo panit wambi nogogwaarak kwe,

⁴ At Aliku ALA nen a'me nggelok eeke menggerak me, It aap maluk mendek nen keele maarogo paneegwaarak kwe, Inageele nogo mbanogo punuk, wondet eerogo paneegerak o,” yinuk, yogo logowak o.

⁵ Aap Tiyon ineebi mbaka nogo tebenogo piigwi iinok, Inenggali nen inakom niruk mbaganit nawak o.

⁶ Iri'ngga o kirin paga wunggetak lagangga'lek kagak Mbuk age menggi kwak, it aap ti togop aret aruwak o.

⁷ Iri'ngga wunggetak nogo ti, mbuk aremenggerak me, Aakumi nen mbanogo ineenggi kamborogon ee'nuk nogwe, Anebenogo inogome palu-palu wonok nogwe, Eeriyak meek aret me,

⁸ Aakumi tu ti paga nogo logonet, “Aliku ALA ale'nggen koba wonage o,” yinuk, yogwi, “Nit kunduk Aliku ALA endage paga Ninale'nggen koba pagawi o,” yinuk, yogwi, Eerugun lek aret o.