Ndawi 128 - Ala Wone Peenok Peebi Mbanak

Aap akwe-apuri inom inale'nggen eeppiige logorak wone Ndawi warit lagi nogogwaarak.

¹ Kit Aliku ALA kinagabiti mbakwi, Eeriyak titik kirage nogo ndak-ndak eerit nugwi, Eekwi nogo, Kinale'nggen aret mbako logomunggup o.

² Kineenggi paga ta'liila yabu eeppunuk nunggwi, Kinale'nggen mban wonogwe, kineebe abe mban wonogwe, Eeko logomunggup o.

³ Anggur anggen abe yege menggi kwak, Kinakuwi togop aret kiname wonogwe, Eyo tayitun agarip abe lagangge menggi kwak, Kit kinambi nonggo monggo'nom Kinapuri yendok-wandok aago nogo togop aret tawe ogwe, Eeko logogun o.

⁴ Kit aap at Aliku ALA kinagabiti mbakwi ti, Togop aret ale'nggen kinoba pinagage logogin o.

^5-6 Kit nda'nogogutak kuli yobok yi wage kagak, Aliku ALA o Tiyon logonet, Ale'nggen kinoba pinagage logowak o. O Yerutalem abu obeelom eerogo pege kinigen kogwe, Ndi, kinapuri nen ndaganabemenggaarak kinombowologwe nogo kinigen iigwi, Eerumunggup nduk, Kineenik nggorek eerogo pinagage logowak o. It Iterali iniki ugun tayenak aret logowak o.