Ndawi 124 - Ala Wone Peenok Peebi Mbanak

“Apuri ndegeninaka ti, Ala aret o,” yereegerak wone Aap Ndawut ndawi pereegerak yi aret. Ndawi warit lagi nogogwaarak.

^1-3 It aap ninoori wogwe, Inanini kani kunik negen ninoba pinaniyak eekwi, Eekwi iinok, “Aliku ALA ti, ninom wonage lek,” yogwe, It Iterali abok aret nen togop aret, “Aliku ALA ti, ninom wonage lek,” yogwe, Ee'netak en, Ninawim nen nineenik ngge-ngge inambeme yonggo'ninakwi,

⁴ Niyo wanggerinake menggi kwak, nit wangge'ninakwi, Yi wu'nuk wage logonet, yi mendek ndi mendek tebenit nage menggi kwak, Nit tebenogo pinanit wogwe,

⁵ Niyo omaawi nen yi mendek ndi mendek kabe'nuk nage menggi kwak, Togop aret wo'niren nogwe, Eeko logonetak o.

⁶ Togop yuulik me, Mba'ngge nen pagi nibingge menggi kwak, Ninawim nen togop eeppinanuwak nduk, Ineenggime pinanulik me, Aliku ALA tiyappogo logowok o.

⁷ Towe keele pugu paga nggerenggetak kwe, perak togon mbagangge menggi kwak, Nit togop aret nggerenninakaarak kwe, Peranogo piinok, mbaganggoorak o.

⁸ Mbogut-nggween wakkagagerak Aliku ALA endage kunogo yogwi niinok, At nen yeenggwa nirage menggerak o.