Ndawi 122 - Ala Wone Peenok Peebi Mbanak

Yerutalem endage tiyappereegerak wone

¹ It aakumi nen an yo'nogo logonet, “Nit Aliku ALA awi wurik me lagi nawok o,” Yo'nogo mbaka, nale'nggen alik negen ee'nakerak o.

² Kat Yerutalem yi wae. Yogondak keyagat wurik me tu unggwogo menggam Nit muk mi'nari wogoorak wonogo ogoorik o.

³ Kat Yerutalem yi wae. Kat kota abu abe irip tek kunduk-kunduk lombok wurogo pagareegwaarak o.

⁴ Aliku ALA nen wone lengganogo Iterali yoragagerak ndak-ndak At endage kunogo, “Wa,” yori wogo logowak nduk, Aliku ALA apuri inanebunu mendek Iterali inanebunu lombok nogo, Kota kat kowagam lagi wogo menggaarak o.

⁵ It aap Ndawut paga wiganak inendagembogut nen wone lengganogo yorogwe, Aakumi apit inowak loonggwi, Eeko logonet, Kwi'nagak kinikime time pugu wonage menggerak o.

⁶ Kat Yerutalem kiniki ugun tayenak logonok nduk, Kake tamban eeko logonet, “Aap iniki kunik eekkako menggaarak nogo Iniki ugun tayenak wonogwe,

⁷ Kowa'nagat wurik inikime kabolok lek ugun wonage, Kowa'nagat wurik enegen kunik me Aap endagembogut awi wurik inikime time nu'lek wonage, Eerak logowak o,” yinuk, Tamban eeko ogoorik o.

⁸ An nowe-nawot inom, noreewi inom, kat kinikime wonogwe me, “O kota kinikime ugun nu'lek logot o,” yinuk, yokkege,

⁹ Ndi, ninogoba Aliku Ala awi wurik o kota kinikime wonage me, Kat obeelom li'luk aago logonok nduk yokkege, Eeke agarik o.