Ndawi 121 - Ala Wone Peenok Peebi Mbanak

Aliku ALA ti, ninarum waka aret wone Ndawi warit lagi nogogwaarak.

¹ Yeenggwa niri woroorak nduk Puut-puut nena ni'nage agarik o. Ngga nen an yeenggwa niri woraagin mbakop? Lek o!

² An yeenggwa nege menggerak nogo ti, At mbogut-nggween wakkagagerak Aliku ALA aret o.

³ Kiniyok eraabin tuk togon eekkirage kero pikkinake, At kinarum waka nogo, nogo lomok yaga'lek eenik aret wonage,

⁴ At Iterali inarum menggerak nogo, Nogo lomok ari, nogo yege, eeka'lek kinarum wonage, Eeke menggerak o.

⁵ At Aliku ALA nen kinarum wonage, Eyo abu'me ngguna'me mengga kwak, Aliku ALA togop aret eeppinagage, Eeke me,

⁶ O liingge mo andi nen andi eekkinake, Oonikiya paga tut nen maluk eeppinagage, Eerigin lek o.

⁷ Maluk kinoba age kero, Aliku ALA kinarum wake, Kineebe kinookwi iyo, liirogon ndegengginake,

⁸ Wundi nogwe, unggwi wogwe, eekwi kiigak, Aliku ALA nen o yogondak nen nok, Peebi kuli mondok-mondok kinarum aret wonage, Eeke logogin o.