Ndawi 120 - Ala Wone Peenok Peebi Mbanak

Yeenggwaaruwak nduk, tamban eereegerak wone Ndawi warit lagi nogogwaarak.

¹ An aaninggin noba age kenok, Noone nggwok paga Aliku ALA yoge neenok, At nen yeenggwa nege menggerak o.

² Kaliku ALA wae. Aakumi inoone pilit yo'nugwi, nambokan laganggwi, Eekwi me nili yu o.

³ Kit aap pilit yaga yi wae. Aliku ALA nen aaninggin nano mendek eeppinagage, Ti eeppinagage logonet, ngge mendek inom eeppinagage, Eerigin mbakop? Lek o.

⁴ It aap wim wakaa'ngget nen Inomaale andiigwi paga kinookwi, Ndoolu kani kunik paga kinoba kwippinagi wogwe, Eeruwak nduk Yoraagin mbako logonip o.

⁵ An aap o Metek wonogo menggam nugwi kwak nege, It aap o Kerat inawooliyana inom mengga kwak wonage, Eeke me, nabuwa o!

⁶ Aakumi lambunik logorak ineebi mbaka inenggela'me O maan togon ninom wonage minggirak me, Neebi lombok ee'nake agaarik o.

⁷ An aap lambunogo piiga aret me, “Ninom lambunuwok o,” yorage neegak kwe, It nen, “Ninom wim eeriyak,” mban mbako menggaarak o.