Ndawi 12 - Ala Wone Peenok Peebi Mbanak

Maluk eeppugwi iinok, Ndawut nen tamban eereegerak wone Ndawut nen ndawi ambi pereegerak yi aret me, engga teberogon yogo logowak nduk, it ndawi tiyangga inowe wogoreegwaarak.

¹ Kaliku ALA wae. It aap mukkeren nogwe nogo ineebe lek ogwe, It aap koone liirogon mugurok nogo menggaarak nogo Aakumi inenggela'me nen inenggaawak lek ogwe, Eekaarak me, kat nen aret yeenggwa niret o.

² Aakumi abok aret it mban-mban pilit-pilit agan nugwi, Aakumi inambokan laganggo logonet, inoone amburu ndik-ndik agan nugwi, Eeko logonet,

^3-4 “Nit ninoone agan nugwi mban abe o. Ninogoba nen, Ndogop yuurak mage o, yinuk, yo'niroorak ambi lek me, Yuurak mbakoorak mban agan nugu logogun o,” Yinuk, iniki wogoppatit nugwi, Inoone amburu ndik-ndik agan nugwi. Eekwi nogo Kaliku ALA nen inale'lok nggaruk togon nappiyet o.

⁵ Kaliku ALA nen ari logonet, “It aap meek mendek tebenogo piigwi, It ineenggi lek nen, Yogop eeppinanuwak lak, ao, yinuk, iniki wakkologwe, Eekwi iinok, An pilak ari logonet, Ndogop eeppinanuwak lak, ao, nombakwi nogo, Inagap ndarogo piyaagin,” yereegindak me,

⁶ Nggween nggabok worako menggam Mbuti perak leennaruwak nduk, ne 7 worappunuk, Abu obeelom age kogo mengga kwak, Kaliku ALA koone ari menggendak nogo Mbeyok ariilik, a'me lik togon aret age menggerak o

^7-8 It aap maluk eeka iniki worokot linik nugwi, Yi o ndi o maluk eeriyak mban tiyappit nugwi, Eekwi kwe, Kaliku ALA wae. Aap yogondak ninom wonogwe yi nen alik eeppinanukwak, Kat mondok-mondok ninarum logomunggun o.