Ndawi 115 - Ala Wone Peenok Peebi Mbanak

Ninogoba abe ambit Ala aret

¹ Kaliku ALA wae. Kat nen aret kiniki kunik ee'ninake, Kat nen mban ko'lu-kii'me liirogon eeppinanege, Eeke menggendak me, Nit ninendage tiyappakwi, nit wogoppakwi, Eekwi lek o. Ata, kat mban kendage tiyanak logowak nduk eeko ogoorik o.

² It yi aakumi ndi aakumi yogo logonet, “It inogoba Ala ngge o?” yinuk, yogwe ti, Nonggop nduk yogo agaarik o?

³ Nit ninogoba Ala ti, mbogut paga wonage, At eeriyak mbake nogo aret eerit nage, Eeke menggerak kwe,

⁴ Inagugiwak inayuk wukwi ti, Mbuti perak inom, mbuti emas inom, nogo paga ogobakkigirik wonage o. Ndi, aakumi ineenggi paga ogobakkigirik me,

⁵ Inambe wonage kwe, wone mbanggwi, Inigen wonage kwe, inigen kogwe,

⁶ Inaruk wonage kwe, inaruk konenggwi, Inogobak wonage kwe, inogobak me obari mbanggogwe,

⁷ Ineenggi wonage kwe, iri'ngga piganet nogwe, Iniyok wonage kwe, iniyok pit nogwe, Inale'lok wonage kwe, inale'lok oone yogwe, Eekulik aret menggaarak o.

⁸ It aap ti mendek ogobakkigikwi, Iniki ti paga panggombunuk wonogwe, Eekwi nogo ti, Inagugiwak ti kwak aret arugun o.

⁹ Kit Iterali mendek yi wae. Aliku ALA ti, yeenggwa kiraga wonage, Kit kinanggeemu kwak wonage, Eeke menggerak me, Kiniki at mban oba panggombunuk logonip o.

¹⁰ Kit Karun mendek yi wae. Aliku ALA ti, yeenggwa kiraga wonage, Kit kinanggeemu kwak wonage, Eeke menggerak me, Kiniki at mban oba panggombunuk logonip o.

¹¹ Kit aap Ala kinagabiti mbako monggotak yi wae. Aliku ALA ti, yeenggwa kiraga wonage, Kit kinanggeemu kwak wonage, Eeke menggerak me, Kiniki at mban oba panggombunuk logonip o.

¹² Aliku ALA nen ninoba abeppunuk, Ale'nggen ninoba pinanege logonet, It Iterali mendek ale'nggen inoba piige, It Karun mendek ale'nggen inoba piige,

¹³ It aap Aliku ALA inagabiti mbakwi Inendage warak inom, inendage lek inom, Abok aret ale'nggen inoba piige, Eeke logogin o.

¹⁴ Kit inom, kit paga wiganak inom, Aliku ALA nen kineebe ambik eerogo pinagage,

¹⁵ Mbogut-nggween wakkagagerak Aliku ALA nen ale'nggen kinoba pinagage, Eeke logowak o.

¹⁶ Mbogut ta'mban-mban eerak abok aret Aliku ALA unde wonage kwe, O nggween yi perak, It aakumi unde logowak nduk wogoragagerak o.

¹⁷ Aakumi kanggaatak nen Aliku ALA tiyappugwi, Kambunuk inoone lek ari nogo menggam nogome nen Ala alut eekwi, Eekulik o.

¹⁸ Aliku ALA alut eekwi ti, Nit nineenik wonogwe nen aret eekwi, O yogondak nen nok, peebi mondok-mondok at tiyappugwi, Eeko logogun o. At Aliku ALA tiyappogo logowok o.