Ndawi 114 - Ala Wone Peenok Peebi Mbanak

Laago Obaga Mbo Nagagerak lako logonet ndawi wako logorak wone

¹ It Iterali o Metit nen wundi wogwe, It Yakup paga wiganak aakumi inoone alik yogo menggam inenggela'me nen wundi wogwe, Eeko mbareegwa,

² O Yekura ti, Ala alut eeko logowam age, Ndi, o Iterali ti, at unde logowam age, Eereegerak o.

³ Niyo kole laut nogo enegen iinok mbagangge, Yi Yoraran wage nogo yungguninuk eneerime ari nage,

⁴ Ndomba ngguunok ku'mbo-wanggak nogwe kwak, puut-puut ku'mbo-wanggak nogwe, Ndomba aagalogwe ku'mbo-ka'mbo yogo mengga kwak, Puut-puut mbuulogwe nogo ku'mbo-ka'mbo yogwe, Eeko nogogwaarak o.

⁵ Kat yi kole laut yi wae. Nanonduk kole mbagangge, Ndi, kat niyo Yoraran wage yi wae. Yungguninuk keneeri me nonggop nduk ari nage, Eereegutak o?

⁶ Puut-puut yi wae. Ndomba ngguunok ku'mbo-wanggak nugwi kwak eeke, Puut-puut mbuulogwe yi wae. Ndomba aagalogwe ku'mbo-ka'mbo yogwe kwak eeke, Eereegutak nogo ti, Nonggop nduk eereegutak?

^7-8 Yugum obaane'me niyo yenggenogo pege, Yugum lunik me nen yi eneeri wungge logorak eerogo pege, Eereegerak me, Kat o nggween yi wae. Kat kogoba enggaanom paga, At Yakup ogoba Ala enggaanom paga, Kat kaganak wake logot o.