Ndawi 111 - Ala Wone Peenok Peebi Mbanak

Aliku ALA tiyappuurak wone

¹ At Aliku ALA tiyappogo logowok o. Aakumi iniki abe koonak apit kuwak aago inenggela'me Niniki abu ambit eeppunuk, Aliku ALA, “Wa,” lombok yoge logogin o.

² Aliku ALA mondok iya tit eerit nage menggerak o. Aap at eerit nage inikilom mbako menggaarak abok nen liippogo menggaarak.

³ At eerit nage nogo ti, mondok tiyanak kenok, Aakumi nen, “Wi,” yinuk, pi wako menggaarak o. At obeelom mban eeppiinet nage nogo, Lek arigin lek mondok-mondok eeke logogin o.

⁴ At Aliku ALA ti, inabuwa mbake, Iniki yanggo yinuk, eeppiige, Eeke menggerak me, At eerubok mendek iya tit eeke nogo iniki aberak logowak nduk eeppiige,

⁵ It aap at inagabiti ombako menggaarak nogo, inambi wogorage, Wone eeppinaniyak koonogo pereegerak nogo, Mondok-mondok iniki aberak wonage,

⁶ At eerit nage menggerak paga Omaawi it at apuri ineenu aruwak nduk, Kin eeppege logonet, Yi aakumi ndi aakumi inanggween waganogo At apuri yate kwak wogorage,

⁷ At eenggi paga eerit nage nogo Abe liirogon mban eeke, a'me nggelok mban eeke, Eeke menggerak. Eeko logorak wone yugu nogo, “Eerigin aret o,” Yinuk, iniki panggombunuk logorak op aret o.

⁸ At iniki mondok liippunuk yorage, Iniki koonak paga lengganogo yorage, Eeke menggerak me, Mondok-mondok nu'lek aret wonage menggerak.

⁹ Apuri wondet aago logowak nduk wone lengganogo piige, Eeppiyoorak wone koonogo pereegerak nogo Mondok-mondok eeko logowak nduk koonogo pege, Eereegerak me, At endage mondok iya alik leenak aret menggerak.

¹⁰ Aap iniki warak mamunggolaawok nduk eekwi nogo ti, Aliku ALA inagabiti mbakwi ti aret. Ndi, aap abok aret at wone lengganogo yorage nogo, Mugurok nogwe iinok, Yi wone ndi wone abok ineenu eeppiige menggerak. Togop me, ninoone puk aga'lek mondok-mondok at tiyappogo logowok o.