Ndawi 110 - Ala Wone Peenok Peebi Mbanak

Aliku ALA inom, endagembogut leenogo pereegerak inom, yereegwaarak wone Ndawut nen ndawi ambi yi aret pereegerak.

¹ Aliku ALA nen an nogoba yoge logonet, “It kinom wim mbanak mendek nogo Aan lebenogo kabu'me piiga'lek neegak, neenggi abe'nggan kwi'nari mok o,” Yinuk, yoreegerak o.

² Aliku ALA nen kambim obate mbanak nogo o Tiyon nen Yi o ndi o kawim wonogwe me titik eerogo nappege,

³ Kat komaawi tiyak ari eyom paga It kawuri wim eeka nen inobaanggi-inobaangge abe lombok li'luk eekko'nok Inale'nggen paga kinom wim eeri unggwogwe, Kubondendok konaananggen luuri wage menggi kwak, “Ninom wim eeruwi o,” yinuk, kawuri aap tawe nogo kiyo'me ari wogwe, Eerugun o.

⁴ At Aliku ALA nen ari logonet, “Aap Meliketerek eeke nagagerak nogo kwak, Kat an neebe unde logonet, Mondok-mondok nake eeke logomunggun o,” Yinuk, endage kunogo kumbuk mbaneegerak me, Oone alik arigin abu lek o.

⁵ Kogoba ti, kat keenggi abe'nggan paga wonage, At anini wungge eyom paga aap inendagembogut aan lebenogo piige,

⁶ Yi aakumi ndi aakumi abok aret Maluk eeremenggaarak onggo inooke, Ineebe inoorak nggween enete lek eerogo piinet nage, O nggween paga it nagawan-nagawan aan lebenogo piige, Eerigin o.

⁷ Ndi, at aap endagembogut ti nen Niyo tu ambet paga wage nogo nengge logomenggerik, “Neegin tiyak yigi o,” yinuk, iniki kwi'narigin o.