Ndawi 109 - Ala Wone Peenok Peebi Mbanak

Aap maluk oba age kenok, tamban eereegerak wone At Ndawut nen ndawi ambi pereegerak yi aret me, it ndawi tiyangga inowe wogoreegwaarak.

^1-2 An tiyappagage minggirak Ala wae. It aap maluk eeka inom, inoone pilit yaga inom, nen, nendage maluk eerogo panugwi, Pilit agan nugu logonet, nabok mbanit nugwi, Eekwi me, Koone lek puk logorak ti mage o.

³ Inanini nen inoone mondok wonggok togon yo'nugwi, Alom lek kagak nooriyak eekwi,

⁴ Niniki kunik eeginake onggo negen inoone liirit yo'nugwi, Eekwi iigak kwe, An nen inake tamban eeke minggirak o.

⁵ An nen obeelom eeppiige neegak, onggo negen it nen an maluk eeppanugwi, Niniki kunik eeginake neegak, Onggo negen it nen ineebi lombok nombakwi, Eeko agaarik o.

⁶ At eebi nombaka nogo owak loonuwak nduk, aap maluk mendek ambi mippu o. At wone liirit yoge nogo eenggi abe'nggan mi'nage,

⁷ Owak loongge logonet maluk eekerak kin age, At tamban eeke nogo omaluk aret age,

⁸ At nda'nagagerak eyom kuwagaluk eerogo pege, At obaane'me eeke logowak nduk, aap alik ambi mi'nage,

⁹ Apurilogwe nogo elege moono aret ogwe, At akwe nogo nanu pugu age,

¹⁰ Apuri nogo ya agak nda agak nugu logonet, inambe nggino yoranet nugwi, Inawi wurik mi-mi wangge kagak, wumbiigwi,

¹¹ Inamendek nomat oba pugu nogo abok aret kola wogwe, At ligak wuundamo eekkolagagerak nogo, aap inambik nen ko'nok wunggwi,

¹² It ambi at abuwa nen obeelom eeppega'lek wonogwe, Apuri moono yumbunik nogo kunduk, inabuwa nen obeelom eeppiiga'lek wonogwe,

¹³ Ombowologwe wiganak nogo inenggaawak lek ogwe, Peebi nda'narit wundi woroorak inendage kagaa'nage,

¹⁴ Ombomini inomaluk nogo Aliku ALA nen abeke, Agalo maluk eeke nagagerak kunduk, lek eerogo pega'lek itok kunik wonage,

¹⁵ Inomaluk ti, Aliku ALA nen Mondok-mondok aberak wonage, Ndi, o nggween paga yime it imbirak ti, inoba aberak logokwak lek eerogo piige, Eeruwak o.

¹⁶ Aap ti nen, “Aakumi ambi inabuwa nen ambiriluk ambi obeelom eeppiyaakit,” mbaka'lek logonet, Ineenggi lek tebenak inom, iniki wakkologwe nogo inom, Piyak-payak mban eerogo piinet nage kagak, Kambit nogo nogogwaarak.

¹⁷ It pulunogo piyoorak inikilom mbake nagagerak nogo, Melak togon at aret oba kwi'nage, Ale'nggen aakumi inoba piyoorak mbake logolik me, At togon ale'nggen oba ari waga'lek aret wonage, Eeke logowak o.

¹⁸ Yum ko'lu-kii'me yiko mengga kwak, at aakumi ko'lu-kii'me pulunogo piinet nage, Aakumi pulunogo piinet nage nogo ti, Niyo nenggaatak inikime ari nage menggi kwak, at inikime aret yonggo'nari unggwage, Wam amburu ndo agan nage menggi kwak, at owak enoona yonggo'narit unggwi nage,

¹⁹ Yum ineebe paga langgunik mengga kwak, At oba lenggenak wonage, Inobate keele nggerenggo mengga kwak, at obate paga nggerenak aret wonage, Eeke logowak o.

²⁰ Aap eeppuurak yagarak nogo aret it aap inoone an liirit yo'nugwi, Inoone maluk noba pugwi, Eekwi nogo onggo Aliku ALA nen it aret eeppiyaawak o.

²¹ Kaliku Kitok Menggendak ALA wae. Kat perak, kendage abe mban logowak nduk eeppanege, Nabuwa nen obeelom eeppanege menggendak me, nagap ndake, Eeru o.

²² An neenggi lek logonet, tebenak nege, Maale negen ninikime ndanuk yi unggwage,

²³ O kiyoma age kagak, inagalu'mak lek age menggi kwak, Neebe togop aret lek age, Iri'ngga abolok eekwi iinok, wurin ma'nogwe kwak, An togop aret ee'nake,

²⁴ Nambe mage negen wonage paga An niyok alom yarak lek ee'nake, Neebe mbuuluk ee'nabit unggwage logonet, Neebenuwak ko eerogo panege, Eeke me,

²⁵ It inoone liirit yo'nugwi nen Pe'neenok meek eerogo panugwi, Inigen neenok, “Aap yi agaarak, ia!” yinuk, pi wa'nakwi, Eeko agaarik o.

²⁶ Kaliku nogoba Ala wae. Kat nen an yeenggwa nege, Nabuwa nen kiniki kunik ee'nake menggendak me, nagap ndake, Eeru o.

²⁷ Ti eeke keenok, Kat keenggi paga nen aret ee'nake, Ndi, Kaliku ALA wae. Kat nen aret nagap ndake, Eeremenggendak nogo It aakumi ineenu arugun o.

²⁸ It nen pulunogo panugwi iigak kwe, Kat kale'nggen noba panege, It nen nooriyak eekwi iigak kwe, Inenggali aruwak nduk eeppiige, Eeke keegak kwe, An kayeloman perak, nale'nggen mbake logogin o.

²⁹ Yum yiko mengga kwak, Inoone liirit yo'nugwi nogo nen meek inombakwi, Yum nggorek lenggenggo mengga kwak, Inenggali mban ineebe paga ninggirik wonage, Eeko logowak o.

^30-31 “Kat aret eekendak o,” yinuk, At oba lenggenggwi nogo ineenggime nen Aap tebenak mendek agap ndarenok nduk, Kaliku ALA nen aap tebenak mendek eenggi abe'nggan paga mi'ndak wonage me, Noone paga Kaliku ALA mondok kalut eeke, Aakumi apit kuwak aago inenggela'me kat tiyappagage, Eeke logogin o.