Ndawi 108 - Ala Wone Peenok Peebi Mbanak

Awim nen tebembugwi iyo, tamban eereegerak wone Ndawut nen ndawi ambi yi aret pereegerak.

¹ Ala wae. Niniki nu'lek kat paga panggonak wonage. Niniki yi wae. Kabolok yu o. An ndawi tiyangge, ndawi paga kanep pege, Eerikit o.

² Nggitat inom, nggawiwak inom, yi wae. An o weeruwak nduk eerogo pikit mbakirak me, Mi'na'nuk kinoone yinip o.

^3-4 Kaliku ALA wae. Nit ninabuwa nen kiniki kunik ee'ninake nogo, O mbogut irimbaga lombok ari lagangge, Wone yo'nirage li'lak eeppinanit wage nogo, Ndugwi kuli ari lagangge, Eeke menggerak me, Yi aakumi ndi aakumi inenggela'me nen kat tiyappagage, Aakumi inanebunu lombok inenggela'me nen ndawi paga kanep pege, Eerigin o.

⁵ Togop me, Ala wae. Keebe mbogut irimbaga mondok tiyanak wonage, Ndi, kat kendage tiyanak nogo Nggween paga abok aret ndak wa'narit nage, Eeruwak o.

⁶ Nit ninabuwa nen kiniki kunik ee'ninake nogo Ninagap ndarak logowok nduk, “Yeenggwa niret o,” yokkugwi yi, karuk konembunuk, Keenggi abe'nggan paga ninagap ndaru o.

⁷ Kat Ala kawi alik leenak menggenom nen ari logonet, “Nale'nggen paga nggween Tikem ogoorogo tumbukkirage, O Tukot Kobappaga time kuli wakkagak mbanogo wokkirage, Eerigin o.

⁸ O Nggileyat inom, Manate inom, ti an unde aret o. Nabetagi mbuti mendek kwak it Eparayim mendek aret. Ndi, nambim obate mbanak negen ti, it Yekura mendek aret.

⁹ O Mowap ti, an niyok kookak aret age, O Erom at unde eekkoligi, mbaruwak nduk, Niyogogut nggoorogo nappege, It Pilitin wonogo menggam tebenogo punuk, neegin tiyak yigi o, yinuk, kuum-keek ari, Eeke agarik o,” Yinuk, yereegindak o.

¹⁰ Aap ta nen an wo'neren o Erom pani nage, Ta nen wo'neren o kota pak wurik me mambani nage, Eerigin o?

¹¹ Kat Ala nen aret eeriyak nogo lek a? Eeriyak kat aret kwe, mbo pinanege, Nawuri wim eeka ninom wundi nogwe me, kat ninom wundi naga'lek puk age, Eeke menggendak nogo lek a?

¹² Togop aret me, Aakumi nen ninagap ndariyak ti, meek aret me, Nit wim eekwi niinok, kat ninom a'nuk eeko logowok o.

¹³ Kat Ala ninom aret age keenok, Ninomaawi mondok iya lombok tiyak ari kagak, Kalik nen aret ninawim kiyogobit namunggun o.