Ndawi 107 - Ala Wone Peenok Peebi Mbanak

NDAWI PUGU KUWAK EERAK 4 LIIRU MBAMBUNUK, AMBOKAN MBANAK YI ARET (Pasal 107-150) Ala obeelom menggerak me, tiyappuurak wone

¹ At Aliku ALA ti, obeelom mban wonage me, “Wa,” yogo logonip o. Aakumi inabuwa nen iniki kunik aganake nogo ti, Lek aga'lek mondok aret wonage menggerak.

^2-3 Aliku ALA nen aakumi inagap ndarogo piige, Inom ogoorak ineenggime nen wondet eerogo piige, Oonegen lagi wage menggim nen, Oonegen kilu yi nage menggim nen, O omarip paga pa'nggwe nen, o ame paga pa'nggwe nen, Yi awi ndi awi abok nen, Kuwak eerogo piya wage, Eeginabeegerak nogo nen wone ti, yogo logowak o.

⁴ It ando nen kota ambi ye mbambatinuk logorak kobak aret me, O karume ya agak nda agak nugwi,

⁵ Inagi-inambi abu nen inomaawi lek age kagak nugwi, Eeko nogogwaarak.

⁶ “Nonggop eekkoloobok,” aganake mbareegi, Inoone nggwok paga Aliku ALA yogwi iinok, Aaninggin inoba wonage nogome nen inagap ndarogo piige,

⁷ Tu mo'mot wogoren o kota It ye mbambatinuk logowam piya unggwi wage, Eereegerak.

^8-9 At Aliku ALA nen it niyo abu kenok, ndonggorogon nawak nduk wogorage, Inambi abu kenok, yi mendek ndi mendek abe mban kalo logonogo wogorage, Eeke menggerak me, Aliku ALA it inabuwa nen iniki kunik mban aganake, Aakumi aret iigak kwe, iya tit eeppiinet wage, Eeke ti paga At apuri ti nen Aliku ALA, “Wa,” yogo logowak o.

^10-11 Ala wone yugu, “Eeriyak nineebi,” mbakwi, At Tiyanak Lombok Menggerak nen inaruk wake nogo, “We agan nege agaarik a!” yinuk, yogwe, Eereegwaarak paga It ando o apit yumaak lombok aago me wonogwe, Mbutigeele maarak yagan wakwi wonogwe,

¹² It aakumi inabu'me iigak, Yabu aaninggin eeruwak nduk, yorogwe iinok eekwi, Eeko logonet, Perak togon yigeebu wanggwi iigak kwe, Yeenggwaaraga'lek mbo piigo nogogwaarak.

¹³ Togop eeppiigwi iinok, “Nonggop eekkoloobok,” aganake mbareegi, Inoone nggwok paga Aliku ALA yogwi iinok, Aaninggin inoba wonage nogome nen inagap ndarogo piige,

¹⁴ O apit yumaak aago me nen wogoren wundi wage, Mbutigeele maarak nogo ndenenak-penenak eerogo piige, Eereegerak.

^15-16 At Aliku ALA nen Tungga mbuti tembaga paga aago ti, yigirogo nggimbege, Tu unggwogo menggam pak ambe mbuti paga aago nogo, Kalenak-pugunik eerogo pege, Eeke menggerak me, Aliku ALA it inabuwa nen iniki kunik mban aganake, Aakumi aret iigak kwe, iya tit eeppiinet wage, Eeke ti paga Aliku ALA, “Wa,” yogo logowak o.

¹⁷ It ando iniki lek wi negen logonet, “Ala eeriyak mbake nogo nineebi,” mbakwi paga andi-pandi aganake, Maluk eerit nugwi paga aaninggin-paaninggin inoba kwi'nage,

¹⁸ Yi mendek ndi mendek noorak abok aret peyak wuriyak mban aganake, Kambunuk nogo menggam tungga'nggi paga panggo yi nogwe, Eeko logonet,

¹⁹ “Nonggop eekkoloobok,” aganake mbareegi, Inoone nggwok paga Aliku ALA nggino yogwi iinok, Aaninggin inoba wonage nogome nen inagap ndarogo piyareegerak.

²⁰ At oone yoraawak nduk nappiyareegerak yorogwe iigak, Ineebe andi obeelom aganake, Mbuun ambena nen wumbiya wage, Eereegerak.

²¹ Aliku ALA inabuwa nen iniki kunik mban aganake, Aakumi aret iigak kwe, iya tit eeppiinet wage, Eeke ti paga At Aliku ALA, “Wa,” yogwi,

²² “Wa,” yogo logonet, ake warogo wogogwi, At eeppiinet wundi wage nogo anep pogo logonet, inale'nggen paga mbininogo yoranet nugwi, Eeko logowak o.

²³ It ando nen yiiro paga niyo kole laut paga nugwi, Yi nggwok yenggenak nogo paga Yi mendek ndi mendek kunggo'net nugwi,

²⁴ At Aliku ALA eerit nage nogo inigen kogwe, Niyo laut inikime iya tit eeke nogo liippugwi, Eereegwaarak.

²⁵ At Aliku ALA nen oone ari kenok, O wiya nabuninuk wage logonet, Niyo kilaarak-mogonik eerogo nippit wage paga

²⁶ Ineebe piyanogo mbogut kuli nippiige, Tebenogo ogu laut inikime wuppiige, Eeke kagak It aap inogogumbuk kwe, iniki ma'nage,

²⁷ Aap amburu nenok kumili eeginake menggi kwak, Nombok-kombok aganake, neyak-kweyak eeginake, “Yogop eeruwok o,” yinuk, kooniyak meek age, Eeke mbareegi,

²⁸ “Nonggop eekkoloobok,” aganake kenok, Inoone nggwok paga Aliku ALA yogo mbareegwa, Aaninggin inoba wonage nogome nen inagap ndarogo wumbiya wage,

²⁹ Ndi, o wiya nogo abolok nggobo agan nage, Yi kilaarak-mogonik eeke nogo tebe agan wangge, Eeruwak nduk yoge, Eereegerak.

³⁰ Ti abok aret abolok lek age, “Ndaa'ndi kwak wo'niren wumbinani nane,” mbareegwam ta'nogo aret wumbiya nage, Eeke mbareegi, Inale'nggen ambik mbareegwaarak.

³¹ Aliku ALA inabuwa nen iniki kunik mban aganake, Aakumi aret iigak kwe, iya tit eeppiinet wundi wage, Eereegerak paga At Aliku ALA, “Wa,” yogwi,

³² Aakumi kuwak aago inenggela'me alut eekwi, Aakumi inoweewi wone mbanggo menggam nen at tiyappugwi, Eeko logowak o.

³³ Niyo wage nogo lek eeppunuk, karume eerogo pege, Niyo eneeri wundi wage nogo amburu lek nggween mbuk eerogo pege,

³⁴ It o time wonogwe nen maluk mban eekwi iinok, Nggween mili lubunik nogo Mayu yumbunik iri'ngga wunggeelik kwak eerogo pege, Eereegerak.

³⁵ Ti'nuk, o karume nogo niyo yenggenogo pit nage, Nggween mbuk nogo niyo eneeri kilanogo wunabit wage, Eeke nagagerik,

³⁶ It mbi abu menggaarak nogo, O time logowak nduk wogoren piya wagagerak. Wage mbareegi, it o time ye mbambatinuk logowak nduk, O kota aret eerogo pugwi,

³⁷ Yabume yi mendek ndi mendek awi yumbunggwi, Anggur awi yakwi, Anggen yege kenok, mbanogo nunggwi, Eereegwaarak.

³⁸ Eekwi iigak, at ale'nggen inoba piige, Ineebe ambik wiganogo piige, Inaanggumi kunduk lek aga'lek ambik eerogo piige, Eereegerak.

³⁹ Togop kwe, aakumi nen it tebenogo piigwi, Aaninggin-paaninggin inoba kwippiigwi, Yagan wako logowak nduk, eeppiigwi, Eeko nogogwaarak paga Ineebe mbereret ogwe, inenggali mbakak nugwi, Eeko nogogwaarak.

⁴⁰ Aliku ALA nen aap inengga warak nogo Abeelik-abeelek eerogo piige, Tu lek me karume ya agak nda agak nugu logowak nduk eeppiige, Eereegerak kwe,

⁴¹ It ineenggi lek nogo aaninggin inoba wonage me nen piyanogo mippiige, It inaaganapuri ndomba kwak wiganogo piige, Eereegerak.

⁴² Ti eeppiige mbareegi, aap iniki abe koonak nen Inigen pegiinok, inale'nggen mbakwi, Ndi, it aap maluk mendek abok aret inoone lek ogwe, Eereegwaarak.

⁴³ Aap ambi iniki warak wonage kenok, wone yi abok aret liippege, Aliku ALA aakumi inabuwa nen Iniki kunik lombok aganake menggerak nogo, Liirogon porogo wonage, Eeke logowak o.