Ndawi 106 - Ala Wone Peenok Peebi Mbanak

Ala nen apuri Iterali obeelom eeppiyareegerak wone

¹ At Aliku ALA tiyappogo logowok o! At Aliku ALA obeelom mban menggerak me, “Wa,” yogo logonip o. Aakumi inabuwa nen iniki kunik aganake nogo ti, Lek ageelik mondok aret wonage menggerak o.

² At Aliku ALA iya tit eeke menggerak nogo aap ta nen yoranet nage, Ta nen at endage ndak aret tiyappege, Eeriyak op mbakop? Lek aret o!

³ Eekaatak a'me nggelok eeppiinet nugwi, Obeelom mban eerit nugwi, Eeko menggaarak kenok, Inale'nggen aret mbako logowak o.

^4-5 Kaliku ALA wae. It aap leenogo piyareegindak obeelom eeppiige paga Obeelom wonogwe me, an ninom obeelom wonage, It aakumi kat mendek inale'nggen mbakwi nogo, An kunduk nale'nggen mbake, It keyate kwak kiniki kundugu kendage tiyappugwi me, An ninom kendage tiyappege, Eeke logokit nduk, Kapuri obeelom eeppiige keenok, an kunduk abe'nake, Kapuri inagap ndake keenok, an togon nagap ndake, Eeru o.

⁶ Ninombomini maluk eeko nogogwa kwak, nit maluk eekwi, Nit kat koone tagambunuk maluk lombok eerit nugwi, Eeko nogogurak o.

⁷ It ninombomini o Metit logonet, Kat iya tit eeke nagagindak nogo liippega'lek wonogwe, Inabuwa nen obeelom eeppiige nagagindak ti, mari ogwe, Niyo Laut Merah ambet paga logonet, koone koneniyak, “Nineebi o,” yinuk, yogwe, Eekwi iigak kwe,

⁸ Kendage tiyanak logowak nen Komaawi ambik menggendak nogo, It ineenu aruwak nduk, inagap ndake,

⁹ Niyo kole Laut Merah nogo mberege, Niyo nogo mogonogo nggween kin eeppege, Tu karume nogogwa kwak, Nggween ogu teberogon wolonogo punuk, Wogoren wunda wage,

¹⁰ Ineebi inombaka ineenggime nen inagap ndake, It inawim ineenggime nen wondet eerogo piige, Eereegindak o.

¹¹ Inom ogoorak nogo niyo nen ndonggonogo piige, Ineenik ambi teppiyoolik, abok aret tebenogo piige, Eeke mbareegi,

¹² Kaliku ALA nen, “Eeppinagagin o,” yoragagindak nogo abet aret mbakwi, Kendage tiyappogo logonet, ndawi wakwi, Eereegwaarak.

¹³ Eereegwaarak kwe, Eeginabit wage nagagindak nogo mbet-mbet inami ogwe, “Aliku ALA nen yo'niraawak o,” yinuk, tokkeega'lek iniki koombunuk aret eekwi, Eeko logonet,

¹⁴ O karume nen iniki uugwe mbakwi nogo wogoraga'lek kenok, Ala mberugwi, Aakumi lek me karume, “Ala anini wungge kaamun ilik?” yinuk, abut mbanggwi, Eeko mbareegwa,

¹⁵ Nggino yoreegwaarak nogo aret wogoragagerak kwe, Kugi iniki nengge mendek inenggela'me nappi wagagerak.

¹⁶ O karume inawooliya wurik nogogwam time logonet, “It mban eerit nogwe yi, ao,” yinuk, Muta ineebi mbakwi, Aliku ALA nen leenogo pereegerak Karun nogo ineebi mbakwi, Eeko mbareegwa,

¹⁷ Nggween ambe nggagangge logonet, aap Ndatan yonggoke, Nggween ambe lambunggage logonet, Aap Abiram inom eeka nogo inom wuppiige,

¹⁸ It inom ogogwaarak nogo kani inoba wunuk ari, It aap maluk mendek ti, kani nen ineebe nenet nage, Eereegerak.

¹⁹ O Korep logonet, tapi aagaluk ogut ogobakkigirogo pugwi, Mbuti paga inagugiwak ogobakkigirogo punuk ayuk wukwi,

²⁰ At tiyanak menggerak inogoba Ala obaane'me iri'ngga nenet nege menggerak lembu ngguunok ogut ogobakkigirogo pugwi, Eereegwaarak.

²¹ It inagap ndaka Ala nogo inami ogwe, At o Metit iya tit eerit nage,

²² O Kam paga eerubok mendek eeke, Yi kole Laut Merah aa'nggi paga Iniki ma'nariyak mendek eeke, Eeke nagagerak Ala nogo kobak eerogo pugwi, Eekwi iinok,

²³ At Aliku ALA nen ineebe lek eerogo piyoorak yereegerak mendek at leenogo pereegerak Muta nogo, It inenggela'me mi'nage mbareegi, Aliku ALA anini nen Pup eerogo piyoorak mbareegerak nogo nini tayo yereegerak.

²⁴ Nggween nogo abu abe aret kwe, “Abe lek o,” yinuk, mbo pugwi, Aliku ALA nen, “Eeppinagagin o,” yinuk, yoragagerak nogo abet mbarulik teppugwi,

²⁵ Inawooliyana logonet, inoone laakit-laakot yogwe, Aliku ALA nen yoragaatak konengga'lek mbo pugwi, Eeko mbareegwa,

^26-27 Aliku ALA nen yorage logonet, “Kit o karume time kineebe lek eerogo pinagage, Yi aakumi ndi aakumi inenggela'me Kit kinombowologwe tek eerogo piige, Kit paga wiganak nogo yi awi ndi awi mappiige, Eerigin o,” yinuk, Eenggi nippunuk, kumbuk mbaneegerak.

²⁸ Kugi Mba'an puut Peyot menggerak inom kunggologwe, Ala obaane'me inagugi ogut ogobakkigirik Inoone lek mendek inake inaanggo warak nogo nunggwi,

²⁹ Maluk eekwi ti paga Aliku ALA anini eerogo pugwi, Eeko mbareegwa, Kugilengga inoba ndi wurogo piyareegerak o.

³⁰ Piige mbareegi, at Pinekat mi'nage nagagerik, It maluk eereegwaarak nogo Aaninggin inoba piige mbareegi, Andi inoba agagerak nogo lek aret agagerak.

³¹ Ti eereegerak nogo paga, “Aap ti abe o,” yinuk, Yogwe iigak, nda'narit wundi wogo nogogwaarak.

^32-33 Niyo eneeri wungge menggim Meriba logonet, Ala anini aruwak nduk, eerogo pugwi, Muta iniki wakkolaawak nduk, eeppugwi, Eeko mbareegwa, Wone ena koonna'lek perak togon yoragagerak paga Muta kunduk maluk eekkolagagerak.

³⁴ At Aliku ALA nen yi aakumi ndi aakumi lek eerogo piyaawak nduk, Wone lengganogo yoragagerak nogo ndak-ndak eerulik ando teppugwi,

³⁵ Inom nenggelak-kenggelak aago logonet, It eeko nogogwaarak nogo aret mamunggologwe,

³⁶ It inagugiwak nogo mugurok nogwe, Eekwi paga keele pugu kwak yilunggologwe,

³⁷ Inapuri wologwe inom, komologwe inom, Inoorogo kugi inake wogorogwe,

³⁸ Maluk eeka'lek ugun iigak, inamiya kilirogo piigwi, Inapuri wologwe inom, komologwe inom, Ineebe inoorogo piinok, it Kanan mendek inagugi inake ogorogwe, Eeko nogogwaarak. Inamiya kilirogo piigo nogogwaarak paga o ti abok aret maluk eerogo pereegwaarak.

³⁹ Ti eeko nogogwaarak paga Ogole warak pegiyoorak meek eekkologwe, Eerit nogo nogogwaarak paga Kwe mbabilu kwak eerogo pakwi, Eereegwaarak.

⁴⁰ At apuri togop aret eereegwaarak paga Aliku ALA anini kani kunik negen mi'nage, Eyate kwak at lombok apuri aret kwe, Peyak wurik kwak eerogo piige,

⁴¹ Yi aakumi ndi aakumi ineenggime piige, Ineebi inombako nogogwaarak nen tebembiinok logowak nduk, wogorage, Eeke mbareegi,

⁴² It nen tebenogo piigwi, Inabu'me piinok inoone omaawi paga yorogwe, Eeko nogogwaarak.

⁴³ At Aliku ALA nen kulinik aret Wondet eerogo piigak mban eeke nagagerak kwe, “Ala nineebi,” mba'nuk, It eeriyak mbakaatak nogo mban koombunuk, Maluk mban eerit nugwi paga Ineebe lek eerogo pako nogogwaarak.

⁴⁴ Togop eekwi iigak kwe, Le yogo logonet, inoone nggwok paga Aliku ALA yogwi iinok, aruk konengge, Aaninggin-paaninggin inoba age nogo liippiige, Eeke nagagerik,

⁴⁵ Eeppiyoorak wone abuk nggaruk togon Koonogo punuk yoragagerak nogo abeke, Inabuwa nggwok lombok mbake logonet, Iniki kunik aganake nagagerak paga Anini nen eeppiyoorak nogo tayoppege, Eeke nagagerik,

⁴⁶ It aakumi keele maarogo piinok wonogwe nogo nen It inabuwa mbaruwak nduk, eeppiige nagagerak.

⁴⁷ Kaliku ninogoba Ala wae. Kendage abu abe alik leenak me, “Wa,” yokkugwi, Kendage tiyappogo logonet, ninale'nggen mbakwi, Eeruwok nduk, Kat nen ninagap ndake, Yi aakumi ndi aakumi inenggela'me nen Kuwak eerogo pinani wage, Eeru o.

⁴⁸ Iterali inogoba Kaliku Ala o. Kat aa'nduk nen nok, yogondak nen, Mondok-mondok aret wonage menggendak me, Kendage tiyappogo logowok o. It aakumi abok aret nen, “Abet aret,” yuwak o. Aliku ALA tiyappogo logowok o.