Ndawi 101 - Ala Wone Peenok Peebi Mbanak

Aap endagembogut eeke logorak yereegerak wone At Ndawut nen ndawi ambi yi aret pereegerak.

¹ Kaliku ALA wae. Kat nen aakumi kiniki kunik aganake, Eekaatak a'me nggelok eeppiige, Eeke menggendak nogo paga An nen ndawi wake, Kinikilom mbarenok nduk, ndawi paga tiyappagage, Eeke logogin o.

² An maluk ambi eeke neyo, liippunuk eeke logogin me, Kat mandenom neya woraamunggun o? Niniki mbere lek ambit mban logonet, An name obeelom mban eerit nage,

³ An neegak maluk eeriyak ti, “Mage o,” yorage, Eeke logogin o. It aap an noone liippuurak ineebi mbakwi nen Eerit nugwi nogo an neebi inombake, It an ninom kunik logorak lek aret inombake, Eeke logogin o.

⁴ It aap iniki nggolawe nogo tayorogon piya nage, It maluk eekwi ninom eeriyak mondok neebi mbake, Eeke logogin o.

⁵ Aap ambi ore eebe lek kagak meek eerogo pege kenok, At eebe ti, enggaawak lek eerogo pege, At aap, “An iya,” mbake logonet, iniki wogoppake nogo An teppuurak meek me, onggo eeppege, Eeke logogin o.

⁶ O yime it aakumi kat koone li'lak eekwi nogo An ninom logokit nduk nenegen wogonake, Ndi, it aap maluk inoba ambi lenggenggulik nogo An nake eeko logowak nduk eeppiige, Eeke logogin o.

⁷ It aap wi-wi aganaka nogo an name wonogwe, It pilit pugungga nogo kunduk, an nowagam wonogwe, Eerugun lek aret o.

⁸ O kubondendok age paga Aap maluk mendek o yime wonogwe abok aret Ineebe lek eerogo piige, Ndi, it maluk eeka abok aret Kaliku ALA kagota nen inenggaawak lek eerogo piige, Eekak mban eeke logomunggun o.