Ndaniyen 8 - Ala Wone Peenok Peebi Mbanak

Abi paga ndomba kambin imbirak kagagerak wone

¹ At Mbelitiyatat nogo, aakumi inowe endagembogut a'nuk tahun aa'nduk eeke paga wone lengganogo yorage kagak, an Ndaniyen nen nabi kagagirak o. Kage nagagirik, ti'nuk, tahun mbere eeppunuk, ambi eeke paga aap endagembogut Mbelitiyatat wone lengganogo yorage kagak, an Ndaniyen nabi ambi kagagirak.

² Kage logonet, neebe o Elam aap endagembogut awi nggwok abe wurik me wonage me kota Tutan niyo Ulayi aa'nggi paga mi'ndak wonage kagagirak.

³ Mi'ndak wonage logonet, nenegen pila ari nagagirik, ndomba ngguunok ambi eyak mbere nggorek lombok me, niyo Ulayi aa'nggi paga mi'ndak wonage kagagirak. Eyak mbere nogo ambi abu nggorek kwe, peebi lombok wungge kagagirak.

⁴ Kage neegak, ndomba ngguunok nogo ti, ena oonegen kilu yi nage menggim pa'nggwe anobak yimbinogo nagabit nage, o omarip paga pa'nggwe anobak yimbinogo nagabit nage, o ame pa'nggwe anobak yimbinogo nagabit nage, eerit nage kagak, at eeke ti paga it ambi nen ko wappunuk puk ogwe, at tebenogo piigetak nogo inagap ndarogo piigwi, eeriyak meek aret kagagirak o. At omaawi lombok me, eeriyak mbaketak nogo mban eerit nage logonet, iniki tiyappatit nage kagagirak.

⁵ Ti eeke kagagirak nogo an niniki koonit nage me, kambin ngguunok ambi eyak ambiret abu iya lombok enegen peenok-peenok kagak oolo time wundeegerak nogo, oonegen kilu yi nage menggim pa'nggwe nen iyok nggween paga pega'lek o nggween yi abok aret wukka wagak wage kagagirak.

⁶ At kambin ti, ndomba ngguunok eyak mbere niyo aa'nggi paga mi'ndak wonage kagagirak nogo wonage me wage nagagerik, at anini mondok alik negen eeke logonet, imbirak kok nggerenggolage kagagirak.

⁷ Anini lombok nen mbe agan ndomba ngguunok nogo imbirak nggerenggologo logonet, ndomba ngguunok eyak mbere nogo, mondok kalok togon eerogo pege mbareegi, ndomba nogo ko wappunuk logorak meek kenok, kambin nogo ti, omaawi ambik me, at eebe nggween paga mbo nggimbunuk, iyok paga aambirak-mbirak eerogo pege kagak, omaawi ambik me, aap ambi nen pelenogo nappuurak meek aret kagagirak.

⁸ Ti eerogo pege kage nagagirik, at kambin ngguunok ti, mondok omaawi age, at anggup abu tiya agan lagangge, eeke mbareegi, eyak mondok abe nggwok lombok nogo, kalok ari kagagirak. Eyak kalenak nogo obaane'me eyak 4 abu alik negen wungge kage nagagirik, mbogut oolo ya'i o wiya agi-ogu nen, aru-ogwe nen, warit wage menggerak nogo, warit wage menggim pa'nggwe eyak 4 nogo inalitik-inalitak ina koonogo punuk iigak, wundit nage kagagirak.

⁹ Ndi, eyak 4 nogo ambi paga eyak mbuuluk ambi wungge nagagerik, eebe nggwok arit lagangge logonet, ena o ame pa'nggwe koonogo nappege, oonegen lagi wage menggim pa'nggwe koonogo nappege, Nggween Abu Abe Lombok Menggim pa'nggwe koonogo nappege, eeke kagagirak.

¹⁰ Eyak ti, mondok nggwok arit it mbogut paga ineegin warak menggam ari laganuk, it laaluguragan negen mbogut paga menggaarak ando nogo ti, nggween paga mbo wuppiya wa'nuk, iyok paga aan mbiranogo piinet nage kagagirak.

¹¹ “It mbogut paga inomaawi ambik menggaarak Inowe Nagawan abu tiyanak nogo, an ndak-ndak aret o,” yinuk, ko'lu-kii'me at Inowe Nagawan ake warogo wogogwi nogo, “Ambinom wogoriyak lek o,” yinuk, yorage, at alut eeko menggam alik leenak nogo minogo pege, eeke kagagirak.

¹² Aakumi nen, “Ala ari ambinom mugurok noorak nineebi o,” yinuk, ko'lu-kii'me ake warogo wogogwi nogo mbo pugwi, “Ala wone ti, abe lek o,” yinuk, we eerogo mbo pugwi, eereegwaarak me, eyak nogo eerit nage abok aret abe mban age kagagirak.

¹³ Ti'nuk, at alik leenak ambi nogo nen wone ari mbareegi, at alik leenak ambi nen onggo yoge logonet, “Ko'lu-kii'me ake warogo wogogwi nogo lek age, Ala ambinom mugurok noorak nineebi o, yinuk, inenggaawak lek eerogo pakwi, ndi, at alut eeko menggam alik leenak wonage nogo maluk eerogo pugwi, at mbogut paga menggerak awuri ineegin warak tebenogo piinok, iniyok aan lebenogo piigwi, eekwi kabinggaanggo paga kagandak nogo, eekwi iigak ne mande ari nagin mbaken o?” yinuk, nabi paga yo'nege kagagirak.

¹⁴ Nabi paga yo'nege kage mbareegi, at nen onggo an yo'nege logonet, “Ko'lu-kii'me kubondendok nen lingginit kiyoma ari nage ne lambunik ti, dua ribu tiga ratus arigin o. Ti age logomenggerik, at alut eeke menggim alik leenak nogo aa'nduk obeelom wonagagi kwak aret arigin o,” yinuk, yo'nege kagagirak.

Abinggaanggo kagagerak, “Alom ndogop o,” yoreegerak wone

¹⁵ An Ndaniyen nogo, “Nabinggaanggo kage yi, nonggoti kagi?” yinuk, niniki liippit unggwage me, nu'lek me aakumi negen nenaame mi'nari wage kagagirak.

¹⁶ Mi'nari wagagerak wonage kagak, at ambi niyo Ulayi ene paga nen oone nggwok paga ari logonet, “Nggabiriyen wae. At aap ti, abinggaanggo kegerak nogo, alom kin paga yoru o,” yinuk, ari naruk koneneegirak o.

¹⁷ Konengge nagagirik, an taati mi'ndak wonage me koorok neya wage mbareegi, nogut nggigik yinuk, nambuluk yipuk nggween paga ngginnagagirak. Ngginnage mbareegi, at nen an yo'nege logonet, “Aakumi nen ndarak yi wae. Kabinggaanggo kagandak nogo ti, age yobok eeriyak nogo aret kagandak me, liippumunggun o,” yinuk, yo'nege kagagirak.

¹⁸ At awo yo'nege kagak, nambuluk yipuk nggween paga ngginnagagirak wonage me, at nen an neebe pi'nake nagagerik, mippaneegerak.

¹⁹ Mippanege nagagerik, an yo'nege logonet, “Kabi kagandak nogo ti, age yobok eeriyak koonak nogo aret kagandak me, peebi Ala anini nen eeppiyoorak eyom paga eeriyak nogo yokkiri o.

²⁰ Ndomba ngguunok eyak mbere kagandak nogo ti, aap Meriya inom, Peretiya inom, inoweewi inendagembogut mi'nariyak nogo aret kagandak o.

²¹ Kambin ngguunok eeruwak maluk negen kagandak nogo ti, aap o Yunani inowe endagembogut nogo aret me, eyak ambi kole at enegen peenok-peenok kagak oolo wunggerak kagandak nogo ti, aap Yunani mendek endagembogut aa'nduk mi'naremenggerak nogo aret kagandak o.

²² Ndi, eyak ambi kalok ari nagaarik, obaane'me eyak 4 kuli wungge kagandak nogo ti, at abu'me piige menggim nen aakumi inabu'me piinok logowam 4 kin arigin kwe, at abu'me piige menggim omaawi nu'lek wonagagi kwak togop logogun lek o.

²³ Aakumi inabu'me piigo menggam 4 nogo ti, lek eerogo puurak eyom ari wage kagak, It Ala mugurok noorak abu nineebi o, yinuk, yogwe inenggela'me aap maluk eeka inobaabut nggolo lombok mi'nogwe iinok, aap endagembogut ambi anini wulo oone amburu paga aakumi inambokan lagangga iyagalo aret mi'narigin o.

²⁴ Mi'nage kenok, at omaawi mondok alik negen arigin kwe, at alik omaawi paga eeke logogin lek o. At ambi nen omaawi eeppemenggerak ti paga aakumi inamineeri ne agan noorak mendek eerogo piinet nage, at eeriyak mbake nogo mbeyok ari lek a'me aret arit nage, it aap inomaawi menggaarak inom, Ala apuri abu alik leenak inom, inenggaawak lek eerogo piige, eerigin o.

²⁵ At pilit pugungga iyagalo aret me, oone amburu ndik-ndik ari paga at ari nogo mbeyok yaga'lek a'me age, An iya, mba'nuk, wogoppatit nage, “Nit nu'lek op wonogwe,” mbakwi iigak, aakumi ambik lek eerogo piinet nage, at agabiti mbaka'lek it aap inendagembogut Inowe Endagembogut nogo tebenogo puurak mbake, eerigin kwe, at perak, aakumi ineenggi mbaanggaga'lek iigak, alik nen aret warak wangge kaagin o.

²⁶ Kabinggaanggo kage logonet, ko'lu-kii'me kubondendok nen lingginit kiyoma ari noorak kagandak nogo ti, abet aret eeriyak yokkege kagandak kwe, o peebi eeriyak yokkege kagandak me, wone ti, kinikime tebembunuk logomunggun o,” yinuk, yo'nege kagagirak.

²⁷ Kage nagagirik, wone yo'nereegerak ti paga an Ndaniyen neebe mondok ndeyak lombok eerogo panege mbareegi, andi negen windak wonage neegak, ne mande negen agagerak. Age mbareegi, mi'na'nuk, at aap endagembogut nen eeriyak yo'nege nogo aret eeke logonet, nabinggaanggo kagagirak yelok koolik ti, “Nonggoti kagi?” yinuk, niniki koonit tit unggwage nagagirak.