Ndaniyen 4 - Ala Wone Peenok Peebi Mbanak

At Nebukanetat wogoppateegerak paga endage lek agagerak wone

^1-2 “Kit yi aakumi ndi aakumi inom, aakumi kinanebunu lombok inom, kinoone alitak yogo monggotak inom, kit o nggween paga wonogwe nogo abok aret, Wa! yokkiragi o. Kit eerit nogwe paga kinale'nggen mban mbarit wundi wogo logomunggup o. An kinowe nendagembogut Nebukanetat nen ineenu agak inom, eerubok mendek iya tit inom, at Tiyanak Lombok Menggerak Ala nen eeke kagagirak nogo nale'nggen nen yokkira o.

³ Ineenu agak abu alik negen eeke, Eerubok mendek mondok iya lombok eerit nage, Eeke kagagirak nogo ti, iya! At abu'me piinok menggim ti, mondok-mondok wonage, Aakumi nda'narit wundi wogwe iigak, aa'nduk nen nok, peebi at wone lengganogo yoranet wundi wage, Eeke logogin o.

⁴ An Nebukanetat name niniki tayenak ugun aret wonage, nawi nggwok abe wurik me, nale'nggen paga wonage, eeke me,

⁵ nabi ambi kage logonet, nagabiti mbake, an nogo yege minggim nogo yege me, eeriyak agalu'mak ari wage, nabinggaanggo paga yo'nege, eeke kagak, Yi nonggop yo'nigi, yinuk, niniki koonit nage logonet, niniki mondok ma'nagagerak.

⁶ Nabinggaanggo kagagirak ti, it aap yi wone ndi wone alom abok ineenu o Mbaben wonogwe nogo nen paganogo yo'niri woraawak nduk, wiiragagirak o.

⁷ It aap kugi alom ineenu nen yoraga inom, inagugi nen yorage kenok yoraga inom, laaluguragan pekkenok yoraga inom, tili pagangga inom, wiiragagirak wogo mbareegwa, nabi kagagirak eebe nogo mbininogo yoragagirak kwe, Alom ndogop kagandak o, yinuk, mbininogo an yo'nirulik aret o.

⁸ Yo'nega'lek mbareegwa, at Ndaniyen, endage ambi an nagugi endage ndak-ndak tooneegirak Mbelatatat nogo, it kugi inayuk warak lombok nen yoragaatak ineenu mengga kwak, at togop aret yogwi iinok, eenu menggerak me, nowagam wage mbareegi, nabinggaanggo kagagirak nogo mbininogo at yoreegirak o.

⁹ At yoge logonet, Yogop eerigin o, yinuk, yoraga inowe Mbelatatat yi wae. Kugi inayuk warak lombok nen yoragaatak ineenu mengga kwak kat togop aret yokkugwi iinok, keenu logonet ari, ndi, wone nobarak mendek ambi keenggo'lek lek abok aret keenu wonage, eeke an neenu aret me, nabi kagarak mbininogo yokkege yi, Alom ndogop o, yinuk, mbininogo yo'nirumunggun o.

¹⁰ An nogo yege minggim nogo yege logonet, nabinggaanggo kagarak nogo yogop aret o. Nabinggaanggo kage logonet, o nggween oolo ya'i eyo ambi nggorek lombok laganggerak wonage kagarak o.

¹¹ Eyo ti nogo, eebe mondok nggwok age, omaawi lombok age, eeke logonet, era'nggup mbogut kuli ari laganggerak nogo, aakumi o nggween irip-irip wonogwe abok inigen koorak ndak aret kagarak.

¹² Eyo nogo engga abu obeelom wonage, anggen mondok alik negen yugu wonage, eyo ti nen yi mendek ndi mendek ineenik wonogwe abok aret inambi magarage, ndiimbu-nggwiya abok eyo ti nen nobarinabuwak nduk, abu'me ari wogwe, eno'mbak paga yi towe ndi towe inawi wuppunuk wonogwe, yi mendek ndi mendek ineenik wonogwe abok aret eyo ti, anggen nunggwi paga ineenik wonogwe, eekwi iigirak o.

¹³ Ti iige nagarik, nogo yege minggim nogo yege me, nabinggaanggo eegu kage logonet, Aap inigen wogonaka alik leenak ambi mbogut paga nen wambi wage nagaarik,

¹⁴ oone nggwok paga ari logonet, Eyo yi, eebe muurogo pu o. Muurogo punuk, eno'mbak nggarik-nggarek eerogo pege, engga mononogo pege, anggen yugu mbanogo mbo tagala eerogo nappege, eeru o. Eeke keenok, ndiimbu-nggwiya eyo abu'me wonogwe ti, kole ma'nogwe, yi towe ndi towe eno'mbak paga inawi wuppunuk, wonogwe ti, tilik-mbilik ma'nogwe, eeruwak o.

¹⁵ Alom-omanggen yarak perak, teppege logomenggendik, mbuti keele paga inom, mbuti tembaga paga inom, yiluk-yiluk eerak paga keele maarogo punuk, kingga'lek iri'nggaame time teppu o. Teppemenggendak wonage me, konaananggen mbogut paga nen at eebe miin ngguluk-nggolak eerogo pi wambi wage, iri'ngga-kale'ngga nik yemenggim enggela'me ndiimbu-nggwiya inom nege, eeke logowak o.

¹⁶ Aakumi iniki warak mengga kwak lek, wam iniki kumbunuk nege kagak tahun 7 aret eeruwak nduk teppuwak o.

¹⁷ At Tiyanak Lombok Menggerak nen aakumi inabu'me piinok menggam abok at alik aret unde wonage logonet, at mippuurak nogo aret mippege, inendage lek abu tebenak lombok kwe, mippuurak mbake kenok, aret mippege, eeke menggerak it aakumi o nggween paga wonogwe yi abok aret ineenu aruwak nduk, at eeriyak kooneegerak yi, it aakumi inigen wogonaka nappiya wagaarak nen yorogwe, it at awuri alik leenak nogo nen yogwe, eeko agaarik o, yinuk, ari kagarak o.

¹⁸ An aap nendagembogut Nebukanetat nen nabinggaanggo kagarak nogo ti aret yokkigi o. Ndi, yogondak kat kendage Mbelatatat aret me, it aap an nabu'me piinok minggim iniki warak yi wone ndi wone alom ineenu wonogwe kwe, Kabi ndogop kagandak o, yinuk, alom lik togon yo'niriyak meek me, kat nen aret yo'niru o. It kugi inayuk warak lombok nen yoragaatak ineenu mengga kwak, kat togop aret yokkugwi iinok, ari menggendak me, kat nen an yo'niriyak op aret o,” yinuk, yoreegirak nogo an aap nendagembogut Nebukanetat nen aret yagi o.

Abi kagagerak alom Ndaniyen nen lik togon yoreegerak wone

¹⁹ Yoreegerak at Ndaniyen endage ambi Mbelatatat nogo nen, “Yori ilik?” yinuk, iniki koonit unggwage kagak oonegen ambiriluk ambi age mbareegi, at aap endagembogut nen Mbelatatat nogo yoge logonet, “Mbelatatat wae. Nabinggaanggo kagarak eebe yokkigirak inom, Alom ndogop o, yinuk, yelok kagandak inom, ti paga kiniki piirik-paarik eerogo pagarak mage o.” Yoge mbareegi, at Mbelatatat nen, “Nogoba o. Kabi kagandak nogo it kinom wim mbanak a, kinom ogoorak a, eeppiyaawak lak, ao!

²⁰ Eyo eebe mondok nggwok age, omaawi mondok iya lombok age, era'nggup mbogut kuli ari lagangge, aakumi o irip-irip wonogwe abok aret inigen ndak koorak lagangge, eeke logonet,

²¹ engga abu obeelom lombok wonage, anggen iya lombok luurogo yege, at paga yi mendek ndi mendek ineenik wonogwe nogo inambi magarage, at abu'me ndiimbu-nggwiya abok aret at nen nobarinabuwak nduk, abu'me ari wogwe, eno'mbak paga yi towe ndi towe inawi wuppunuk wonogwe, eekwi iigendak ti,

²² nogoba kendagembogut kat keebe aret o. Eyo eebe nggwok kwak ti, kendage mondok tiyak ari, kabu'me piinok menggenom omaawi lombok age, eyo era'nggup mbogut kuli ari lagangge kagandak kwak, kendage tiyak agan lagangge, kabu'me piige menggenom wiganinuk o nggween irip-irip ari nage, eekerak nogo aret o.

²³ Ndi, nogoba kendagembogut wae. Aap inigen wogonaka ambi abu alik leenak mbogut paga nen wambi wage nagaarik, ari logonet, Eyo yi, muurogo punuk, enggaawak lek eerogo pege logomenggendik, alom-omanggen yarak mban teppunuk, mbuti keele paga inom, tembaga paga inom, yiluk-yiluk eerak paga keele maarogo punuk, kingga'lek iri'nggaame time mbo pemenggendak konaananggen mbogut paga nen at eebe miin ngguluk-nggolak eerogo pi wambi wage, iri'ngga-kale'ngga nik yemenggerak enggela'me ndiimbu-nggwiya inom nege, eeke kagak, tahun 7 aret eeruwak o, yinuk, ari kagandak nogo ti,

²⁴ nogoba kendagembogut wae. Wone ti yokkegerak alom nogo ti, at Tiyanak Lombok Menggerak nen nogoba kendagembogut eeppagarak wone amburu nggaruk togon koonogo wumbegerak nogo yi aret.

²⁵ Nogoba kat nogo ti, aakumi wonogwe me nen wumbagamenggaarak ndiimbu-nggwiya kinom penaame time nege logonet, tapi iri'ngga mbanogo nenet nugu mengga kwak, kat nenet nege, mbogut paga nen konaananggen wuppi woramenggerak paga keebe miin ngguluk-nggolak aago nege, eeke logomunggun o. Ti eerak nege keegak, tahun 7 aret koba nage kenok, aakumi inabu'me piinok menggam abok aret at Tiyanak Lombok Menggerak alik en unde logonet, wone lengganogo yorage logowak nduk, mippiyoorak mbake kenok aret mippiige menggerak abet aret kagi o, yinuk, mbarumunggun o.

²⁶ Ndi, Eyo muurik alom-omanggen kunik teppu o, ari kagandak nogo ti, kat nogoba nen, At mbogut paga menggerak nogo mban aakumi inabu'me piigo menggam unde menggerak kagi, ari keenok, kat aakumi kabu'me piinok menggenom nogo, wone lengganogo ambinom yorage logonok nduk, kobaane'me aret mippagagin o.

²⁷ Togop aret me, nogoba kendagembogut wae. An wone yokkigirak ti, mbo pega'lek abet aret liippumunggun o. Kat maluk eeke menggendak ti, mbo punuk, aakumi eekwi nogo a'me nggelok eeppiinet nage, it aap ineenggi lek tebenak menggaarak nogo, inabuwa mba'nuk obeelom eeppiinet nage, eeke keenok, kiniki ugun tayenak logonet, kale'nggen paga eerit nage logomunggun o,” yinuk, yoreegerak.

Abi kagagerak a'me agagerak wone

²⁸ Wone abok ti, aap endagembogut Nebukanetat at paga aret agagerak o.

²⁹ Wone yoreegerak kagak, tut 11 penembunuk, ambi penengge paga o Mbaben aap endagembogut nogo, at awi nggwok abe wurik irimbaga nege-wege logonet,

³⁰ “An nendagembogut minggim o Mbaben mondok tiyanak lombok wonage yi, an nomaawi paga pippunuk logonet, eerogo pit nage, nayuk warak neenok, Endage tiyanak wonage me iya! yuwak nduk eerogo pege, eereegirak yi aret nogo lek a?”

³¹ yinuk, nalik nooni nalik noone awo agan nage me, oone mbogut paga nen ari logonet, “Kendagembogut Nebukanetat wae. Kat eeppagarak wone lengganak nogo yi aret. Lengganogo yorage menggendak nogo koone lek aret arigin o.

³² Kat aakumi inenggela'me nen wumbagamenggaarak ndiimbu-nggwiya kinom penaame nege logonet, tapi-ndomba iri'ngga nenet nugu mengga kwak nenet nege logomunggun o. Ti eerit nage keegak, tahun 7 aret koba nage keenok, aakumi inabu'me piinok menggam abok aret at Tiyanak Lombok Menggerak alik en unde logonet, wone lengganogo yorage logorak aap mippiyoorak mbake kenok, aret mippiige menggerak abet aret kagi o, yinuk, mbarumunggun,” yoreegerak.

³³ Ti yoge eyom paga aret Ala nen at Nebukanetat yoreegerak nogo ndak-ndak, aakumi inenggela'me nen wumbogo mbareegwa, tapi kwak iri'ngga mbanogo nenet nege, mbogut paga konaananggen wurabi wage paga eebe miin ngguluk-nggolak eerogo pege, eeke kagak, towe tiyu eeruwak kwak kunogo pege, eenggabit towe ineenggabit kwak eerogo pege, eereegerak.

³⁴ Ndi, “Tahun ndogop logorak,” yugu nogo abu aret ari wage mbareegi, an Nebukanetat nena mbogut paga ni'nage neegak, niniki nambokan agagerak nogo nenaame ari wage mbareegi, at Tiyanak Lombok Menggerak nogo alut eeke, at eenik mondok menggerak nogo ayuk wuke, endage tiyappege, eereegirak o. At wone lengganogo yorage menggim omaawi menggerak ti, lek arigin lek mondok omaawi aret wonage, Aakumi nda'narit wundi wogwe iigak, at abu'me piinok menggim nogo mondok wonage, Eerak logogin o.

³⁵ Aakumi inanebunu lombok nggween paga wonogwe abok aret, It iya lek o, inombake, Ndi, it mbogut paga inomaawi menggaarak inom, it yi aakumi ndi aakumi o nggween paga menggaarak inom, eeppiyoorak mbake kenok mban eeppiige, Eeke menggerak me, It aakumi nen at eenggi awiirogo pugwi, Ndi, Ti nonggop nduk eekendak o? yinuk, at yogwi, Eeriyak meek o, yinuk, yereegirak.

³⁶ Niniki nambokan agagerak nogo nenaame ari wage ti eyom paga an nabu'me piinok minggim nogo ambinom tiyanak kaawak nduk, nayuk warak lek agagerak nogo, obaane'me eerogo panege, nendage tebek yegerak nogo, wiganinuk nawak nduk, tiyappanege, eereegerak o. Eereegerak me, it ninom wone koongga inom, nawuri nagawan-nagawan inom, nen an ambinom wo'nakwi, aa'nduk wone lengganogo yorage nagagirak nogo ambinom yorage logokit nduk, mippanugwi, eereegwaarak paga nendage abunuk nggwok lombok tiyak yereegerak o.

³⁷ At mbogut paga time endagembogut menggerak nogo, eeke menggerak abok aret abe mban eeke, at eerit nage nogo a'me nggelok mban eerit nage, iniki wogoppakwi iinok tebenogo piige, eeke menggerak me, yogondak an Nebukanetat nen at ayuk wuke, alut eeke, endage tiyappege, eeke agarik o.