Ndaniyen 3 - Ala Wone Peenok Peebi Mbanak

Kugi ogut eerogo mippereegerak wone

¹ Aap endagembogut Nebukanetat nen agugi ogut mbuti emas paga eerogo mippereegerak. Ogut eerogo mippereegerak nogo ti, agi nggorek metet 30 paga wakkage, ndi, ena aru-ogwe metet kenagan paga wakkage, eerogo punuk, o Mbaben kobappaga Ndura time mippereegerak.

² Mippunuk, at Nebukanetat abu'me logonet eeko menggaarak inom, o nggwok pippunuk menggaarak inom, at awuri yi o ndi o unde menggaarak inom, aap endagembogut inom wone koongga inom, aap wu porogo menggaarak inom, aakumi inowak loongga inom, aap aakumi inowak loonggwi abu liirogon ineenu inom, aap aakumi inarum menggaarak nagawan-nagawan inom, abok aret kuwak eerit wa'nuk, ogut eerak nogo alut eekak yogo logorak ale'nggen eeruwak nduk, yorage mbareegi, kuwak ari wogogwaarak.

³ It kuwak ari wogogwaarak ti, aap endagembogut abu'me logonet eeko menggaarak nogo inom, o nggwok pippunuk menggaarak inom, it aap yi o ndi o unde menggaarak nogo inom, aap endagembogut inom wone koongga inom, aap wu porogo menggaarak inom, aakumi inowak loongga nogo inom, aakumi inowak looniyak wone abu ineenu nogo inom, aap aakumi inarum menggaarak nagawan-nagawan nogo inom, abok aret aap Nebukanetat agugi ogut eerogo mippereegerak nogo, alut eeko logorak ale'nggen eeruwok nduk, kuwak ari wogo nogogwaarik, ogut eerak abu'me taati mi'nari wogogwaarak.

⁴ Mi'nari wogo mbareegwa, aap endagembogut ari kenok yoraga ambi nen oone nggwok paga ari logonet, “Yi aakumi ndi aakumi inom, kinanebunu lombok inom, kinoone alitak inom, kit yi o ndi o kuwak ari wogotak abok yi wae. Kit eeko logorak wone lengganak yi, an yokkira o.

⁵ Oone pu eeka trompet nogo oone pu eeko logonet, nggawiiwak mbanak oone inom, nggitat nggwok oone inom, nggitat mbuuluk oone inom, lobale oone inom, ti mendek oone abok aret ari inaruk konenggwi iinok, inowe nendagembogut an Nebukanetat nen nagugi ogut mbuti emas paga eerogo mippigirak yi, abu'me tebe yinuk, ayuk wuko logowak o.

⁶ Ndi, it ambiriluk ambi nen ogut aago yi, abu'me tebe yinuk, alut eeka'lek inogogun worokot iinok, ne ti paga aret kani omoonuk wunuk ari me mbo mambiyaagin, yegerak o.”

⁷ Yorage mbareegi, oone pu eeka trompet nogo oone nggwok eeko logonet, nggawiiwak mbanak oone inom, nggitat nggwok oone inom, nggitat mbuuluk oone inom, lobale oone inom, ti mendek oone abok aret eekwi inaruk konenggo nogogwaarik, it yi aakumi ndi aakumi inom, aakumi inanebunu lombok yi o ndi o nen wogogwaarak inom, yi aap ndi aap inoone alitak wogogwaarak nogo inom, it abok aret aap endagembogut Nebukanetat agugi ogut mbuti emas paga eerogo mippereegerak nogo, abu'me tebe yinuk, ayuk wureegwaarak.

Kani omoonuk wunuk ari me, mambiyareegerak wone

^8-9 Ndi, ti eyom it Mbaben mendek ineebe mande negen nen aap endagembogut Nebukanetat nogo owagam wa'nuk, aap Yakuri mendek meek eerogo piigo logonet, “Ninogoba kendagembogut wa! Kat kendage mondok ki aret logowak o.

¹⁰ Ndi, kat ninogoba kendagembogut nen wone lengganogo wumbege logonet, Oone pu eeka trompet nogo oone pu ari kagak, nggawiiwak mbanak oone inom, nggitat nggwok oone inom, nggitat mbuuluk oone inom, lobale oone inom, ti mendek oone abok aret ari inaruk konenggwi iinok, nagugi ogut mbuti emas paga eekirak yi, abu'me tebe yinuk, ayuk wuko logowak o.

¹¹ Ndi, aap ambiriluk ambi nen abu'me tebe yinuk, ayuk wuke lek worokot wonage kenok, kani omoonuk wunuk ari me eebe mbo mambuurak o, yinuk, yagandak nogo o.

¹² Togop aret me, it aap Yakuri mendek o Mbaben yi awi ndi awi o yime wone lengganogo yorogo logowak nduk, mippiigendak at Tarerak, Metak, Abe'nego nogo perak, kat ninowe kendagembogut wone yagandak ti, it liippunuk, kagugi alut eekwi, kagugi ogut mbuti emas paga eerogo mippegendak nogo it tebe yinuk, ayuk wukwi, eeka'lek ina'me laakot aret wonogwe iigoorak o,” yinuk, yoreegwaarak.

¹³ Yogo mbareegwa, at aap endagembogut Nebukanetat nogo anini mondok alik negen mi'nage logonet, “It Tarerak, Metak, Abe'nego ti, nowagam wogoren wa'nip o,” yoragagerak wogoren wogo mbareegwa,

¹⁴ it yorage logonet, “Kit Tarerak inom, Metak inom, Abe'nego inom, kit yi, an nagugi inalut eekwi, ndi, an nen ogut mbuti emas paga eerogo mippigirak nogo abu'me tebe yinuk, ayuk wukwi, eerulik ti abet aret a?

¹⁵ Yogondak oone pu eeka trompet nogo oone pu ari kagak, nggawiiwak oone inom, nggitat nggwok oone inom, nggitat mbuuluk oone inom, lobale oone inom, ti mendek oone abok aret ari kinaruk konenggwi kenok, ogut eerak abu'me tebe yinuk, ayuk wukwi kiinok ti, abu op aret o. Ndi, abu'me tebe yinuk, ayuk wuka'lek kiinok perak, ne ti paga aret kineebe waganogo kani omoonuk wunuk ari me mbo mambinagagin o. Mambinagage neenok, kugi ngge nen kinagap ndarigin? Lek aret o!”

¹⁶ Yorage mbareegi, it Tarerak, Metak, Abe'nego nen aap endagembogut Nebukanetat nogo yogo logonet, “Ninogoba kendagembogut Nebukanetat wae. Nit ndogop nduk eekoorak o, yinuk, ninaana'le mbanggolaagun lek o.

¹⁷ Kani omoonuk wunuk ari me time mambinanege keenok, nit alut eeko monggoorak ninogoba Ala nogo kat keenggime nen ninagap ndarogo wumbinani woraagin o.

¹⁸ Ndi, wumbinani woraagin lek kagak kunduk, nit kat kagugi inalut eekwi, ndi, mbuti emas paga ogut eerogo mippegendak ti, abu'me tebe yinuk, ayuk wukwi, eerugun mondok lek me, kat ninogoba kendagembogut keenu a'nok nduk yokkogo o,” yinuk, yoreegwaarak.

¹⁹ Yogo mbareegwa, at aap endagembogut Nebukanetat nogo aap Tarerak, Metak, Abe'nego it paga anini mondok alik negen mi'nage, enete aagi alik negen eerogo pege, eeke logonet, kani kunik omoonuk mbuuluk kogo menggaarak kwe, kani omoonuk kogolik abu alik negen we ne ambit wunuk togon nengge menggim time mbo mambiyaawak nduk yoragagerak.

²⁰ Yoragagerak eeko mbareegwa, at awuri ineegin warak inarilaakwi lombok ineebe mande negen nen aap Tarerak, Metak, Abe'nego keele maarogo kani omoonuk alik negen wunuk ari me mbo mambiyaawak nduk yoragagerak.

²¹ Yorage mbareegi, it ineebe kenagan nogo yum nggorek inom, inakom yum inom, inabetagi perenak inom, inayum eegu alik inom, li'luk eerak iigak, keele maarogo kani omoonuk abu alik negen wunuk ari me nogome mbo mambiyareegwaarak.

²² At aap endagembogut nen kani omoonuk abu alik negen eerogo puurak oone omaawi paga yoragagerak nogo, eerogo pogo mbareegwa, it aap ineegin warak nogo nen Tarerak, Metak, Abe'nego kani omoonuk wunuk ari me nogome mambiigwi me, it aret kani wiyak togon nunggugwaarak.

²³ Ndi, it ineebe kenagan Tarerak, Metak, Abe'nego nogo, keele abu maarak me kani omoonuk wunuk ari me enggela'me nogome yobok togon wambeegwaarak.

²⁴ Wambeegwaarak nogo kani nengga'lek mbareegwa, aap endagembogut Nebukanetat nogo aganak ngginuk yinuk, pilak togon mi'nage nagagerik, it at inom wone koongga nogo yorage logonet, “It aap ineebe kenagan ineenggi-iniyok keele maarogo kani omoonuk wunuk ari me mambiigoorak nogo lek a?” Yorage mbareegi, it nen, “Ninogoba kendagembogut wae. Yagandak ti, abet aret o.”

²⁵ Yogo mbareegwa, at nen it yorage logonet, “Togop aret kwe, kani omoonuk wunuk ari enggela'me aap ineebe 4 nugwi kwe, keele maarak lek we nugwi iigak ineebe kani nengga'lek nugwi, ndi, ambi kugi etenggen kwak nege, eekwi yi, pegiyaanip o.”

²⁶ Yorage nagagerik, at Nebukanetat nogo kani omoonuk alik negen wunuk ari me tungga paga koorok taati ari nanuk, oone nggwok paga yorage logonet, “Kit Tarerak, Metak, Abe'nego wae. At Tiyanak Lombok Menggerak Ala ayeloman mini kit yi, wundi wa'nuk, neya woraanip o.” Yorage mbareegi, Tarerak, Metak, Abe'nego nogo kani omoonuk wunuk ari enggela'me time nen ka wundi wogogwaarak.

²⁷ Ka wundi wogo mbareegwa, aap endagembogut abu'me logonet eeko menggaarak inom, o nggwok pippunuk menggaarak inom, it aap yi o ndi o unde menggaarak inom, aap endagembogut inom wone koongga inom, abok aret kuwak ari wa'nuk, it aap ineebe kenagan nogo kani omoonuk nen inagabolo ti'mondok eerogo piige, ineeruwak ambiriluk ambi kani nengge, inayum nggorek yirik nogo kani nen yuwik-mbawik eerogo pege, ineebe paga kani nen inobari eerogo pege, eerulik ineebe menggaarak ndak-ndak inaani aret wonogwe iyareegwaarak.

²⁸ Iigo nogogwaarik, aap Nebukanetat nogo nen it kuwak ogogwaarak nogo yorage logonet, “It Tarerak, Metak, Abe'nego nogo iniki inogoba Ala oba panggonak menggaarak me, An nagugi ogut aago ayuk wuriyak o, yinuk, wone lengganogo wumbigirak nogo paga it nen yogo logonet, Nit at agugi alut eerugun lek o. Ninogoba Ala mban alut eekwi, at abu'me mban tebe yinuk, ayuk wukwi, eerugun o, yinuk, kambuurak inagabiti lek aret puk agaarak paga kani omoonuk wunuk ari me nen at ayeloman mini yi, inagap ndarogo wumbiya woraawak nduk, inogoba Ala nen malayikat ambi nappi wagaarak me, it inogoba Ala endage tiyappogo logowok o.

²⁹ It aap Tarerak, Metak, Abe'nego inogoba Ala nen it inagap ndakerak kwak kugi nen ambi togop eeriyak meek me, aap ambiriluk ambi kit yi aakumi ndi aakumi kinenggela'me nen, kinanebunu lombok kinenggela'me nen, kinoone alitak yogo monggotak kinenggela'me nen, it inogoba Ala ti, meek eerogo pugwi iinok, ineebe mondok nibik-nobak eerogo piigwi, inawi wurik minogo nappugwi, eeriyak o, yinuk, an Nebukanetat nogo nen aret wone yi lengganogo wumbigi o,” yinuk, yoragagerak.

³⁰ Yorage nagagerik, it Tarerak, Metak, Abe'nego nogo tiyanak logonet, o Mbaben nogome wone lengganogo yorogo logowak nduk, mippiyareegerak.