Ndaniyen 12 - Ala Wone Peenok Peebi Mbanak

O age yobok paga eeriyak wone

¹ Ari nagagerik, at aakumi inete kwak nogo nen ambinom ari logonet, “Ne ti eyom paga it aakumi kat mendek inarum waka endage abu tiyanak nagawan Mikayen nogo mi'narigin o. Mi'nage kenok, aakumi aaninggin-paaninggin mondok alik negen inoba kwi'narigin o. Aaninggin-paaninggin inoba kwi'narigin nogo ti, yi aakumi ndi aakumi wiganit wundi wogo logonet, inanebunu awo kin aga'lek kuli nen nok, at mi'naremenggerak kuli, aaninggin togop inoba kwi'nageelik kwe, ti eyom paga aret kwi'narigin o. Togop kwe, ne ti eyom paga it aakumi kat mendek Ala ambuku paga inendage liiru mbanak wonage kenok inagap ndarigin o.

² It aakumi apit aago kambemenggaarak nggween me nogo yugwi nogo, ineenik a'nuk mi'narugun o. It ando mondok-mondok ineenik logowak nduk mi'nogwe, ndi, ando perak, inenggali mbakak mondok-mondok yagan wako logowak nduk mi'nogwe, eerugun o.

³ It aap iniki warak logonet eerit nugwi nogo ti, o mbogut paga eya lombok aago wonage kogo monggo kwak mondok-mondok wonogwe, ndi, it aap aakumi apit aret obeelom mban eeko logowak nduk, wone liirogon mamuninako logomenggaarak nogo ti, laaluguragan pindan-pindan ari menggi kwak, it mondok-mondok togop aret wonogwe, eeko logogun o.

⁴ Togop aret eeko logogun kwe, kat Ndaniyen perak, wone an yokkigirak mbuku pirik-perek aago paga liiru mbanemenggendak abok aret ti, lambunogo amburu nabenogo punuk, aakumi yoraga'lek keegak, o age yobok kuli aret ari woraagin o. Wone ti, kiraarak kagak, it aakumi apit aret, Yi age yi, nineenu aruwok lak, yinuk, yi awi ndi awi kwaarit namenggaarak kagak kwe, kiraarak mban logowak o,” yinuk, yo'nereegerak.

⁵ Ti yo'nege kage nagagirik, an Ndaniyen nen nenegen pe'na'nuk, aap ineebe mbere at ambi niyo yibagan pa'nggwe mi'ndak wonage, ndi, at ore ambi niyo enebagan pa'nggwe mi'ndak wonage, eekwi iyareegirak.

⁶ Iige me, at ambi mi'ndak wonage nogo nen at alik ambi ayum yawenak yirik niyo eneerime pa'nggwe wonage nogo, yoge logonet, “Iya tit ariyak yi nogo, a'me ari waga'lek kagak, ne mande ari nagin o?”

⁷ Yoge mbaki, at ayum yawenak yirik niyo eneerime pa'nggwe mi'ndak wonage nogo, eenggi peenok-peenok imbirak mbogut paga nippunuk, at mondok-mondok eenik menggerak endage kumbunuk, kumbuk mbangge logonet, “Ti eerigin nogo ti, ne ambi eyom eeke, ti'nuk, ne mbere eyom eeke, eeppunuk, ne ambi eyom oolo eeke ti paga aret arigin o. It aakumi alik leenak inomaawi wonogwe nogo aaninggin-paaninggin inoba piyamenggaarak paga inomaawi lek ari nage eyom iya tit eeriyak ti abok aret a'me nggelok yi woraagin o,” yoge konenggirak.

⁸ At ari nogo an naruk konenggirak aret kwe, “Alom ngge?” nduk, ari nogo liippuulik me, an nen at yoge logonet, “Nogoba o. O age yobok eeriyak nogo ti, a'me nggelok yi wage kenok, nonggop arigin o?”

⁹ Yoge mbaki, at nen an yo'nege logonet, “Ndaniyen wae. Wone yokkigirak mbuku paga liiru mbanak yi, lambunogo amburu nabenogo punuk kiraarak kagak o age yobok kuli aret ari woraagin me, yogondak we aret nak o.

¹⁰ It aakumi apit aret iniki abe koonak wonogwe iyaawak nduk eeppiigwi, iniki kikak naka'lek iyaawak nduk eeppiigwi, iniki kole aruwak nduk inabut mbanggwi, eekwi iigak kwe, it maluk eeka nen perak, maluk aret eerit nogo logogun o. It maluk eeka ambiriluk ambi nen wone yi liippugun lek kwe, it aap iniki warak nen perak, wone yi, yelok kaagun o.

¹¹ Ala ake ambinom warogo wogoriyak mage o, yinuk yoramenggerak kuli nen nok, Ala awi wurik maluk eerogo puurak mendek ogole warak lombok ambi mippuurak kuli ti, ne seribu dua ratus sembilan puluh aret arigin o.

¹² Wone ti agan nage kagak, ne seribu tiga ratus tiga puluh lima ariyak nogo, yubuni nawak nduk, aap ambi nen iniki kwippunuk tokkage kenok, ale'nggen aret mbake logogin o.

¹³ Ndi, kat perak, liippunuk eerit nage keegak, age wobok ari woraagin me, kiniki ugun nak o. Yonggonggologo menggam yonggonggolage logomenggendik, ti'nuk, o age yubuni wage eyom paga kat ambi eeppagarak kake punik nogo kolaamunggun nduk, mi'narumunggun o,” yinuk, yo'nege kagagirak.