Ndaniyen 10 - Ala Wone Peenok Peebi Mbanak

Ndaniyen niyo Tigirit aa'nggi paga abinggaanggo kagagerak wone

¹ At aap Koreti aakumi Peritiya mendek inowe endagembogut a'nuk, wone lengganogo yorage kagak tahun mbere eeppunuk, ambi eeke ti paga, at Ndaniyen, endage ambi Mbelatatat toonak nogo, at Ala eeriyak ambi abinggaanggo paga yoreegerak. Wone ti abet aret yoreegerak kwe, aaninggin lombok kenok, at Ndaniyen nen, “Nonggop kagi?” yinuk, iniki koonit nage me, “Alom ti nduk, kagandak o,” yinuk, abinggaanggo paga yoreegerak nogo yi aret.

² Nabi kage nagagirik, ne ti eyom paga an Ndaniyen nayum maluk mendek yippunuk, niniki puru aago kagak tamban kenagan eereegirak.

³ Ti eeke logonet, mbi ombat obeelom larak ambi nengge, wam enggaanggum larak inom, anggur amburu inom, nambeme iluk ambi manake, nggiraanak nagabolo paga ambit iluk ambi eeke, eeka'lek tit wonage neegak, tamban kenagan eereegirak o.

⁴ Eeke nagagirik, tut aa'nduk penenak tanggal 24 tahun ti paga an niyo nggwok Tigirit aa'nggi paga mi'ndak wonage logonet,

⁵ nuut pila ari nagagirik, aap ambi ayum abu yawenak lombok yirik agabee'le mbuti emas at mendek paga mban eerak nggero-nggero aago wonage kagagirak.

⁶ At eebe ti, yugum mee'nggen abinak pindan-pindan eeke menggi kwak eeke, enete ti, o yabok eeke kwak eeke, enegen ti, ndi wuninik kwak eeke, eenggi-iyok ti, mbuti tembaga maakwi iinok abigan pinda ari menggi kwak eeke, ndi, oone ari ti, aakumi ambik aago inoone yogo mengga kwak ari, eeke kagagirak.

⁷ Nabinggaanggo kagagirak nogo ti, an Ndaniyen nalik aret kagagirak. It aap an ninom taati wonogwe nogo koolik kwe, nalik mban kage neegak, it apit aret inaganak nggwok lombok nuk iranet noorak mban inoba kwi'nage mbareegi, kumaa'narit nogogwaarak.

⁸ Kumaa'narit nogo mbareegwa, nalik taati logonet, nabinggaanggo abu iya lombok kage me, nogut nggigik ari logonet, nomaawi lek eerogo panege, nagap nggilaame nek togon eerogo panege, eeke kagak, neebe abu ndeyak lombok eerogo paneegerak o.

⁹ Abu ndeyak eerogo paneegerak taati wonage me, at oone ari naruk koneneegirak. At oone ari ti, liirogon naruk konengge me, nambuluk yipuk nenete wanduk nggween paga ngginnagagirak.

¹⁰ Ngginnagagirak wonage me, at ambi nen eenggi pi'nake nagagerik, neenggi-niyok nggween paga yarogo paninuk,

¹¹ an yo'nege logonet, “Ndaniyen wae. At Ala nen iniki kunik lombok eekkake menggerak me, wone an yokkege yi, liippege logot o. Wone yi, yokkirikit nduk nappani wagaarak keya wagarak me, aret mi'naru o.” Yo'nege mbareegi, naganak wake kagak mi'nagagirak.

¹² Mi'nage mbareegi, at nen an yo'nege logonet, “Ndaniyen wae. Kagabiti mbake ti mage o. Kat ne aa'nduk lombok, Nabi kagarak nogo alom neenu arikit lak, ao, yinuk, kiniki koombunuk kogoba Ala enggaanom paga kiniki tebeppatinuk tamban eekendak nogo, at muk aruk konenggerak me, tamban eekendak onggo lik togon aret yokkiriyak nduk keya wagarak kwe,

¹³ aakumi Peritiya mendek inarum waka at nagawan nogo nen, Noorak lek o, yinuk, naru non mbanogo panege kagak, nogo 21 yit wagarak o. It aakumi Peritiya mendek inarum waka at nagawan ti'nen yilunogo panegerak wonage me, it abok inarum waka inowe tiyanak Mikayen nogo neya wage nagaarik, yeenggwa nege mbaki, wagi o.

¹⁴ Ndi, kabinggaanggo kagandak nogo ti, o age yobok ti eyom paga ariyak kagandak me, o peebi it aakumi kat mendek eeppiyoorak mbininogo yokkirikit nduk, keya wagi o.”

¹⁵ Wone ti yo'nege kagak, nena nggween paga wandunik noone-nambe yuurak meek puk aret wonagagirak.

¹⁶ Puk mban wonage neegak, at aakumi inete kwak ambi nen eenggi nderogon nambe pigaganeegerak paga nambe paa'nage mbareegi, noone yuurak eeke logonet, at nowagam mi'ndak wonage nogo yoge, “Nogoba o. An nabinggaanggo kagarak ti paga nen neebe andi-pandi negen eerogo panege, nomaawi kunduk lek eerogo panege, eekerak o.

¹⁷ Nomaawi lek eerogo panege logonet, neebe ndeyak lombok eerogo panegerak me, nogoba an kayeloman yi, nimbirak wone nonggop togon yuurak. Meek aret o.”

¹⁸ Yoge mbareegi, at aakumi inete kwak nogo nen an ambinom neebe pi'nake nagagerik, nomaawi eerogo paneegerak.

¹⁹ Nomaawi eerogo paninuk yo'nege logonet, “At Ala iniki kunik eekkake menggerak yi wae. Kagabiti mbarugun o. Kiniki ugun kale'nggen paga wonage, kiniki mondok nu'lek eeppunuk komaawi eekkolage, eeke logot o,” yinuk, awo yo'nege kagak, nomaawi aret age mbareegi, at yoge logonet, “Nogoba o. Nomaawi eerogo panegendak me, wone ti, yo'niru o,” yinuk, yoreegirak.

²⁰ Yoge mbareegi, at nen an yo'nege logonet, “Nonggop nduk an keya wagarak nogo yelok kagan ilik? An logonuk lek niyokan aakumi Peritiya inarum waka nagawan nogo, nimbirak wim eeri nage yi aret me, nage neenok, at aakumi Yunani inarum waka nagawan nogo woraagin me,

²¹ an naga'lek logonet, abe wone mbuku paga liiru mbanak nogo aa'nduk yokkiri o. It aakumi inarum waka nagawan mbere ti, eeriyak koonggwi nogo tebenogo piiga an yeenggwa niri wogwe lek, it kat mendek inarum waka nagawan Mikayen nen mban yeenggwa niri wage menggerak me,