Nappiigak 6 - Ala Wone Peenok Peebi Mbanak

Yeenggwaaragak ineebe 7 leeninabeegwaarak wone

¹ O ti eyom paga at oone woorak nduk ambi nabek unggwagak mban eeko logonet, it aap Yakuri mendek kwe, Yunani wone yogo menggaarak nogo nen, “Ko'lu-kii'me mbi tumburirogo logonet, nit ninagalomini kumi togwe nonggop nduk mbi wogoraga'lek mbo piigo ogotik?” yinuk, it Yakuri inaworak nogo inom neebi-keebi yogo nogogwaarak.

² Togop yogwe nogo it aap 12 inaruk konembunuk, Yetut oone waganggwi abok aret kuwak eeppiigo nogogwaarik, yorogo logonet, “Noreewi o. Nit Ala wone mamunggirogwe nogo mbo punuk, mbi wokkirogo logorak meek me,

³ it aap Aberiniki inikime mondok liinik iniki warak logonet yogo menggaarak kineenu kero, kinenggela'me nen aap ineebe 7 leenogo mippiyaanip o.

⁴ Mippiyamonggotak wone yi, it nen mban koonggwi iigak, nit nen ta, Ala wone mban yorogwe, tamban mban eekwi, eeko logogun o,” yinuk, yorogogwaarak.

⁵ Yorogogwaarak it aakumi ambik kuwak ogogwaarak nogo konembunuk, “Op aret yogotak o,” yinuk, leenogo mippiyareegwaarak nogo, inendage yi aret. Aap iniki abet mbareegerak paga yungguppegak eeke logolik, Aberiniki inikime mondok liinik Tepanut inom, Piliput inom, Porokorut inom, Nikanot inom, Timon inom, Paremenat inom, aap endekem mendek awi alom Andiyokiya wonagagerak kwe, it Yakuri inawone woppunuk it eekwi inom eerit nagagerak, Nikolawut nogo inom,

⁶ leenogo piigo nogogwaarik, it nappiigak nogo inowagam piya wogo mbareegwa, inanobak tebembiinok tamban eeginabeegwaarak.

⁷ Ndi, Ala wone nogo nggwok aret wiganinuk nage kagak, o Yerutalem time it at oone woorak nduk ambi nabek unggwagak mban eeko logonet, ambik aret ogwe, ndi, it Ala unde nogo kunduk ambik aret, “Wone waawi o,” yinuk, abet mbakwi, eereegwaarak.

Tepanut keele maareegwaarak wone

⁸ At Tepanut nogo Ala nen ale'nggen alik negen oba pege, omaawi ambik eeppege, eeke mbareegi, eerubok mendek eeke, ineenu ariyak inagabiti warak mendek eeke, eerit nage kagak kwe,

⁹ it Yakuri mendek o Kirene nen, Alekandiriya nen, Kilikiya nen, Atiya nen, it Yakuri kuwak eeko menggam endage Wondet Eerogo Pinaneegim tooneegwam nogome kuwak eeri wogo nogogwaarak nogo nen, Tepanut inom wone wareegwaarak.

¹⁰ Inom wone wareegwaarak kwe, at Tepanut nogo Aberiniki nen nggaganogo yoge kagak iniki warak logonet, yoragagerak paga it nen onggo yoriyak meek age mbareegi, puk ogogwaarak.

¹¹ Wone onggo yoriyak meek age mbareegi, it ti nen, “At Tepanut ti, Ala inom, Muta inom, miyuk-meya eerogo piige kogoorak o,” yinuk, agan nogo logowak nduk, onggo wogorogogwaarak.

¹² Wogorogo mbareegwa, wone ti, agan it aakumi inom, inanggok inom, Ala wone liiru mbanak unde inom, inikime manabi wogo mbareegwa, inanini nen aap Tepanut nogo piganok, aap wone amburu mbangga inowagam pi nogogwaarak.

¹³ Pi nogo mbareegwa, it pilit karerogo yoraawak nduk mippiyareegwaarak nogo nen aap wone amburu mbangga yorogo logonet, “Aap yi, ko'lu-kii'me puk ageelik Ala awi wurik magame inom, Muta nen liiru mbaneegerak wone nogo inom, meek agago pege kogoorak o.

¹⁴ At aap yi nen ari logonet, Yetut Nataret mendek nogo nen Ala awi wurik yi, minogo pege, ndi, Muta lengganninabeegerak wone ninitok kunik eeko monggoorak nogo lek eerogo pege, eerigin o, yinuk, ari kogoorak o.”

¹⁵ Yorogo mbareegwa, it wone amburu mbanggo menggam kwi'ndak wonogogwaarak nogo abok aret nen, at Tepanut eebe inigen pippak ugo logonet, at enete ti, malayikat etenggen kwak kumbunuk wonage kogogwaarak.