Nappiigak 4 - Ala Wone Peenok Peebi Mbanak

It Peterut Yaya imbirak inawone mbaneegwaarak wone

¹ Peterut Yaya imbirak it aakumi nogo awo yorogwe iigak, it Ala unde inom, Ala awi wurik me arum waka inowe nogo inom, it Taruki mendek inom, wogogwaarak.

² “At Yetut aakumi kanggo menggam nen eenik eerogo mippegerak o,” yinuk, Peterut Yaya imbirak nen aakumi kanggwi iinok, ineenik agago mippiyoorak wone nogo mamunirogo mbareegwa, inanini nen

³ ineebe piginako nogogwaarik, wogoren nanuk, o kiip age mbareegi, ko'lu nen yoraawok nduk aap keele maarogo mambiigo menggam mambiyareegwaarak.

⁴ Ndi, it wone yorogwe iigak koneneegwaarak nogo aap mban ineebe ambik lima ribu aret abet mbareegwaarak.

^5-6 Nogo yippunuk, ko'lu it Yakuri inoweewi inom, inanggok inom, it Ala wone liiru mbanak unde inom, at Ala unde inowe nggwok Kanat inom, Kayapat inom, Yaya inom, Alekandet inom, Ala unde inowe nggwok nogo owe-awot ando inom, abok aret o Yerutalem kuwak eeppunuk,

⁷ Peterut Yaya imbirak inowagam piya wogo nogogwaarik, yorogo logonet, “Kit nen aap obeelom eekotak nogo, ta endage paga eekotak? Ta omaawi paga eekotak?” yinuk, ineegwa'me waganeegwaarak.

⁸ Ineegwa'me waganggo mbareegwa, at Peterut nogo Aberiniki inikime lik ari mbareegi, yorage logonet, “Kit aakumi Yakuri inarum monggotak inom, ninogobamini inom, wone ambi yokkira o.

⁹ Aap iyok maluk abuwa mbako logonet, obeelom eekoorak nogo ti, nonggop eerogo obeelom eekotak o? yinuk, kit yogondak nineegwa'me waganggwi ti,

¹⁰ kit inom, aakumi Iterali mendek abok inom, kineenu arubagip nduk alom liirogon yokkira o. At aap obeelom agaarak kinowagam mi'ndak wonage yi, at Yetut Keritut Nataret mendek kit eyo aago paga nabenogo wako mbakop, Ala nen kambunuk nogo menggam nen eenik agago mippegerak nogo endage paga abu obeelom agaarak o, yinuk, yokkirogo ogoorik o.

¹¹ Ala nen ari logonet, It yugum paga o wuka nen, O wuko logonet, yugum ambi mbo pereegwaarak nogo, Yugum ogowa ndoonnaga o, yinuk, yereegerak ti, at Yetut aret nduk yereegerak o.

¹² It aakumi yi awi ndi awi o nggween paga yime menggaarak abok aret, Aap yi nen aret kinagap ndakkinabigin o, yinuk, endage ambi kunogo yo'niroolik o. Ata, at Yetut alik nen mban kinagap ndakkinabigin o, yinuk, yo'niragagerak o.”

¹³ Yorage mbareegi, it kuwak ogogwaarak nogo nen Peterut Yaya imbirak nogo, tekola eerulik aap weelek mendek wonogogwaarak kwe, inagabiti lek logonet, yorogwe yelok iigo nogogwaarik, “Yetut inom nugu nogogwaarak yi aret iigo o,” yinuk, pi waganabeegwaarak.

¹⁴ Aap obeelom agagerak nogo inowagam mi'ndak wonage kogo nogogwaarik, “Wone onggo ngge yoraawi?” yinuk, puk ogogwaarak.

¹⁵ Puk ogo nogogwaarik, “Wone amburu mbanggo menggam nen endekem wundi nanip o,” yorogo mbareegwa, wundi nogwe iigak, inalik nen wone mbanggo logonet,

¹⁶ “Aap yi, nonggop eerogo piyaawi o? Eerubok mendek eekaarak nogo it Yerutalem menggaarak abok aret ineenu agaarak me, nit nen, Obeelom eerulik, yuurak ti, meek o.

¹⁷ Ata, nggwok paga wiganinuk nookwak, Aap ti, endage kumbunuk ambinom yoranet nugu logorak mondok mage o. Ambinom yoranet nugwi kiinok, maluk eerogo pinagagun, yoraawok o,” yinuk, yereegwaarak.

¹⁸ Yogo nogogwaarik, wiirogogwaarak wogo mbareegwa, yorogo logonet, “At Yetut endage ambinom yorogwe, mamunirogwe, eerit noorak mondok mage o,” yinuk, mberirogogwaarak.

¹⁹ Mberirogo mbareegwa, Peterut Yaya imbirak nen it yorogo logonet, “Nit Ala oone koneniyak ilik, kit kinoone koneniyak a? Ala enggaanom paga kit mban kooninip o.

²⁰ Ninaruk konenggwi, ninigen kogwe, eekoorak wone ti, yoraga'lek puk ariyak meek ee'ninake me, yorogo logogun aret o.”

²¹ Yorogo mbareegwa, aap nogo obeelom agagerak kenok, it aakumi abok nen Ala wogoppugwi iigo nogogwaarik, inagabiti nen, “Alom nano paga yilunogo maluk eeppiyaawi o?” yinuk, we inagabiti mbaruwak nduk inoone omaawi paga mberirogo nogogwaarik, keele piinogo wumbiyareegwaarak.

²² At aap eerubok mendek agago obeelom eereegwaarak nogo, ndarak kagak tahun 40 aret eereegerak.

Ala apuri nen tamban eereegwaarak wone

²³ Piinogo wumbiigo mbareegwa, Peterut Yaya imbirak nogo inoreewi wonogwe me nogo nogogwaarik, it Ala unde inoweewi inom, it aap inanggok inom, nogo nen yorogogwaarak wone nogo mbininogo inoreewi yorogogwaarak.

²⁴ Yorogwe nogo it inaruk konenggo nogogwaarik, it inom iniki lambunna'nuk tamban eeko logonet, “Kaliku ninogoba Ala o. Mbogut-nggween inom, yi yenggenak laut inom, yi mendek ndi mendek abok kat nen mban wakkagagindak o.

²⁵ Ninombo Ndawut kat kayeloman nogo Aberiniki inikime lik ari mbareegi, kat Ala yoge keegak at nen ari logonet, It yi aakumi ndi aakumi nanini-kanini agan nogo logonet, maluk eerogo piinet nugwi, Aap inanebunu lombok we aanom warogo wone kote koonit nugwi, Eekwi ti, Nonggop nduk eeko agaarik o,

²⁶ At ninogoba Ala tebenogo pugwi, At Amburu Eerogo Mippereegerak nogo maluk eeppugwi, Eeruwok nduk, Aap inendagembogut yi o ndi o nen pipuk eekwi, Aakumi inoweewi nagawan-nagawan kuwak eeppunuk, wone koonogo pugwi, Nonggop nduk eeko agaarik o?

²⁷ Yereegerak nogo, o kota yime it Keroret togon, Pondiyut Pilatut togon, it endekem mendek inom, it Iterali mendek inom, nen at kikak nakeelik alik leenak, kat kayeloman leenogo mippereegindak Yetut nogo, at waruwok nduk abet aret o kota yime kuwak eekaarak o.

²⁸ Kat keenggi omaawi paga yi eekak ndi eekak eeriyak aa'nduk koonogo pereegindak nogo, eeruwok nduk eekaarak o.

²⁹ Ninooriyak nduk eekwi yi iyet o, ninogoba. Niige logomenggendik, ninagabiti lek logonet, kat koone yorogo logowok nduk, nit kayeloman mini niniki nu'lek eerogo pinanu o.

³⁰ It kugi andi wonogwe iinok, lek aruwak nduk keenggi piginabu o. Ndi, at kikak nakeelik alik leenak menggerak kayeloman Yetut nogo endage paga eerubok mendek inom, ineenu ariyak inagabiti warak mendek inom, eeke menggerak nogo, nit eeruwok nduk eeppinanu o,” yinuk, tamban eereegwaarak.

³¹ Tamban eeko mbareegwa, o it wonogwe nogo nuk ari logonet, Aberiniki inikime lik yi unggwage mbareegi, inagabiti lek logonet, Ala wone yoranet nugu nogogwaarak.

Ala apuri iniki lambunik logonet eeko nogogwaarak wone

³² It abet mbareegwaarak nogo abok aret iniki ambit eeppunuk wonogo logonet, inamindik-inamendek nogo, “Yi kat mendek o. Yi an mendek o,” yaga'lek, we, “Nit abok ninamendek o,” yogo nogogwaarak.

³³ It nappiigak nogo nen, “Ninogoba Yetut eenik a'nuk mi'nagaarak o,” yinuk, inagabiti mbaka'lek inoone omaawi paga wone nogo paganogo yoranet nogo nogogwaarak. Yoranet nogwe iigak, Ala nen ale'nggen ambik inoba piige nagagerak.

^34-35 It inanggween eege, it inawi wurik eege, onggo nggerembogo nagaatik, wu nogo it nappiigak inowagam pi nagaatak me, it ambi inamendek lek kenok tumburirogo nogogwaarak paga it inamendek lek ambi logolik o.

³⁶ Togop eekwi wonogwe me, aap Lewi mendek ambi endage Yutup, awi Tipurut mendek me, it nappiigak nen endage ambi Mbaranabat yogo nogogwaarak. Nit ninoone paga endage ti, “Iniki Yanggongga o,” yogo monggoorak.

³⁷ At aap nogo anggween yabu yake menggim ambi wonage me, onggo nggerengge nagagerik, wu nogo wonok it nappiigak inowagam pi wagagerak.