Nappiigak 3 - Ala Wone Peenok Peebi Mbanak

Peterut nen aap iyok obeelom eereegerak wone

¹ Ne ambi paga o kiyoma oonegen 3 paga tamban eeko menggaarak me, tamban eeruwok nduk, Peterut Yaya imbirak Ala awi wurik me nogogwaarak.

² Ala awi wurik tungga'nggi endage, Obeelom, tooneegwam nogome aap ambi endop maluk nda'nagagerak nogo nen it aakumi Ala awi wurik me unggwogwe iinok, ambe nggino yorage logowak nduk, ko'lu-kii'me wonok pi nagak mban eeko nogogwaarak me, ne ti eyom paga muk pi nogogwaarak time wonage me,

³ it Peterut Yaya imbirak Ala awi wurik me unggwogwe enegen iige nagagerik, “Wu wo'ninip o,” yinuk, ngginooragagerak.

⁴ Ngginoorage mbareegi, Peterut Yaya imbirak nen aap nogo inigen pippak ugo logonet, Peterut nen, “Kenegen pe'niyet o,” yoge mbareegi,

⁵ “Nano wo'nirimengga?” yinuk, enegen pegiyareegerak.

⁶ Enegen pegiige mbareegi, at Peterut nogo nen, “Ninawu mbuti perak inom, emas inom, abu lek aret kwe, an unde minggirak ti, ambi wonage me, wokkiri o,” yoge nagagerik, “At Nataret mendek Yetut Keritut endage paga mi'na'nuk nege logot o.”

⁷ Yoge nagagerik, at Peterut nogo nen eenggi abe'nggan pigogo awo mippege kagak, aap nogo iyok inom, andelen inom, mondok omaawi age mbareegi,

⁸ pilak togon mi'nage nagagerik, nogome nege-wege eerit nege nagagerak. Nege-wege eerit nege nagagerik, ku'mbo wanggak agan Ala alut eerit Peterut Yaya inom Ala awi wurik me unggwi nagagerak

⁹ Ala alut eerit ku'mbo wanggak agan nege aakumi abok aret inigen kogo nogogwaarik,

¹⁰ “Aap yi, Ala awi wurik me tungga'nggi endage, Obeelom, tooneegwam nogome logonet, ambe nggino ari nagaarak nogo obeelom agaarak yi, iya!” yinuk, pi wareegwaarak.

Peterut nen Ala awi wurik me Ala wone yoragagerak wone

¹¹ At aap nogo nen Peterut Yaya imbirak pippiirogo wonage me, it aakumi abok Ala awi wurik awe aago endage Talomo yogo menggam nogome puu'nuk inowagam ari wogo logonet, “Wi!” yinuk, pi wareegwaarak.

¹² Kuwak ari wogwe nogo at Peterut enegen iige nagagerik, it yorage logonet, “Kit aap Iterali mendek yi wae. Aap yi agaarak ti, nonggop nduk pi wako ogotik? Nit obeelom eeko monggoorak paga a, ninomaawi paga a, aap yi obeelom eekoorak me nduk, kinigen pe'niigo ogotik ya?

¹³ Ninombomini Abarakam inom, Itak inom, Yakup inom, inogoba Ala ayeloman Yetut nogo, at Pilatut nen teppuurak mbake kagak, kit nen, At yi, nineebi o, yinuk, waruwak nduk, wogorogotak kwe, Ala nen muk tiyappegerak o.

¹⁴ At Kikak Nakeelik Iniki Abe Koonak Menggerak nogo, Nineebi o, yinuk, obaane'me aap inooka ambi teppuwak nduk yogotak nogo, kit aret o.

¹⁵ Nineenik ee'ninake menggerak alom nogo at aret kagak wakotak kwe, Ala nen kanggo menggam nen eenik agago mippegerak nogo ninigen kogoorak me, paganogo yokkirogo ogoorik o.

¹⁶ Yetut nen eeriyak op o, yinuk, niniki at oba panggombunuk abet mbakoorak nogo paga aap kit kineenu kinigen kogo monggotak yi nogo, obeelom agago omaawi eeppegerak wonage o. Yetut nen eeriyak op o, yinuk, abet mbakoorak paga aret kit kinenggaanom at abu obeelom agaarak kinom wonage yi aret o.

¹⁷ Ai, noreewi. Kinoweewi kinom eekotak nogo ti, kobak logonet eekotak an neenu aret o.

¹⁸ Maan Ala nen ari logonet, An leenogo pereegirak Keritut nogo, andi-pandi agago yagan warigin o, yinuk, yereegerak nogo, a'me aga'lek kagak it aap Ala yorage kagak yoraga nogo, yorage mbareegi, yorogo nogogwaarak nogo, kit eekotak paga a'me lik yegerak me,

¹⁹ kinogoba Ala nen kit kinomaluk lek eerogo pinagage paga kiniki ale'nggen logonet, ugun tayenak logobagip nduk, kiniki koombunuk kinomaluk mbo pinip o.

²⁰ Ti eekwi kiinok, kinake leenogo pereegerak Keritut nogo ti, Yetut aret me, nappi woraagin o.

²¹ O maan togon at Ala nen, Togop eerigin o, yinuk, at oone yoraga abu alik leenak nogo, yorage kagak yorogo nogogwaarak nogo, a'me lik yuwak nduk, at Ala nen yi mendek ndi mendek abok aret alik ngget mendek awo eeka'lek logonet, at Yetut mbogut paga time aret logogin o.

²² At Muta nen ari logonet, Kinogoba Ala nen an nappani wagagi kwak, aap Ala nen yoge kagak yokkiraga ambi kit mendek aret kinake kinowagam nappi woraagin o. Nappi woramenggerak nogo nen yi wone ndi wone yokkirage kenok, kinaruk liirogon konenggo logonu o.

²³ At yokkiramenggerak kinaruk liirogon konengga'lek logomonggotak kenok, kinenggela'me nen leenogo punuk enggaawak lek eerogo pigin o, yinuk, yoragagerak.

²⁴ It aap Ala nen yorage kagak yoraga mendek Temuwen nen yorage nagagerak kuli nen nok, at ambokan wone yorogo nogogwaarak abok aret o yogondak eekwi yi, aga'lek kagak agan wundi wogo nogogwaarak.

²⁵ It Ala nen yorage kagak yoraga nogo, inombowologwe kit aret o. Ala nen at Abarakam yoge logonet, Yi aakumi ndi aakumi o nggween paga yi menggaarak nogo abok aret kat ndaganabemenggendak paga inale'nggen kogo logogun o, yinuk, wone abuk nggaruk togon kinombomini yoragagerak nogo, kit kinake aret yoragagerak o.

²⁶ Ti kenok, at Ala nen at ayeloman eenik agago mippege nagaarik, kit maluk eekwi nogo kinalitak lombok mbo pugwi kiinok, at ale'nggen kinoba pinagawak nduk, aa'nduk kit aret kinowagam nappi wagaarak o,” yinuk, at Peterut nen wone ti aret yoragagerak.