Nappiigak 27 - Ala Wone Peenok Peebi Mbanak

Pawulut wonok o Oroma nogwe wone

¹ O Italiya wo'niren noorak nduk wone mbambunuk, at Pawulut inom, aap ando keele maarak inom, at Kayitat abu'me mendek yigin unde ambik aago inowe endage Yuliyut nogo nen wogoren nawak nduk, yoreegwaarak.

² Yogo mbareegwa, yiiro Aramitiyum nen wage nagagerik, time wonage me, o Atiya yi nggwok yenggenak laut aa'nggi paga o kota time yanggwagak noorak eeke me, unggwogogurak. Aap Aritarukut Makendoniya mendek o Tetalonika nen wagagerak nogo, ninom unggwogo nogogurik, nogo logonet,

³ nogo ambi yippunuk, ko'lu nen o Tiron ari nogogurak. Ari nogo nogogurik, at Yuliyut nogo nen Pawulut abuwa mbake logonet, “Koreewi yi mendek ndi mendek wokkiruwak nen pegiinet nage logomenggendik, woroorak op o,” yoreegerak.

⁴ Yiiro paga unggunuk, time nen nogwe me, wiya nen yiiro ogobak panggonggage logonet, nomoniren nage mbareegi, o Kipurut nina wunggagak eraaninu o wiya lek me, time nogogurak.

⁵ Nogo nogogurik, o Kilikiya inom, Pambiliya inom, nina wunggagak eerit nogo logonet, o Likiya kota Mira time ari nogogurak.

⁶ Time ari nanuk, wonogwe me, aap yigin unde inowe nogo nen yiiro ambi o Alekandiriya nen woraanuk, o Italiya noorak eeke kage nagagerik, yiiro ti paga mambinanege mbareegi, nogogurak.

⁷ Nogo logonet, yiiro nogo wiya nen panggoninuk wagak eeke logonet, abu meek ee'ninake kagak, nogo ambik yit, o Kinirut panggo yi nogogurak. O wiya nogo nabenak togop mban eeke kenok, wangge'nuk nogo logonet, o Kereta eraaninu time o Talomone nina wunggagak nogogurak.

⁸ Nogo nogogurik, abu meek ee'ninake kagak, o endage Abolok Lek Obeelom Menggim o, yogo menggam o kota Lateya koorok panggorogon time ari nogogurak.

⁹ Time elaambirik niigak, mbi nengga'lek, inambe mage negen logonet, eeko logorak eyom abu lek age mbareegi, o wiya wake menggim aret me, yiiro paga noorak ayilik kenok, at Pawulut nen it ineenu eeruwak nduk yorage logonet,

¹⁰ “Noreewi o. Nit nagun kenok, abu maluk ee'ninabigin kagi o. Ninamendek inom, yiiro inom, nogo mban lek arigin ti lek o. Ata, nineebe inom aret maluk ee'ninabigin kagi o,” yoragagerak mendek,

¹¹ at yigin unde nogo nen Pawulut ari nogo meek mbake nagagerik, at yiiro ogobak koongge menggerak nogo inom, at yiiro unde inom, it yogwe mban mugurok nogo nogogwaarik,

¹² tero nggu-nggu eeke menggim aret me, yiiro time logorak meek age mbareegi, it ando apit nen nok-nok o Penikit noorak koonggo logonet, “O Penikit ti, o Kereta yi yenggenak kup mbanak me, oonegen kilu yi nage menggim o ame pa'nggwe milinik, o omarip pa'nggwe milinik, eerak me, o tero nggu-nggu eeke menggim lek age kagak ilin me time tokkogwe a nawi o,” yinuk, kooneegwaarak.

¹³ Togop aret kooneegwaarak kwe, o ame pa'nggwe nen wiya eeroget nabuk-nabak wake mbareegi, “Nit yogobi eeke kagak noorak mbakoorak me, nawi o,” yinuk, yiiro wonok nage kero, keele mbuti pugunik nogo awiirogo yonggoppunuk nogo nogogurik, o Kereta koorok niyo aa'nggi paga time nina wunggagak nogogurak.

Yiiro inom lebeninaburak eereegerak wone

¹⁴ Nogwe me, aberak lek me, puurom kup mbanak me oonegen wundi wage menggim o omarip paga pa'nggwe nen wiya nabuk togon ee'nuk wage kagak,

¹⁵ nawok nduk eereegurak mendek, yiiro nogo ogobak nomoninuk nagak mban eeke mbareegi, “Wo'niren nawak aret o,” yinuk, yogo nogogurik, yiiro nogo piyak-lenggak eerit nage kagak, lambek puk ogogurak.

¹⁶ Nok, wo'niren nggween oolo kup mbanak mbuuluk ambi endage Kawura eraanu time nogo nogogurik, wiya nen meek ee'ninake kagak, yiiro mbuuluk nogo nggwok nogo nen keele niikkenok nage menggerak me, nggaruk togon nage kero,

¹⁷ piyanogo yiiro nggwok me mambereegurak. Mambogo nogogurik, yiiro nggwok nogo eebe telak ari kero, keele omaawirogon maappunuk, o Tiritit eraanu time nen yiiro ogobak lik yi nage kero, inagabiti nen mbogoyum pugunik irip awiiko mbareegu, wiya nen mban wo'niren nagagerak.

¹⁸ Wiya nen yiiro nogo mondok piyak-lenggak lombok ee'ninake mbareegi, nogo ambi yippunuk, ko'lu nen yi mendek ndi mendek yonggolak nogo kilirogo yiime mbo wuppugwi,

¹⁹ ti'nuk, nogo ambi yippunuk, yiiro maluk age kero, ogobakkigikak nogo mendek ineenggi paga waganogo yiime mbo wuppugwi, eereegwaarak.

²⁰ Nogo apit yugwi niigak, oonegen inom, laaluguragan inom, wundi waga'lek kagak, wiya mban nabuninuk eeke mbareegi, “Nit niyo nen ndonggonninabigin kogo o,” yinuk, mbareegurak.

²¹ It abok mbi nengga'lek nogo ambik yit wogogwaarak me, at Pawulut oolo mi'nage nagagerik, yorage logonet, “Noreewi o. O Kereta nen noorak lek yagarak nogo koneninetak nen ninamendek lek age, maluk ee'ninake, togop ee'ninabenetak lek enaani logonetak kwe,

²² kineebe ambi niyo abu-abu wambumunggup lek o. Yiiro mban maluk arigin me, kiniki nu'lek logobagip nduk, yokkirage agarik o.

²³ An Ala aput me, abu'me logonet, at obaalombok eeke minggirak nogo nen yonggo nappiya wage menggerak malayikat ambi kii'me oonikiya neya wage nagaarik, yo'nege logonet,

²⁴ Pawulut wae. Kagabiti yugun o. Kat Kayitat owagam aret mi'narumunggun me, Ala kabuwa nen kinom yiiro paga wonogwe yi, kat paga abok inagap ndarigin o, yinuk, yo'negerak me,

^25-26 nggween kup mbanak ambi paga yiiro ogobak lik yemenggerak kwe, at Ala yo'negerak a'me arigin abet mbake me, kiniki nu'lek logonip o, noreewi,” yinuk, yoragagerak.

²⁷ Yi nggwok yenggenak laut endage Areriya o wiya nen piyak-lenggak ee'ninabit nage kagak, nogo 13 yit nogogurak me, ndi, ko'lu nogo iniki mbere eeke kagak, it yiiro ndegenggo menggaarak nogo, iniki nen, “Yi aa'nggi paga abu panggo yi wogo o,” yinuk, mbako nogogwaarik,

²⁸ yugum keele mbarenogo, “Yi alobok ngge kuli kaamun?” yinuk, wakkagak nogo wuppogo nogogwaarik, alobok metet 37 kuli agagerak kogogwaarak. Ti'nuk, mbuuluk logonuk wakkogo nogogwaarik, alobok metet 27 kuli agagerak kogogwaarak.

²⁹ Kogo nogogwaarik, yugum paga panggok ari logonet, ogobak lik ari kero, inagabiti nen yiiro puk aruwak nduk, mbuti aaninggin warak mendek 4 keele yiiro akom me mbarenogo yi inikime wuppogo nogogwaarik, “O mbet-mbet weeruwak lak, ao,” mbareegurak.

³⁰ Mbakwi niigak, it yiiro ndegenggo menggaarak nogo inagap ndakko'nok mbaganiyak mbako logonet, mbuti aaninggin mendek pugunik nogo yiiro ogobak me nen yi inikime wuppugwi yuwak yiiro mbuuluk nogo niyome wuppuwok nduk eekwi at Pawulut nen yelok iige nagagerik,

³¹ “It yiiro ndegenggo menggaarak yi, yiiro inikime logorak lek kenok ti, ninagap ndakkolaagun lek o,” yinuk, at yigin unde awuri inom yoragagerak.

³² Yorage mbareegi, it yigin unde nogo nen yiiro mbuuluk nogo yi wonok nawak nduk, keele nggaruk togon agago wuppereegwaarak.

³³ O wikit nduk eeke kagak, Pawulut nen it nogo mbi nawak nduk oone nabek togon yorage logonet, “Mbi nengga'lek kiniki piirik kiigak, nogo 14 yit wogotak me, mbi nanip o.

³⁴ Mbi neenok, kinomaawi paga kinagap ndakko'nok wundubagip nduk, mbi yi aret nanip o. Kineeruwak ambiriluk ambi lek arigin lek o,”

³⁵ yorage nagagerik, mbi ambi waganogo it inenggaanom paga, “Ala wa,” yinuk, karerogo nengge mbareegi,

³⁶ it iniki kwi'na'nuk, abok aret inom mbi nunggugwaarak.

³⁷ Nit aakumi yiiro paga nogwe nogo, nineebe lambuk togon 276 aret.

³⁸ Ndi, mbi ndonggorogon nonggo nogogwaarik, yiiro teeluk aruwak nduk, gandum yonggolak nogo kilirogo yiime mbo wuppereegwaarak.

Yiiro yigirik-noonom agagerak wone

³⁹ O weege mbareegi, o time ineenggo'lek kwe, ilin me mbini neyanak ina nakkogo nogogwaarik, “Yiiro paga time luk togon nawok o,” mba'nuk,

⁴⁰ yiiro abu'me mbuti keele mbarenak nogo mbanogo teppugwi, yiiro ogobak koongge menggerak tugunik nogo piinggwi, eeppunuk, wiya nen wo'niren mbini neyanak me nawak nduk, mbogoyum pugunogo ogobak me nippogo mbareegwa, nogogurak mendek,

⁴¹ niyo omaawi nen panggok togon yiiro nogo mbini me nonggok yi nage mbareegi, niyo akom me panggonggagak eeke logonet, yiiro nogo yigi'nage kagak,

⁴² it yigin unde nogo nen, “Aap keele maarak nogo ngguu'mo warit mbaganggwi iyo, abok inooruwok,” mbareegwaarak mendek,

⁴³ inowe nogo nen, “Pawulut enaani wonok naakit,” mbake logonet, “Inoorugup o,” yinuk, inaruk wappege nagagerik, “Kit ngguu'mo wakwi kineenu kenok, kinaa'nduk yi inikime time ku'mbo wura nanuk, ngguu'mo warit yi aa'nggi paga time wundi nanip o.

⁴⁴ Ndi, kit ando ngguu'mo wakwi kineenggo'lek kenok ti, yiiro kobat minik inom, eyo minik inom, ti paga kineenggi piganok, inambokan nanip o,” yinuk, yorage mbareegi, nit abok obeelom aret yi aa'nggi paga wundi nogogurak.