Nappiigak 26 - Ala Wone Peenok Peebi Mbanak

Agiripa enggaanom paga yoragagerak wone

¹ Yorage mbareegi, at Agiripa nen Pawulut yoge logonet, “Kat eekendak nogo yu o,” yinuk, yoge mbareegi, at Pawulut wone yikit nduk, eenggi paga nen, “Puk logonip o,” yorage nagagerik,

² “Ai, nogoba kendagembogut Agiripa wa. It Yakuri nen, Yogop eekerak, ndogop eekerak, noba lenggenggaarak ti, o yogondak yi paga kat kenggaanom lombok mbeenogo yokkirigin ti, niniki ale'nggen aga o.

³ Nit Yakuri eeko monggoorak inom, wone ngge mendek yilumbunuk wako monggoorak inom, kat abu keenu me, agan nage neegak, Keebi, nombarugun o, nogoba.

⁴ O maan wulaga mbuuluk nawi alom paga logonet, eerit nage, ti'nuk, o Yerutalem logonet eeke, eeke nagagirak nogo, it Yakuri mendek abok ineenu aret o.

⁵ Nit Yakuri wone yugu woppunuk eeko monggoorak ti, it ando inoone omaawi agan nugu menggaarak Pariti mendek nogo, an togon it ninom agan nege nagagirak nogo, o maan nen ineenu me, paganogo yokkiroorak mbakaarak kenok ti, yokkiraawak o.

⁶ Ndi, yogondak Ala nen ninombomini abok yoragagerak nogo wone niniki lunik minggirak ti paga wo'niren nawone loonuwok nduk, pani wagaarak iigi o.

⁷ Wokkiraagin o, yinuk, wone abuk nggaruk togon yoragagerak nogo nit Yakuri ninanebunu 12 nen, Wo'niraagin, ao! yinuk, mbako logonet, liingge nen, oonikiya nen, niniki abe paga, Ala alut eeko monggoorak nogo o. An togon wone ti, niniki lunik minggirak ti paga it Yakuri nen nooruwok nduk, noba lenggenggaarak me, nogoba o!

⁸ Togop me, kit nonggop nduk at Ala nen aakumi kanggwi ineenik agago mippiyoorak meek mbako ogotik o?

⁹ An aa'nduk togon at Nataret mendek Yetut ti, endage miyuk-meya eerogo pikit aret mbake nagagirik,

¹⁰ o Yerutalem logonet, togop aret eeke nagagirak. Eeke logonet, it Ala unde ninoweewi nogo nen yo'nereegwaarak paga it Ala apuri alik leenak ineebe ambik aret keele maarogo mambiigo menggam piya nage, Ndi, Inooruwok ilik, lek a? yogwe iinok, an nen, Inooruwok aret o, yorage, eeke nagagirak.

¹¹ It Yakuri tamban eeko menggam lombok it abet mbakwi mbo puwak nduk, inoorit nage, ndi, At Yetut endage miyuk-meya eerogo pinip o, yinuk, noone omaawi paga yorage, eeke nagagirak. It abet mbakwi ti, Abu neebi lombok, inombake logonet, nanini wu agan nage kenok, aakumi inambik iname o nda lombok time aret inoorikit nduk, muguren-magaren lombok nege nagagirak o,” yinuk, yoragagerak.

Pawulut abet mbareegerak mbininogo yoragagerak wone

¹² Yorage nagagerik, “Togop eerit nege me, ne ambi paga Ala unde inoweewi nen, Togop ee'nu o, yinuk, nappanugo mbareegwa, o Ndamitik tu paga nage logonet,

^13-14 liingge aret noreewi ninom nage me, mbogut paga nen abinak ndelenak-welenak eeke kage nagagirik, nit abok aret nggween paga ninete wanduk ngginnogogurak o, nogoba. Oonegen abinak ti mbuuluk. Ndi, ti eereegerak nogo ti, abinak mondok iya negen kage nagagirik, nggween paga ngginnogo mbareegu, Iberani inoone paga yo'nege logonet, Tawulut wae. Tawulut wae. Kat nonggop nduk an keebi-keeba agago nooke menggendak o? Wam yinumo-nanumo ari kenok, yawi lomba agago wakwi iinok, yungguk togon yawi eyak lagangge menggi kwak, kat togop ee'nabit nege agandik ya? yinuk, ari naruk konengge nagagirik,

¹⁵ Ai, nogoba. Kat ta o? Yoge mbareegi, Lek o. Kat nen keebi-keeba agago nooke menggendak Yetut an aret o.

¹⁶ Kat nayeloman a'nuk, yogondak eeke neegendak inom, peebi eerit nage logorak yokkirigin nogo inom, wone ti yoranet nege logorak leenogo pagakit nduk, nikkeya wagarak me, mi'naru o.

¹⁷ It aap Yakuri yi inom, it endekem konenggulik mendek inom, inowagam nappagaminggirak me, it nen time maluk eeppagagwi iyo, kagap ndake logogin o.

¹⁸ It o apit negen wonogwe nogo mbo punuk eya me unggwage, ndi, at Ibilit abu'me piyareegim nen wundi nanuk, Ala abu'me piige menggim unggwogwe, Eeruwok o, yinuk, yuwak nduk, nappagagin o. It nogo iniki noba panggombunuk abet nombakwi iinok, inomaluk Ala nen lek agago piinok, at apuri leenogo piyareegim nogome inom nabenogo piyaawak nduk, nappagagin o, yinuk, yo'nereegerak o,” yoragagerak.

Pawulut eeke nagagerak mbininogo yoragagerak wone

¹⁹ Yorage nagagerik, ambinom yorage logonet, “Nogoba Agiripa o. Mbogut paga nen an nabinggaanggo paga yo'nege kagagirak nogo, an eeka'lek minggirak ti lek o.

²⁰ Yo'nereegerak nogo aa'nduk lombok it o Ndamitik wonogwe nogo yorage, o Yerutalem wonogwe nogo yorage, ti'nuk, o Yureya enaagan-ambokan inom, it endekem konenggulik mendek inom, yoranet nege, eeke logonet, Kit abok aret kiniki koonogo punuk, kinomaluk paganogo mbo pogo logonip o. Ndi, kinomaluk mbo punuk, Ala mugurok nogwe abet aret kinombaruwak nduk, yi eekak ndi eekak abe mban eerit nogo logonip o, yinuk, yorage nagagirak.

²¹ Togop yoranet nege nagagirak ti paga it Yakuri nen Ala awi wurik me time pippaninuk, nooruwok nduk eereegwaarak mendek,

²² o aa'nduk nen nok, yogondak kuli, Ala nen yeenggwaanege kagak neenik logonet, it aap inendage warak inom, inendage lek inom, yorage agarik o. Yorage minggirak ti, wone alik mendek yorageelik o. Ata, aap Ala nen yorage kagak yoraga nogo inom, at Muta inom, nen, Togop eerigin o, yinuk, abok yorogo nogogwaarak wone nogo aret paganogo yorage minggirak o.

²³ At Ala nen leenogo mippereegerak Keritut nogo, nit Yakuri mendek inom, it endekem konengga'lek mendek inom, o eya eerogo piige logowak nduk, yagan warogo kangge logomenggerik, kambunuk nogo menggam nen aa'nduk at aret eenik a'nuk mi'narigin o, yinuk, yogo nogogwaarak nogo aret yorage minggirak o,” yinuk, yoragagerak.

²⁴ Pawulut nen wone ti awo yorage kagak, at Petut nogo oone nggwok paga ari logonet, “Pawulut wae. Kat kumili aret keegi o. Yi wone ndi wone mamunggo'net nege paga kumili negen aret agan nege keegi o.”

²⁵ Yoge mbareegi, at Pawulut nen, “Kendage tiyanak nogoba Petut wae. An kumili lek o. An niniki worak nen abet aret yokkege agarik o.

²⁶ Nogoba Agiripa wae. An yorage minggirak ti, mina paga yorage logolik o. Wone an yorage minggirak nogo ti, kat nogoba Agiripa kunduk, keenggo'lek ti lek, abu keenu aret mbaki o. Wone ti abok keenu me, nagabiti lek logonet, yokkege agarik o.

²⁷ Nogoba Agiripa o. Aap Ala yorage kagak yoraga nen yorogo nogogwaarak wone nogo, kat abet mbake menggendak ilik, lek a? Abet mbake menggendak an neenu aret o.”

²⁸ Yoge mbareegi, at Agiripa nen Pawulut yoge logonet, “Ne yogondak iluk yi paga aret we negen Keritut woorak nduk agago panege agandik?”

²⁹ Yoge mbareegi, at Pawulut nen, “Nogoba o. Kat mban waanok nduk yokkege lek o. Kat inom, it yogondak konenggwi abok aret inom, an keele maa'nakerak kwak maakkinaburak lek kwe, an Keritut wone waganeegirak kwak, yogondak woorak kenok, yogondak aret waganggwi, ndi, peebi woorak kenok, peebi aret waganggwi, eerubagip nduk, an kinake Ala yoge agarik o,” yinuk, yoreegerak.

³⁰ Yoge mbareegi, inowe endagembogut nogo inom, inowe gubernur nogo inom, kwe Mberinike inom, it aakumi kwi'ndak inom wonogogwaarak nogo inom, abok aret mi'na'nuk,

³¹ wundi nogo nogogwaarik, “Maluk eekwi iinok, o keele maarogo mambiigo menggam mambiigwi, inookwi, eeko menggaarak mendek at togop ambi eerulik kogo o,” yinuk, ambi yogak eeko nogogwaarik,

³² at Agiripa nen Petut nogo yoge logonet, “At aap ti, nogoba Kayitat nawone amburu mbanuwak o, yenetak lek en, yogondak keele maarak wonage nogo piinogo penetak o,” yinuk, yoreegerak.