Nappiigak 25 - Ala Wone Peenok Peebi Mbanak

“Kayitat nen nawone amburu mbanuwak,” yereegerak wone

¹ At Petut nogo mippogo mbareegwa, wage nagagerik, nogo kenagan yippunuk, o Kayitareya nen o Yerutalem wagagerak.

^2-3 Yerutalem wage nagagerik, wonage me, it Ala unde inoweewi inom, it Yakuri inoweewi nagawan-nagawan inom, nogo nen Petut owagam wa'nuk, at Pawulut oba lenggeneegwaarak wone nogo mbininogo yoreegwaarak. Tu paga wage me, enaappunuk, Pawulut waruwok nduk koombogo nogogwaarik, at Pelikit nen, “E o,” yuwak nduk, ambokan laganggo logonet, “Nogoba o. Kiniki kunik ee'ninake logonet, at Pawulut o Yerutalem woraawak nduk, ayonggo pu o,” yinuk, yogo mbareegwa,

⁴ “Lek o. At Pawulut nogo, o Kayitareya porogo wonogwe me, an ne mande negen logonuk time nagin me,

⁵ aap kinoweewi ando wone koongga kero, ando ninom nogo logomonggoorik, abet aret maluk eekerak kenok, time nen mban yoruwak o,” yinuk, yoragagerak.

⁶ It inom wonage logonet, nogo we 8 ilik, 10 a, yippunuk, o Kayitareya iyokan nage nagagerik, ko'lu nen wone looniyak me, inowak loonggo menggam unggwi nage nagagerik, at Pawulut wonok woraawak nduk yoragagerak.

⁷ Wonok wage mbareegi, at eebe oolo kagak, it Yakuri Yerutalem nen nogogwaarak nogo, wanggeppunuk logonet, at eereegerak inigen ambi koolik kagak, “Yogop eekerak, ndogop eekerak,” yinuk, wone iya lombok oba lenggenogo pereegwaarak.

⁸ Oba lenggenggo mbareegwa, at Pawulut nogo nen aana'le mbanggolage logonet, “Lek o, noreewi. Ala wone yugu liiru mbanak it Yakuri eeko menggaarak nogo tagangge, Ala awi wurik me maluk eerogo pege, ndi, ninogoba Kayitat endage meek eerogo pege, eekerak o, yo'nugwi yi, an ambiriluk ambi abu eerulik aret o,” yinuk, yoragagerak.

⁹ Yorage mbareegi, at Petut nogo nen it Yakuri inikilom ombaruwak nduk, at Pawulut nogo yoge logonet, “Kat togop eekendak, yokkugwi yi, Yerutalem nage logomenggendik, an nenggaanom paga time kowak looni noorak op ilik?”

¹⁰ Yoge mbareegi, at Pawulut nen, “At ninogoba endagembogut Kayitat wone amburu mbangge menggim yi aret me, an noba lenggenggaarak yi, yime nen aret nowak looniyak o. An nen it aap Yakuri mendek maluk ambi eeppiige logolik ti, kat abu keenu aret o.

¹¹ Maluk eekwi iinok, inooko menggaarak nogo mendek ambi abet aret eekirak kenok ti, nooriyak op aret kwe, noba lek kagak yo'nugwi me, it nooruwak nduk, neebe wogoroorak kit nen ambi yuurak mondok lek aret o. At Kayitat nen mban nawone amburu mbanuwak o,” yoreegerak.

¹² Yoge mbareegi, at Petut nogo nen at awuri wone amburu mbanggo menggaarak nogo inom inalik nen wone mbambogo nogogwaarik, at Pawulut yoge logonet, “Kayitat nen mban nawone amburu mbanuwak o, yinuk, yagandak me, Kayitat wonage me aret nappagagin o,” yinuk, yoreegerak.

Agiripa Mberinike imbirak iigak, yoragagerak wone

¹³ Ti'nuk, nogo mande negen yippunuk, it Yakuri inowe endagembogut Agiripa kwe Mberinike imbirak nen at Petut keyage wappuwok nduk, o Kayitareya wogogwaarak.

¹⁴ Wogo nogogwaarik, time logonuk iniyokan noorak mbareegwaarak me, Petut nogo nen, “At Pelikit wundi nage logonet, aap ambi keele maarak teppegerak yime agaarik o,” yinuk, at Pawulut abok paganogo it Yakuri inowe endagembogut nogo yoreegerak.

¹⁵ Yoge logonet, “An o Yerutalem nage nagarik, wonage me, it Ala unde inoweewi inom, it Yakuri inanggok inom, nogo nen, Togop eekerak o, yinuk, inoone oba lenggembunuk, waruwak nduk, kat nen owak loonu o.

¹⁶ Yo'nogo mbaka, an nen it yorage logonet, Nit Oroma mendek yi, at wone oba pegaatak nogo nen oba lenggenggetak nogo, Wone noba pegendak yo'niru o, yoga'lek kagak, nit ninalik nen inawone amburu mbanggulik me, eebe maluk eeppuwak nduk wogorolik o, yinuk, yorage mbaki,

¹⁷ it abok ninom yime kuwak eeri wogo nogoorik, wonogwe me, an elaambirik lek nogo ambi yippunuk, ko'lu wone owak loonggo menggam unggwi nage nagarik, eebe wonok woraawak nduk yoragarak.

¹⁸ Yoragarak wonok wogo mbaka, it oba lenggeneegwaarak nogo nen mi'na'nuk, Maluk ndogop eekerak o, yogwe iigirak nogo ndak-ndak ambi yorugun mbakirak mendek, yoga'lek aret iigirak o.

¹⁹ We, it eeko menggaarak yogwe wone inom, ndi, aap ambi endage Yetut abu kambeegerak kwe, Pawulut nen, Eenik wonage o, agan nege wone inom, yogo logonet, nawone-kawone yagaarak me,

²⁰ wone ti mendek ti, an liippega'lek kenok, nonggop togon alom kwaarigin, mbake nagarik, Kat koba lenggenggaarak yogwe ti, o Yerutalem nen kawone mbanuwak nduk nappagarak op ilik?

²¹ Yoge mbaki, at Pawulut nogo nen, At Kayitat nen aret nawone mbanuwak nduk, keele maarogo mambiigo menggam yime aret logokit o, yo'nege mbaki, an nen, Peebi Kayitat owagam nappuurak me, porogo logonip, yoragarak o,” yinuk, mbininogo yoreegerak.

²² Mbininogo yoge mbareegi, at Agiripa nogo nen Petut yoge logonet, “At aap ti, wone ari nogo an kunduk konenikit, lak ao, mbake agarik o.” Yoge mbareegi, Petut nogo nen, “Ko'lu at nen ari kenok, konenumunggun o,” yoreegerak.

²³ Yoge mbareegi, nogo yinuk, ko'lu nen Agiripa Mberinike imbirak inom, it yigin unde inoweewi inendage warak inom, it o kota time mendek inoweewi inom, inayuk wuppunuk inoone lek iigak, o wone mbanggo menggam nogome unggwogo nogogwaarik, at Petut nogo nen, “Pawulut wonok pi woraanip o,” yorage mbareegi, pi wogogwaarak.

²⁴ Pi wogo mbareegwa, at Petut nogo nen, “Ninogoba kendagembogut Agiripa inom, kit yime ninom kuwak eekoorak inom, kit abok aret, Wa! yokkiragi o. It Yakuri o Yerutalem nen, o Kayitareya yime nen, ya-mba yogo logonet, Aap yi eenik logorak lek o. Wa'nip o, yo'negaarak nogo eebe yi kaanip o.

²⁵ Wa'nip o, yo'negaarak kwe, maluk eekwi iinok, inooko menggaarak ti mendek ndak-ndak ambi eerulik kagarak kwe, at nogo nen, Aap endagembogut Kayitat nen aret an nawone mbanuwak o, yo'nege mbaki, o Oroma time at Kayitat wonage me nappuurak koonogo pigirak o.

²⁶ Togop aret koonogo pigirak kwe, at eekerak ambi an liiru mbanogo nogoba Kayitat ake nappuurak lek aret me, at eekerak ambi abu liirogon yogwi kiinok nen perak, liiru Kayitat ake mbanogo nappuurak nduk, at eebe wonok kit abok kinowagam wagi o. Wone alom liirogon ti, kat ninogoba Agiripa nen kwaa'nok nduk kowagam wonok wagi o.

²⁷ Wone oba lenggenggaarak nogo alom liirogon kwaakkaga'lek kagak, eenggi keele maarak aret nappuurak ti, meek kagi o,” yoragagerak.