Nappiigak 23 - Ala Wone Peenok Peebi Mbanak

¹ At Pawulut nogo wonok, oolo mippi nage mbareegi, it wone amburu mbangga nogo enegen loorage logonet, “Noreewi o. An Ala abu'me logonet, o maan nen yogondak kuli an ambi eekirak paga niniki penggenneegak ee'naka'lek aret agarik o.”

² Yoragagerak ti paga, at Ala unde inowe nggwok Ananiyat nogo nen it aap Pawulut owagam mi'ndak wonogwe nogo yorage logonet, “Ambe toguk togon wa'nip o,”

³ yorage mbareegi, at Pawulut nogo nen at yoge logonet, “Eyo maluk kagak agabolo mban amburu obeelom warak menggi kwak, kagabolo mban laambu wonage yi, Ala nen mondok koorigin aret o. At Ala wone yugu liiru mbanak ndak-ndak eekerak ilik, lek a? yinuk, nawone amburu liirogon mbanigin, mbakirak kwe, an nooruwak nduk aakumi yoragandak ti paga kat nen aret wone yugu nogo taganogo pege keegi o,” yoreegerak.

⁴ Yoge mbareegi, it time wonogwe nogo nen at Pawulut yogo logonet, “Kat Ala unde ninowe nggwok nogo meek mbake logonet, ari agandik ya?”

⁵ Yogo mbareegwa, at Pawulut nen, “At Ala unde ninowe nggwok ti, neenggo'lek me yagarak o, noreewi. Kinowe kinarum wonage nogo, kinoone maluk yorugup o, yinuk, liiru mbanak wonage an neenu aret o,” yoragagerak.

⁶ Yorage nagagerik, at Pawulut nogo nen it wone amburu mbangga ando ti, Taruki mendek inom, it ando ti, Pariti mendek inom, wonogwe yelok iige nagagerik, “Noreewi o. An aap Pariti mendek aret o. Ndi, nogobamini kunduk Pariti mendek mban aret. Nit kambunuk nineenik agago mi'nariyak wone ti, niniki lunik neenok, nawone amburu mbanuwok nduk wonogwe kiigi o,” yinuk, oone nggwok aret yoragagerak.

⁷ Yorage mbareegi, it Pariti mendek inom, Taruki mendek inom, wone wako nogogwaarik, it kuwak ogogwaarak nogo, it mban-mban ogookkologogwaarak.

⁸ It (Taruki mendek nogo nen, “Aakumi kambunuk ineenik agago mi'narugun lek o. Malayikat inom, aakumi inogoma inom, ti kunduk wonogwe mondok lek aret o,” yogwe kwe, it Pariti mendek nen perak, “Ti abok aret wonogwe,” yogo logonet, inom ogookkologogwaarak.)

⁹ Ogooppunuk, inoone yimbu-lambu yogo nogogwaarik, it Pariti mendek liiru mbanak unde ando nogo nen, mi'na'nuk yorogo logonet, “At yi, maluk ambiriluk ambi eerulik aret kogo o. Aakumi inogoma ambi nen yogerak paga ari agaarik ilik, malayikat ambi nen yogerak paga ari agaarik a?” yinuk, awone nggwok wareegwaarak.

¹⁰ Ogooppunuk, it wone nggwok warit nogwe iinok, aap it yigin unde inowe nen Pawulut niikkenok-wiikkenok eekwi iyo, at awuri nogo yorage logonet, “It kuwak aago inenggela'me wa unggwogo logomonggotik, eebe wonok kereewina nogome mambi nanip o,” yinuk, yoragagerak ndak-ndak aret eereegwaarak.

¹¹ Nogo ambi yinuk, ko'lu, o kiip age mbareegi, nogome wonage me, ninogoba Yetut at Pawulut owagam wage nagagerik, mi'ndak logonet, “An noone o Yerutalem liirogon yorage nagandak nogo ndak-ndak, peebi o Oroma time yora noorak me, kiniki nu'lek logot o,” yoreegerak.

Pawulut wariyak nduk kooneegwaarak wone

¹² Ko'lu o weege mbareegi, it Yakuri mendek kuwak eeppunuk wone kote mbanggo logonet, “At Pawulut waka'lek kagak, nit mbi inom, yi inom, ti noorak mondok lek o,” yinuk, Ala endage kumbunuk kumbuk mbaneegwaarak.

¹³ It ineebe 40 ando inom kuwak eeppunuk, eebe wariyak kooneegwaarak.

¹⁴ Koombunuk, it Ala unde inoweewi nogo inom, inogobamini inom, it wonogwe me, inowagam nogo nogogwaarik, yorogo logonet, “At Pawulut waka'lek kagak, nit yi mendek ndi mendek noorak mondok lek o, yinuk, Ala endage kumbunuk kumbuk mbanggoorak me,

¹⁵ yogondak kit inom, it wone amburu mbangga inom, nen, we piliret, Pawulut ambinom eegwa'me waawok o, yinuk, at yigin unde inowe nogo nen wonok woraawak nduk, yonggo nappiyamonggotak yori nogwe iigak, nit tu paga enaarak wonogwe me, wonok yime ari waga'lek kiigak, tu paga taati warugun aret o,” yinuk, yorogogwaarak.

¹⁶ At Pawulut wariyak nduk tu paga enaari noorak kooneegwaarak nogo amboko nen aruk konembege nagagerik, at Pawulut it yigin unde inagereewina wonage me unggwage nagagerik, kurumbi yoreegerak.

¹⁷ Yoge mbareegi, at Pawulut nogo nen it yigin unde inowe abu'me mendek ambi, “Omok o,” yoreegerak wage mbareegi, yoge logonet, “At wulaga yi nen, kinowe wone ambi yoruwak nduk wagaarak me, wonok nak o.”

¹⁸ Yoge mbareegi, wulaga nogo wonok it inowe owagam pi nage nagagerik, yoge logonet, “At Pawulut keele maarak wonage logonet, Omok o, yo'nege mbaki, nage nagarik, Wulaga yi nen, kinowe wone ambi yoruwak nduk wagaarak me, wonok nak o, yo'nege mbaki, yokkiruwak nduk wonok wagi o.”

¹⁹ Yoge mbareegi, inowe nogo nen wulaga nogo eenggi piganok, alik me kwippi nage nagagerik, mbawok yoge logonet, “Kat wone yo'niriyak nduk wagandak nogo yu o.”

²⁰ Yoge mbareegi, at wulaga nogo nen, “It aap Yakuri nen we piliret ko'lu kat Pawulut wonok, it wone amburu mbangga wonogwe me ambinom liirogon eegwa'me woorak wonok nanok nduk yokkiri woroorak koonggaarak me,

²¹ yokkiri wogwe iinok, koneniyak abu lek o. It Yakuri mendek ineebe 40 ando inom nen, At Pawulut waka'lek kagak, mbi inom, yi inom, nit noorak mondok lek o, yinuk, Ala endage kumbunuk, kumbuk mbambunuk enaarak logonet, kat ari keyo mban inaruk agaarik o,” yoreegerak.

²² Yoge mbareegi, inowe nogo nen wulaga yoge logonet, “Kat yo'negendak ti, aap alik ambi abu yoraagun o,” yinuk, aruk wappunuk, “Nak o,” yoreegerak.

Pawulut gubernur Pelikit owagam pi nogogwaarak wone

²³ Yoge nagagerik, it yigin unde inoweewi at abu'me mendek mbere nogo, “Wa'nip o,” yorage nagagerik, wogo mbareegwa, yorage logonet, “Oonikiya oonegen 9 paga o Kayitareya nawok nduk aap yigin unde ineebe 200 inom, kuda amborowak paga kwi'ndak nogo menggaarak ineebe 70 inom, ndi, aap inarege-wooluwak warak ineebe 200 inom, mondok li'luk eeko logomonggotik,

²⁴ at Pawulut nogo, kuda amborowak paga kwippunuk, enaani aap ninowe gubernur Pelikit owagam pi nawak nduk yoraanip o,” yinuk, yorage nagagerik,

²⁵ pipuk eekwi iigak, liiru mbangge logonet,

²⁶ “Kendage abu tiyanak menggendak nogoba gubernur Pelikit wae. An Kelawuriyut Litiyat nen wone ambi yokkiri o.

²⁷ Aap yi, it Yakuri mendek nen pippunuk, mondok waruwok nduk eekaarak mendek, An Oroma mendek o, ari naruk konembunuk, nawuri yigin unde ninom agap ndako nogoorik,

²⁸ Alom ngge paga wariyak yogwe iyaamun? yinuk, wonok it wone amburu mbangga inowagam nagarak o.

²⁹ Inowagam nage mbaki, it nen yogo logonet, At nogo it Yakuri wone yugu liiru mbanak yogop-ndogop eeriyak wone taganggerak o, yinuk, yogwe iigirak kwe, Mondok wariyak o. Keele maarogo mambiigo menggam mambuurak o, yagaarak ti, alom lek kagak aret yagaarak kagarak o,

³⁰ Ndi, Wariyak, wone kote koonogo pegaarak o, yinuk, yo'nugwi naruk konengge nagarik, kat kowagam nappi wage, ndi, it inoone at oba lenggenggaarak nogo, paganogo yokkiruwak nduk, Yori nanip o, yinuk, yorage, eekirak o, yinuk, an Kelawuriyut Litiyat nen aret yokkigi o, nogoba,” yinuk, liiru mbaneegerak.

³¹ Liiru mbangge nagagerik, “Wonok nanip o,” yoragagerak ndak-ndak it yigin unde nogo oonikiya aret Pawulut wonok, o Andipatirit time nogogwaarak.

³² Ndi, nogo yippunuk, ko'lu it kuda amborowak paga nugu menggaarak nogo nen Pawulut pi nawak nduk, nappiigo nogogwaarik, wonok nogwe iigak, it yigin unde nogo nen iniyok paga inagereewina wogogwaarak.

³³ It kuda amborowak paga nugwi nen Pawulut wonok o Kayitareya unggwi nogo nogogwaarik, aap inowe gubernur nogo liiru mbanak wogogo logonet, “Pawulut eebe yi o,” yinuk, yoreegwaarak.

³⁴ Liiru mbanak nogo pekkage nagagerik, “Aap yi awi ngga mendek o?” yinuk, kin wagangge mbareegi, “Lek o. Awi Kilikiya aret o,” yogo mbareegwa,

³⁵ “Inoone koba lenggenggaarak ti, wogwe iinok, alom kwaaruwok o,” yoge nagagerik, “Keroret awi nggwok wurik me wonok nogo logomonggotik, arum logonip o,” yinuk, apuri yoragagerak.