Nappiigak 21 - Ala Wone Peenok Peebi Mbanak

At Pawulut o Yerutalem nagagerak wone

¹ Niniki it paga nggi ari kagak, teppiinok, yiiro paga unggwogo nogogurik, time nen nok, nggween kup mbanak Kot wunda wogo nogogurik, ko'lu nen o Ororot unggwi wogwe, ti'nuk, o Patara unggwi wogwe, eereegurak.

² O Patara nogome wonogwe me, yiiro alik o Penitiya wunda woraawok nduk eeko mbareegwa, ninom aret unggwogo nogogurik, wogogurak.

³ Wogo nogogurik, o Tipurut nineebe kwaare'nggan nina wunggagak wogo logonet, yi mendek ndi mendek yiiro me yonggolak nogo o Tirut kilirogo wumbegak woraawok nduk, o Tiriya unggwi wogogurak.

⁴ Time unggwi wogo nogogurik, Yetut oone waganggwi mendek time wonogwe kwaariigo nogogurik, ninom logonet, nogo 7 yereegurak. It time mendek nogo Aberiniki nen yorage kagak Pawulut yogo logonet, “Kat Yerutalem nagun o,” yoreegwaarak kwe,

⁵ time logonuk noorak kooneegurak nogo ndak-ndak age mbareegi, it Yetut oone waganeegwaarak nogo inakuwi-inapurilogwe inom abok aret o kota nen wo'niren yi aa'nggi paga pinani nogo mbareegwa, ninendobanggun yindumbunuk tamban eereegurak.

⁶ Tamban eeppunuk, it ninom keyage wat-wat yogo nogogurik, iname nogwe iigak, nit yiiro paga unggwi nogogurak.

⁷ O Tirut time nen wogo nogogurik, o Potolemayit unggwi woraanuk, time ninoreewi Ala apuri keyage wappiinok, ninom nogo ambit yereegurak.

⁸ Nogo yippunuk, ko'lu nen o Kayitareya unggwi nogo nogogurik, o Yerutalem nen it aap 7 leeninabeegwaarak mendek ambi obeelom wone yoranet nege menggerak Piliput nogo ame unggunuk, ninom wonogogurak.

⁹ At apurilogwe komologwe tawe ineebe 4 aap wogonaka'lek logonet, Ala nen yorage kagak yorogo nogogwaarak.

¹⁰ Ninom logonet, nogo mande negen yugwi me, aap Ala nen yorage kagak yoraga mendek ambi endage Agabut o Yureya nen niya nagagerak.

¹¹ Niya nage nagagerik, at Pawulut agabee'le piinogo at eenggi-iyok keele maakkolage nagagerik, ari logonet, “An kebee'le paga maakkolagarak yi kwak, it Yakuri o Yerutalem menggaarak nen aap agabee'le yi unde nogo, togop aret keele maarogo it endekem mendek wogoraagun o, yinuk, at Aberiniki nen yo'nege kenok, yokkirage agarik o,” yo'niragagerak.

¹² Yo'niragagerak nogo ninaruk konembunuk, it time menggaarak ninom nen Pawulut yogo logonet, “O Yerutalem time nagun o,” yinuk, ninabuwa warak nggo-nggo logonet, yogo mbareegu,

¹³ at Pawulut nen, “Kit an nale yogwe paga niniki aaninggin aruwak nduk, nonggop nduk yogo ogotik? An Yerutalem nagin aret me, time neegak nogoba Yetut ake keele maa'nakwi iinok ti, op aret mbake agarik o. Ndi, noorugun kenok togon, op aret me, kit nonggop nduk yogo ogotik o?” yo'niragagerak.

¹⁴ Yo'nirage mbareegi, yogak mban eereegurak kwe, konengga'lek mbareegi, “Ala iniki mbake mban aruwak o,” yinuk, puk ogogurak.

¹⁵ Time wonogogurik, ninayum ndegenggo'nok, Yerutalem wogogurak.

¹⁶ It Kayitareya mendek Yetut oone waganeegwaarak ando nogo nen aap o Tipurut mendek aa'nduk Yetut oone waganeegerak endage Manaton ame nogome luulu ninom logowok nduk, wo'niren pinani wogogwaarak.

At Pawulut Yakobut ka nagagerak wone

¹⁷ O Yerutalem unggwi wogo mbareegu, ninoreewi Ala apuri nogo nen iniki ale'nggen paga wo'ninabeegwaarak.

¹⁸ Wo'ninako mbareegwa, nogo yippunuk, ko'lu at Pawulut ninom Yakobut pekka nogogurak me, it Ala apuri unde abok aret inom wonogwe iyareegurak.

¹⁹ Iigo nogogurik, at Pawulut nogo nen keyage wappiinok, Ala nen eeppege kagak, it endekem mendek eeginabit nege nagagerak nogo mbininogo yoragagerak.

²⁰ Mbininogo yoragagerak nogo inaruk konembogo nogogwaarik, Ala wogoppereegwaarak. Wogoppogo nogogwaarik, Pawulut yogo logonet, “Ninore, Pawulut wae. It Yakuri mendek yi aap ndi aap abok aret Yetut oone abet mbareegwaarak kwe, it abok aret Ala wone yugu liiru mbanak nogo iniki ti mban lunik logonet, eerit nogwe yi, iige agandik?

²¹ It aakumi nen, Lek o! At Pawulut nen, it Yakuri mendek kumi-aap endekem mendek inenggela'me menggaarak nogo mamunirage logonet, At Muta nen yereegerak wone nogo mbo pinip o, ari logonet, Kit kinapuri inagabolo mbanggwi, it aap Yakuri eeko menggaarak nogo eekwi, eerugup, yorage menggerak o, yinuk, yoranet nugwi nogo inaruk konenggaarak o.

²² Ndi, kat wagandak inaruk konenugun me, nit nonggop eeruwok o?

²³ yinuk, wone koonggoorak, yokkugwi yi aret eeru o. Aap ineebe 4 nen ambi eeriyak koonogo Ala yogaarak ninom wonogwe me,

²⁴ yogondak kat kinom nage logomenggendik, it inoba mbeenogo pakwi, kat kunduk koba mbeenogo pake, eeko logomonggotik, it ineeruwak mbaniyaawak nduk, onggo kat nen pi nanu o. Ti eeremenggendak paga Ala wone yugu liiru mbanak kat kunduk eeke keenok, Pawulut eeke menggerak konenggoorak nogo, alom lek kagak yogwe iigo o, mbarugun me, togop aret eeri nanu o.

²⁵ Ndi, it endekem mendek nen Yetut oone abet mbareegwaarak nogo ti, Kugi aanggo warak noorak mage o. Amiya noorak mage o. Yi mendek ndi mendek amiya wungga'lek kagak warak nogo noorak mage o. Mbabi eeriyak mage o, yinuk, koonogo pereegurak nogo muk liiru mbanogo nappiyareegurak o,” yinuk, yoreegwaarak.

²⁶ Yogo mbareegwa, nogo yinuk, ko'lu, at Pawulut nen aap ineebe 4 nogo wogoren, nage nagagerik, at inom inoba mbeenogo patinuk, Ala awi wurik me unggwi nanuk, it inoba mbeenogo patinuk wonogogwaarik, ne ndi paga inalitak Ala ake warogo puurak wone nogo yoragagerak.

At Pawulut pigaganeegwaarak wone

²⁷ Nogo 7 yuurak age kagak, it Yakuri Atiya mendek at Pawulut eebe Ala awi wurik me unggwage inigen kogo nogogwaarik, it aakumi nggwok kuwak aago abok inikime manako logonet, eebe kok pippunuk,

²⁸ “Aap Iterali mendek yi wae! Mbet piga woraanip o. Aap yi nen, yi awi ndi awi mamuniranet nege logonet, nit ninabok mbanit nage, Ala wone yugu liiru mbanak nogo taganogo pit nage, Ala awi wurik yi, lek eeriyak agan nege, eeke menggerak yi aret me, pi'niraanip o. At nogo nen aap Yunani mendek wogoren, Ala awi wurik me unggwi wage nagaarik, mage menggim maluk eerogo pegerak o,” yinuk, inoone ya-mba yorogogwaarak. (

²⁹ At Toropimut o Epetut mendek nogo Pawulut imbirak o kota Yerutalem nugwi iigo nogogwaarik, Pawulut nen wonok, Ala awi wurik me unggwegerak mba'nuk, yereegwaarak.)

³⁰ Yorogo mbareegwa, o kota nogome aakumi abok pilak yinuk, mbe agan kuwak ari wogo nogogwaarik, at Pawulut ineenggi pippunuk, Ala awi wurik me nen niigogo wumbunuk, tu nareegwaarak.

³¹ Wumbi woraanuk, waruwok nduk eekwi iigak, “O kota Yerutalem abok naalop-kaalop eekwi o,” yinuk, at yigin unde apit aago inowe nogo yori nogo mbareegwa,

³² at nogo nen awuri yigin unde inom, it inoweewi inarum menggaarak inom, wogoren, puu'nuk it aakumi kuwak aago nogo inowagam wogogwaarak. Aakumi nen it yigin unde inowe inom wogwe inigen iigo nogogwaarik, it Pawulut wakwi nogo puk ogogwaarak.

³³ Puk ogo mbareegwa, at yigin unde inowe nogo wage nagagerik, Pawulut eenggi pigogo, “Mbuti keele mbere paga maa'nip o,” yinuk, yorage nagagerik, “Aap yi ta o? Ndi, at ngge eekerak kenok wako ogotik? Yinip o,” yinuk, ineegwa'me waganeegerak.

³⁴ Ineegwa'me wagangge mbareegi, it aakumi ambik kuwak aago nogo inoone nggwok paga ambi yagak, ambi yagak, yogo logonet, inoone naalop-kaalop yogwe iinok, alom kwaariyak meek age mbareegi, “Wonok kereewina nogome nanip o,” yoragagerak.

³⁵ Yoragagerak wonok nda'nggi paga ari nogwe me, it aakumi ambik kuwak aago nogo waruwok nduk ninggi'nuk nggobok irit nogo mbareegwa, it yigin unde menggaarak nogo nen Pawulut eebe piyanogo kereewina mambi nawok nduk, wonok nogwe iigak,

³⁶ it aakumi ambik kuwak aago nogo mugurok ya-mba agan wogo logonet, “Mondok enggaawak lek eerogo puwok o,” agan wogogwaarak.

Pawulut nen, “An aakumi yi yora o,” yoreegerak wone

³⁷ Kereewina mambuwok nduk eekwi iigak, at Pawulut nen it aap yigin unde inowe nogo yoge logonet, “Nowe o. Wone an ambi yokkiri o.” Yoge mbareegi, Pawulut yoge logonet, “Kat Yunani inoone keenu a?”

³⁸ Yoge nagagerik, “Aap Metit mendek ambi nen, Ninalik aruwok o, yinuk, aakumi iniki nggagangge nagaarik, aakumi a'nggan wogonaka ineebe ambik empat ribu wogoren, karume aakumi lek me piya nagaarak nogo ti, kat aret nogo lek a?”

³⁹ Yoge mbareegi, at Pawulut nen, “Ti an lek o. An aap Yakuri mendek aret. Ndi, o Kilikiya kota, Time kwak logone, mbako menggam Tarutut nogome aret nda'nagagirak naworak aret me, it aakumi an wone ambi yoroorak op ilik?”

⁴⁰ Yoge mbareegi, it yigin unde inowe nogo nen, “E o. Yoret o,” yoge mbareegi, at Pawulut nda'nggi paga wogorogon lagangge nagagerik, eenggi paga, “Puk logonip o,” yorage nagagerik, inoone nggobok yogo mbareegwa, Iberani inoone paga yorage logonet,