Nappiigak 18 - Ala Wone Peenok Peebi Mbanak

O Korindut logonet eereegerak wone

¹ Ti eeke nagagerik, at Pawulut nogo o Atena teppunuk, o Korindut nagagerak.

² O Korindut nage nagagerik, time logonet, aap Yakuri mendek ambi o Pondut nda'nagagerak endage Akwila, ndi, akweeluk endage Piritikila imbirak inom lambuneegerak. Aap endagembogut Kelawuriyut nen, “It Yakuri mendek o Oroma yime logorak lek o,” yinuk, wone lengganogo yoragagerak paga, aap akwe imbirak ti, awo nggeriluk o Italiya teppunuk, o Korindut wogogwaarak. Wogo nogogwaarik, time wonogo logonet,

³ mbogoyum o wuriyak yum penggaakwi me, Pawulut iya nage nagagerik, at kunduk, yum o wuriyak penggaakwi eenu me, inom logonet, penggaake nagagerak.

⁴ Eeke logonet, at Pawulut nogo kulinik-kalinik it Yakuri tamban eekwi paga it tamban eeko menggam unggunuk, it Yakuri inom, it Yunani mendek inom, it iniki abet mbaruwak nduk, Ala wone amburu mbanogo yorage nagagerak.

⁵ Ti'nuk, Tilat inom, Timotiyut inom, o Makendoniya nen wogo nogogwaarik, inom logonet, at Pawulut nogo alik ambi eeke logolik Ala wone ti mban yorage logonet, “Ala leenogo mippereegerak Mesias nogo ti, Yetut aret o,” yinuk, it Yakuri mendek yorage nagagerak.

⁶ Yorage me, it nogo inom ogookkologo logonet, miyuk-meya eerogo pogo mbareegwa, Pawulut nen, “Kit lek eerogo pinagarak ti, an nobaalombok lek o. Kit kinobaalombok eekkolamonggotak paga lek eerogo pinagagin o. Ndi, an yogondak nen it aap endekem mendek yoranet nege logogin o,” yinuk, it liippuwak nduk, mbogoyum liirubu lenggenak nogo yumbunogo inoba nappereegerak.

⁷ Ti eeke nagagerik, nogome nen wundi nanuk, aap Ala agabiti mbaka endage Titiyut Yutut ame it Yakuri tamban eeko menggam eraanu time wonage me ka wagagerak.

⁸ It Yakuri tamban eeko menggam unde menggerak Keriput nogo inom, at aaganapuri inom, iniki ninogoba Yetut oba panggombunuk abet mbareegwaarak. Ndi, it Korindut mendek ambik at Pawulut nen yoragagerak nogo konembunuk, abet mbako mbareegwa, yiime wuppiyareegerak.

^9-10 Ti'nuk, ne ambi nogo iniki paga ninogoba Yetut nen at Pawulut abinggaanggo paga yoge logonet, “An nimbirak wonage me, aakumi nen pippaganuk koorugun lek me, kagabiti nen puk logogun o. O kota yime an napuri ambik wonogwe me, yorage logot o,” yinuk,

¹¹ yoreegerak me, Ala wone mamunirage kagak tut 18 peneneegerak.

¹² Ala wone mamunirage wonage me, at Nggaliyo aakumi Akaya mendek inowe gubernur mi'ndak wonage kagak, it Yakuri mendek abok lambumbunuk ambugwi mi'nogo nogogwaarik, Pawulut pippunuk eebe wonok, wone amburu mbanggo menggam pi nogogwaarak.

¹³ Pi nogo nogogwaarik, “At aap yi, Ala alut eeko logorak wone yugu nogo kagak, alik eeko logowak nduk, aakumi iniki nggaganabit nege kenok, wonok wogo o.”

¹⁴ Yorogo mbareegwa, Pawulut nogo yoraakit nduk eeke kagak, Nggaliyo nen it Yakuri nogo yorage logonet, “At maluk ambi nggwok eeke, it o Oroma mendek nen wone lengganogo yo'nirogogwaarak kagak, abu alik eeke, eeke kenok, kit aap Yakuri nen yo'nugwi kiinok, naruk liirogon konenikit lak kwe,

¹⁵ kit wone yugu eeko logonet mbuulogwe-mbaalogwe eeko monggotak nogo paga yilumbunuk wone wakwi me, an nen wone amburu mbanogo yokkiroorak neebi o. Kit kinalik kinobaalombok koonggo logonip o,” yinuk,

¹⁶ wone amburu mbanggo menggam time nen mugogo wumbiyareegerak.

¹⁷ Wumbiige mbareegi, mi'nogo logonet, it Yakuri tamban eeko menggam unde menggerak at Totenet nogo, pigogo, wone amburu mbanggo menggam taa'nogo nen yawi wakwi iigak, at Nggaliyo nen, “Inobaalombok,” mba'nuk, puk agagerak.

Pawulut iyokan o Andiyokiya wagagerak wone

¹⁸ At Pawulut o Korindut time logonet, nogo ambik yege nagagerik, ti'nuk, ninoreewi Ala apuri time iigak, at Akwila akweeluk Piritikila imbirak inom yiiro paga o Tiriya woraawok nduk, eeko logonet, at Pawulut nen ambi eeriyak Ala enggaanom yoreegerak nogo ndak-ndak o Kenggereya taati at eeruwak mbaneegerak.

¹⁹ Eeruwak mbangge nagagerik, o Epetut wunda wogogwaarak. Wunda woraanuk, Pawulut nen Piritikila Akwila imbirak time piinok, at alik it Yakuri tamban eeko menggam unggwi nage nagagerik, it Yakuri mendek Ala wone piinogo yoragagerak.

²⁰ Yorage mbareegi, “Ninom yime ambinom logowok o,” yoreegwaarak kwe, “Lek o,” yorage nagagerik,

²¹ woraakit nduk eeke logonet, “Ala nen, Woroorak, mbake kenok, peebi kiya woraagin o,” yinuk, keyage wappiinok, o Epetut time nen yiiro paga

²² o Kayitareya wagagerak. Wage nagagerik, nogome nen at Pawulut o Yerutalem wage nagagerik, it Ala apuri time kuwak eekwi nogo keyage wappiinok, o Andiyokiya nagagerak.

²³ Time wonagagerik, ti'nuk, peebi o time lambembunuk, yi awi ndi awi o Nggalatiya inom, o Perigiya inom, yanggwagak nege logonet, Yetut oone waganggwi nogo iniki nu'lek logowak nduk, yoranet nege nagagerak.

Apolot nen o Epetut o Korindut eereegerak wone

²⁴ Ti yorenet nage kagak, aap Yakuri mendek ambi awi alom Alekandiriya endage Apolot nogo nen, Ala wone liiru mbanak irip-unggut abok eenu logonet, oone amburu lombok yorage menggerak me, o Epetut nagagerak.

²⁵ Nage nagagerik, ninogoba Yetut eereegerak wone at yogwi iinok, liirogon waganeegerak me, Yetut eeke nagagerak wone abet aret mamunirage, iniki aganggen kerek togon yorage, eeke nagagerak kwe, Aberiniki wambi wagagerak eenggo'lek, we Yaya yiime wuppiige nagagerak wone nogo mban eenu me yorage nagagerak.

²⁶ At agabiti lek logonet, it Yakuri tamban eeko menggam nogome wone yorage nagagerak. Yorage me, it Piritikila Akwila imbirak inaruk konenggo nogogwaarik, at Apolot wonok, iname nogo nogogwaarik, Ala eeke menggerak wone nogo liirogon mbinuk-mbenak eerogo yoreegwaarak.

²⁷ At Apolot nen o Akaya wunda naakit nduk, eeke mbareegi, it ninoreewi Ala apuri o Epetut mendek time nen, “Nage logot o,” yinuk, Yetut oone waganeegwaarak o Akaya wonogwe nen at keyage warogo waawak nduk, liiru mbanogo nappereegwaarak. Nappogo mbareegwa, wonok, wunda nage nagagerik, Ala inabuwa nen eeppiyareegerak paga abet mbareegwaarak nogo inom logonet, mondok iya lombok yeenggwaarage nagagerak.

²⁸ It Yakuri mendek at inom nggwok me wone wako logonet, at Apolot nen Ala wone liiru mbanak paga, “Ala nen leenogo mippereegerak Keritut ti, Yetut aret o,” yinuk, onggo yoriyak lek mondok lok kunik yorage nagagerak.