Nappiigak 15 - Ala Wone Peenok Peebi Mbanak

O Yerutalem kuwak eereegwaarak wone

¹ Nogome wonogwe me, it Yureya mendek ando o Andiyokiya nogo nogogwaarik, ninoreewi Ala apuri time yorogo logonet, “At Muta nen, Aap inagabolo mbaniyak o, yo'niragagerak nogo ti ndakndak eekkinaka'lek kenok, kit kinagap ndarigin lek o,” yinuk, yorogo mbareegwa,

² it Pawulut Mbaranabat imbirak it nogo inom wone nggwok wappunuk, ogoorak negen wonogo mbareegwa, it imbirak inom, it Andiyokiya mendek abet mbareegwaarak ando nogo inom, leenogo piinok, yorogo logonet, “Kit Yerutalem nogo logomonggotik, it nappiigak nogo inom, Ala apuri unde nogo inom, wone ti, kinom kooni nanip o,” yinuk, yorogogwaarak.

³ Yorogo nogogwaarik, it Ala apuri time kuwak eekwi nogo nen nappiya wogo mbareegwa, o Penitiya inom, Tamariya inom, yanggwagak eerit wogo logonet, it endekem mendek inomaluk mbo pereegwaarak wone nogo, mbininogo yorenet wogo mbareegwa, ninoreewi Ala apuri time wonogwe nogo nen iniki ale'nggen ambik aganabeegerak.

⁴ Aganake kagak, it o Yerutalem unggwi wogo mbareegwa, it Ala apuri o Yerutalem kuwak eeka inom, it nappiigak inom, it Ala apuri unde inom, nogo nen keyage waganako mbareegwa, “At Ala eeppinanege kagak ndogop eekoorak o,” yinuk, abok aret mbininogo yorogogwaarak.

⁵ Mbininogo yorogogwaarak kwe, it Pariti mendek wone abet mbareegwaarak ando nogo nen mi'nogo nogogwaarik, “Lek o. It endekem mendek kunduk, inagabolo mbanogo punuk, Ala wone yugu Muta liiru mbaneegerak nogo eeko logowak nduk yoroorak aret o,” yinuk, yorogogwaarak.

⁶ Yorogo mbareegwa, it nappiigak inom, it Ala apuri unde inom, wone ti, mbanuwok nduk, kuwak eeppogo nogogwaarik,

⁷ wone nogo koonggwi aret wonogogwaarik, at Peterut mi'na'nuk, yorage logonet, “Noreewi o. O maan at Ala nen, It endekem mendek obeelom wone konembunuk abet mbaruwak nen, yoranet nege logokit nduk, leenogo paneegerak nogo kineenu o.

⁸ At Ala aakumi iniki abok eenu me, nit Aberiniki wo'niragagerak kwak, it endekem mendek kunduk, at apuri eeginakerak mbaruwok nduk, Aberiniki wogoragagerak.

⁹ Ala nen, It yi, iya, it ti, meek, ninombakeelik nit ambit aret ninombake menggerak me, it kunduk, iniki abet mbakwi paga inomaluk lek eerogo piigerak o.

¹⁰ Togop me, nit inom, ninombomini inom, eyo aaninggin tapi inuut paga pogo mengga kwak ninoba luurogo pinaneegwaarak aaninggin abu meek kogo nogogurak wone nogo, kit yogondak nonggop nduk wone ti, it Yetut oone waganggwi inoba luurogo piinok, Ala nonggop eeppinanege kaamun? yinuk, abut mbanuwok nduk yogo ogotik?

¹¹ Lek o. Ninogoba Yetut ninabuwa nen obeelom eeppinanege menggerak ti paga nit ninagap ndake menggi kwak, it togop aret inagap ndake o, yinuk, abet aret mbako ogoorik o,” yoragagerak.

¹² Yorage mbareegi, it aap kuwak ogogwaarak nogo abok inoone lek puk ogo mbareegwa, Mbaranabat Pawulut imbirak nen Ala eeppiige kagak, it endekem mendek inenggela'me ineenu ariyak inagabiti warak mendek eekwi, eerubok mendek eekwi, eereegwaarak wone mbininogo yorogwe nogo inaruk koneneegwaarak.

¹³ Wone ti, inaruk konenggo nogogwaarik, Yakobut nen it yorage logonet, “Noreewi o. Wone yokkirage yi, liirogon konenggo logonip o.

¹⁴ Aa'nduk at Ala nen it aakumi endekem mendek nogo at apuri eerogo piinok endage piyanggo logowak nduk, inabuwa mba'nuk, inenggela'me nen kwaarogo miirinabeegerak wone at Timon nen mbininogo yo'niragaarak o.

¹⁵ Wone yo'niragaarak ti, Ala yorage kagak yoraga nen liiru mbaneegwaarak nogo ndak-ndak aret yo'niraga o. Ala nen yorage kagak yorogo logonet,

^16-17 Ti'nuk, peebi an wage logominggirik, It Iterali eegu yumbunik aakumi inenggela'me wonogwe nogo inom, Ndi, it aakumi endekem mendek abok aret, Nogoba Ala aret o, yogwe nogo inom, nen Inogoba Ala an mu'neren wogo logowak nduk, Ndawut awooliya wurik langgunnagagerak nogo obaane'me wuke, Yugum pak wurik langgunogo pereegwaarak nogo, obaane'me wuke logonet, aa'nduk wurik wonagagi kwak eerogo pege, Eerigin o.

¹⁸ At togop eeke menggerak o maan nen yereegerak nogo kinogoba Ala nen aret yereegerak me, yokkiragi o, yinuk, yoragagerak wone liiru mbaneegwaarak me, yokkiragi o.

¹⁹ Liiru togop mbaneegwaarak me, it endekem mendek iniki koombunuk Ala wone waganggwi nogo, iniki aaninggin ariyak mendek eerogo piyoorak lek o.

²⁰ We, wam kugi aanggo warak noorak mage o. Mbabi eeriyak mage o. Yi mendek ndi mendek amiya wungga'lek kagak warak kenok, noorak mage o. Amiya noorak mage o, yinuk, liiru mbanogo punuk wogoraawok o.

²¹ At Muta lengganeegerak wone nogo maan aa'nduk nen nok, yogondak kuli yi awi ndi awi Yakuri tamban eekwi paga it tamban eeko menggam lombok pekkagak yorogo menggaarak ineenu me, liiru togop aret mbanogo punuk, wogoroorak op aret mbaki o,” yinuk, yoragagerak.

It endekem mendek inake liiru mbaneegwaarak wone

²² Yorage mbareegi, it nappiigak inom, it Ala apuri unde inom, Ala apuri time kuwak eeko menggaarak nogo abok inom, nen, “Pawulut Mbaranabat imbirak nit yime mendek ambi inom leenogo o Andiyokiya nappiyaawok o,” yinuk, Ala apuri inoweewi ambi Yurat, endage ambi Mbaranabat inom, aap Tilat inom, leenogo piinok,

²³ nappiyaawok nduk, liiru mbanggo logonet, “Ninoreewi wa. Kinoreewi nit nappiigak inom, Ala apuri unde inom, nogo nen ninoreewi kit endekem mendek abet mbareegutak o Andiyokiya inom, o Tiriya inom, o Kilikiya inom, kit time wonogwe abok aret keyage wokkinako o.

²⁴ It ando ninom monggoorak nogo, nit nen nappiya woroolik kagak, kinowagam wogo nagaarik, Yogop ee'nip o, yinuk, yokkiragaarak nogo paga, kiniki taganogo pinagago mbaka, kiniki piirik wonogwe nogo, ninaruk konenggoorak o.

²⁵ Ninaruk konenggoorak me, yogondak nit kuwak eeppunuk, ninom monggoorak aap ando kinowagam woraawak nduk, niniki ambit eeppunuk, leenogo piinok,

²⁶ iniki nggaruk togon ninogoba Yetut Keritut wogogo nogogwaarik, Yetut ake kambuurak kenok op aret, mba'nuk, wone yoranet nogo nogogwaarak ninoreewi niniki kunik Pawulut Mbaranabat imbirak nogo, inom nappiya wogo ti o.

²⁷ Togop me, it aap Yurat Tilat imbirak nen liiru mbanak yi ndak-ndak mbininogo yokkiraawak nduk wonok nappiya wogo ti o.

²⁸ Aberiniki ninom nen kit eeko logorak mbakoorak nogo ti, aaninggin mendek ambinom kinoba luurogo pinagaga'lek, we, eeriyak mendek kenok mban eeko logorak mbakoorak nogo yi aret o.

²⁹ Kugi aanggo warak nunggwi, amiya nunggwi, yi mendek ndi mendek amiya wungga'lek kagak warak kenok, nunggwi, mbabi eekwi, eekwi nogo, kit eeriyak lek mbo pogo logonip o. Mbo pumonggotak ti paga, wone yugu nogo, Abu aret eeko agaarik o, yinuk, kinombako logogun o. Ninoreewi wa. Abu aret yokkirogo o,” yinuk, liiru mbanogo punuk, nappiyareegwaarak.

³⁰ Nappiigo mbareegwa, o Andiyokiya unggwi nogo nogogwaarik, it Ala apuri kuwak eeko menggaarak nogo kuwak eeppiinok, liiru mbanak ti, wogorogogwaarak.

³¹ Wogorogo mbareegwa, pekkogo nogogwaarik, iniki eyak warogo liiru mbanirogogwaarak kogo nogogwaarik, iniki ale'nggen ambik agagerak.

³² It Yurat Tilat imbirak Ala nen yorage kagak yoraga mendek me, it inoreewi Ala apuri time nogo yi wone ndi wone ambik yorogo logonet, iniki eyak wappiigwi, iniki kole eeginakwi, eereegwaarak.

³³ Time wonogo mbareegwa, it inoreewi Ala apuri time nen iniki ale'nggen agago piinok, iniyok paga it nappiya wogogwaarak nogo inowagam nappiyareegwaarak.

³⁴ Nappiyareegwaarak nogo wogwe iigak kwe, at Tilat perak, “Puk arikit,” mba'nuk, time aret puk agagerak.

³⁵ It Pawulut Mbaranabat imbirak ambime noolik, o Andiyokiya time wonogo logonet, it inom, aap ando ambik inom nen, ninogoba Yetut eeke nagagerak wone nogo mamunirogwe, yorogwe, eeko nogogwaarak.

Pawulut Mbaranabat imbirak ogookkologogwaarak wone

³⁶ Nogome wonogogwaarik, ti'nuk, peebi at Pawulut nen, “Yi awi ndi awi ninogoba Yetut eeke nagagerak wone nogo yoranet nogo nogogum nogome ninoreewi Ala apuri nogo, Nonggop wonogwe iyaamun? Pegiinet nawok o,” yinuk, at Mbaranabat yoreegerak.

³⁷ Yoge mbareegi, at Mbaranabat nen, “Yaya endage ambi toonak Marakut nogo ninom nawok o,” yoreegerak kwe,

³⁸ Pawulut nen, “At ninom noorak meek,” mba'nuk yoge logonet, “Nit o Pambiliya wonogo logonet, Ninom wone yoranet nawok o, yoreegurak kwe, Neebi o, yinuk, mbo pinaninuk mbaganeegerak me, yogondak ninom noorak lek o,” yoreegerak.

³⁹ Yoge mbareegi, it wone nggwok wappunuk, imbirak ogookkologo nogogwaarik, at Mbaranabat nen Marakut wonok yiiro paga o Tipurut aret nagagerak.

⁴⁰ Ndi, at Pawulut nogo perak, Tilat miike mbareegi, it ninoreewi Ala apuri nen, “Ala kinabuwa mbake, kinarum wonage, eeke logogin o,” yinuk, yorogo mbareegwa, nogo nogogwaarik,

⁴¹ o Tiriya inom, Kilikiya inom, yi awi ndi awi yanggwagak nugu logonet, at Pawulut nogo nen it Ala apuri kuwak eerit nogo menggaarak nogo iniki nu'lek logowak nduk, yoranet nege nagagerak.