Nappiigak 14 - Ala Wone Peenok Peebi Mbanak

O Ikoniyum logonet, eeko nogogwaarak wone

¹ O Ikoniyum time o Andiyokiya eereegwaarak nogo ndak-ndak eereegwaarak. At Pawulut kunduk, Mbaranabat kunduk, it Yakuri tamban eeko menggam unggwogo nogogwaarik, wone abe liirogon yorogogwaarak paga it Yakuri mendek inom, Yunani mendek inom, ambik aret iniki abet mbareegwaarak.

² Abet mbako mbareegwa, it Yakuri ando abet mbariyak ineebi mbareegwaarak nogo nen it endekem mendek nogo inanini ogo logomenggaarik, Yetut apuri inom ogooruwak nduk iniki nggagani nogo mbareegwa,

³ at Pawulut Mbaranabat imbirak time elaambirik negen logonet, inagabiti lek aret ninogoba Yetut abok paganogo yorogo nogogwaarak. Ndi, yorogo logonet, Ala inabuwa nen obeelom eeginake menggerak wone abet mbaruwak nduk, Pawulut Mbaranabat imbirak Ala omaawi wogoragagerak paga, ineenu ariyak inagabiti warak mendek eekwi, eerubok mendek eekwi, eeko nogogwaarak.

⁴ It o kota time menggaarak nogo inom ogooppunuk logonet, it ando Yakuri inoone waganggwi, ndi, it nappiigak nogo inoone waganggwi, eereegwaarak.

⁵ Eeko logonet, it endekem mendek nogo inom, it aap Yakuri mendek inom, it inoweewi nogo inom, iniki ambit eeppunuk, Pawulut Mbaranabat imbirak ale-pale eerogo yugum paga toguurit inooruwok nduk, koonogo pereegwaarak kwe,

⁶ it eeppiyoorak koonogo pereegwaarak wone nogo Pawulut Mbaranabat imbirak inaruk konembunuk, kole o Likawoniya wogo nogogwaarik, o kota Litera inom, o kota Nderebe inom, o time enaagan-ambokan yanggwagak nogo logonet,

⁷ wone obeelom wone time yoranet nugu nogogwaarak.

O Litera, Nderebe logonet, eereegwaarak wone

⁸ O Litera time aap ambi iyok maluk itok nda'nagagerak tu negeelik, iyok yiligu mban menggerak nogo,

⁹ at Pawulut wone yorage aruk konengge wonage me, Pawulut nen enegen looge nagagerik, “Aap yi obeelom ee'naburak mba'nuk iniki Ala oba panggombunuk abet mbake,” yelok kage nagagerik, at yoge logonet,

¹⁰ “Kiyok nggik togon mi'naru o,” yinuk, oone nggwok paga yoge mbareegi, at nogo pilak togon mi'na'nuk, nege nagagerak.

¹¹ At Pawulut eereegerak nogo, it aakumi kuwak eeri wogogwaarak nogo inigen kogo nogogwaarik, it Likawoniya inoone paga, “Kugi aakumi negen a'nuk, niya wambi waga o,” yinuk, ina'mit yereegwaarak.

¹² Ina'mit yogo nogogwaarik, inagugi endage nogo aret Mbaranabat endage Tewut toonggwi, ndi, Pawulut wone mbangga kenok, endage Keremet toonggwi, eereegwaarak.

¹³ Eeko mbareegwa, at kugi Tewut awi wurik o kota endekem nggwe wonagagerak unde nogo nen, “Aakumi ninom nen o kota tu unggwogo menggam taa'nogo it nappiigak nogo inaanggo warogo wogoraawok o,” yinuk, tapi ngguunok inom, iri'ngga-kale'ngga laambu mendaarak inom, wonok wage nagagerik, “Wogoraawok nduk eekwi o,”

¹⁴ yogwe nogo it nappiigak Mbaranabat Pawulut imbirak inaruk konembogo nogogwaarik, inambogoyum endekem nggwe mendek nibinogo punuk, puu'nuk aap ambik aago wonogwe me unggwi nogo nogogwaarik, yorogo logonet,

¹⁵ “Wologo wae. Nit kit kokwak abe aakumi aret me, kit nonggop nduk yogop eeko ogotik? Kit yi eekak ndi eekak aanom warogo eeko monggotak yi, mbo punuk, at mbogut inom, nggween inom, yi nggwok yenggenak laut inom, yi mendek ndi mendek abok wakkagagerak Ala eenik menggerak nogo wone waabagip nduk, obeelom wone wonok yokkira wogoorak kagak kwe, eeko ogotik o.

¹⁶ O maan nen, yogondak kuli yi paga yi aakumi ndi aakumi iniki mba'nuk eerit nogwe iigak, Ala nen teppiige menggerak kwe,

¹⁷ at nogo eebe yelok kaabagip nduk, eeppinagageelik ti lek o. Kinabuwa nen obeelom eeppinagage logonet, yi mendek ndi mendek kole aruwak nduk, mbogut paga nen mayu wokkirage, kiniki ale'nggen mbarubagip nduk mbi ka'let eerogo wokkirage, eeke menggerak o,” yinuk, inoone omaawi paga yorogogwaarak kwe,

¹⁸ kagak, inaanggo waruwok nduk, eereegwaarak mendek, mage nabenak mban yorogo mbareegwa, nggininogo teppereegwaarak.

¹⁹ Teppogo mbareegwa, it aap Yakuri mendek o Andiyokiya inom, o Ikoniyum inom, nen wogo nogogwaarik, it inom aruwok nduk, aakumi inikime manabi nogo mbareegwa, it aakumi nogo nen Pawulut yugum toguurit wappogo nogogwaarik, “Abu kanggi o,” yinuk, niigogo o kota endekem nggwe mbo wumbereegwaarak.

²⁰ Mbo wumbogo mbareegwa, it Yetut oone waganeegwaarak nogo nen at eebe oolo kagak, ninggippunuk wonogo mbareegwa, mi'nage nagagerik, o kota nogome unggwi nagagerak. Unggwage nagagerik, nogo yippunuk, ko'lu Mbaranabat imbirak o Nderebe wogogwaarak.

Iniyok paga o Andiyokiya wogogwaarak wone

²¹ Aakumi o kota Nderebe time obeelom wone yorogogwaarak paga aakumi ambik abet mba'nuk Yetut oone waganeegwaarak. Waganggo mbareegwa, it wogogwam o Andiyokiya iniyok paga nogo logonet, o Litera unggwogwe, Ikoniyum unggwogwe, eerit o Andiyokiya unggwi nogogwaarak.

²² O nogome yanggwagak nogo logonet, “At Ala abu'me unggwi noorak ti, aaninggin-paaninggin ninoba arit unggwage tit kagak aret unggwi noorak o,” yinuk, it Yetut oone waganeegwaarak nogo, iniki eyak wappiigwi, “Wone abet mbakotak nogo mbo puurak mage o. Ata, kiniki nu'lek eeppunuk logonip,” yinuk, kini wuppiigwi, eerit nogogwaarak.

²³ Ala apuri kuwak eeko menggam lombok unde logowak nduk, Pawulut Mbaranabat imbirak nen aap leenogo mippiigo nogogwaarik, mbi nengga'lek inambe mage negen logonet, “Ninogoba o. It aap yi, iniki koba panggombunuk abet mbakaarak me, eerit nugwi iigak, liirogon inarum logomunggun o,” yinuk, inake tamban eereegwaarak.

²⁴ Inake tamban eeko nogogwaarik, o Pitiriya unggwagak, o Pambiliya unggwi wogogwaarak.

²⁵ O kota Peraga nogome wone yorogo nogogwaarik, o Ataliya unggwi woraanuk,

²⁶ time nen yiiro paga o Andiyokiya wunda wogogwaarak. “Ala eyabu eeri nawak nduk, Ala kinabuwa mbake me kinom namunggup o,” yinuk, nappiyareegwaarak eerit nogo nogogwaarik, abu nggobok togon eeppunuk, nappiyareegwam nogome aret wogogwaarak.

²⁷ O Andiyokiya unggwi wogo nogogwaarik, Ala apuri nogo kuwak eeppiinok, Ala eeppiige kagak eeginabit nogo nogogwaarak nogo inom, ndi, Ala nen it endekem mendek ninogoba Yetut oone abet mbaruwak nduk, tu koonogo piyareegerak nogo inom, wone mbininogo yorogo nogogwaarik,

²⁸ it o Andiyokiya Yetut oone waganeegwaarak nogo inom logonet, nogo apit yereegwaarak.