Nappiigak 11 - Ala Wone Peenok Peebi Mbanak

Endekem mendek Ala wone waganeegwaarak Ala apuri o Yerutalem yoragagerak wone

¹ It nappiigak inom, inoreewi o Yureya time mendek inom, nen aap endekem mendek kunduk Ala wone waganggwi inaruk koneneegwaarak me,

² at Peterut o Yerutalem wage mbareegi, it inagabolo mbanak mendek ando nen at Peterut yogo logonet,

³ “Kat nonggop nduk it inagabolo mbanak lek mendek iname iya unggwage nagandik, kinom lambunik mbi nenggendak o?” yinuk, inoone maluk yoreegwaarak.

⁴ Inoone maluk yogo mbareegwa, at Peterut nogo nen wone alom abok liirogon mbininogo yorage logonet,

⁵ “Lek o, nogobamini. An o kota Yope nogome tamban eeke wonage me, nambuluk pereegerak negen neegak nabinggaanggo kage logonet, mbogoyum tabak irip agi-ogu, aru-ogwe pippunuk mbogut paga nen nowagam wuppi wogwe nenegen kagarak.

⁶ Nenegen maloppege nagarik, towe-pagi inom, ndiimbu-nggwiya inom, weret-mbonon inom, abok aret yonggolak kagarak.

⁷ Kage mbaki, oone yo'nege logonet, Peterut wae. Mi'na'nuk, yi ambi warogo namen o, yo'nege naruk konenggirak.

⁸ Yo'nege naruk konenggirak kwe, A, lek o, nogoba o. Nunggulik mendek inom, noorak mage yugu mendek inom, an abu nenggeelik me, noorak neebi o, yoge mbaki,

⁹ mbogut paga nen oone ambinom yo'nege logonet, At Ala we ugun nonggo logorak eerogo pereegerak kagak, kat nen, Noorak mage agago pugun o, yo'nege kagarak.

¹⁰ Ne kenagan paga togop yo'nege nagaarik, yi mendek ndi mendek yonggolak nogo, yum ambe nggerok togon wonok mbogut paga lagangge kagarak o.

¹¹ Wonok lagangge kage nagagirik, an oome wonage me, aap kenagan o Kayitareya nen an mu'neren nappiya wagaarak nogo endekem ari wagaarak wonogwe iigak,

¹² Aberiniki nen an yo'nege logonet, Kiniki yungguppegak eerugun o. Aap ti, kinom mbet-mbet aret nak o, yo'nege mbaki, noreewi ineebe 6 yi, ninom nogo nogoorik, aap Koreneliyut ame aret unggwi nogoorak.

¹³ Unggwi nogo mbako, at nogo nen wone mbininogo yo'nirage logonet, Malayikat ambi an name unggwegerak mi'ndak wonage nenegen kage mbaki, yo'nege logonet, Aap Timon endage ambi toonak Peterut nogo woraawak nduk mugurok o Yope nappiyet o. Nappiyamenggendak yori nogwe iinok, wage logomenggerik,

¹⁴ kat kaakkapuri kinom kinagap ndaruwak nduk, wone yokkira woraagin o, yinuk, yogerak wone nogo an yo'negerak.

¹⁵ Yo'nege mbaki, an it yoraakit nduk eeke neegak, aa'nduk Aberiniki ninoba wuppi wagagi kwak, it kunduk inoba wuppi wage mbaki,

¹⁶ ninogoba Yetut nen ari logonet, At Yaya yiime wuppiige nagagerak kwe, peebi an nen Aberiniki kinoba wuppi woraagin o, yereegerak wone nogo aret niniki abekirak o.

¹⁷ Togop me, niniki ninogoba Yetut Keritut oba panggombunuk abet mbako mbareegu, Aberiniki we aret wo'niragagi kwak, it nogo wogoragaarak me, Ala nen eeriyak koonggerak nogo, an nonggop togon non mbanogo puurak mbakop? Meek me, puk agarak o,” yinuk, Peterut nen inagabolo mbanak mendek yoragagerak.

¹⁸ Yorage nogo inaruk konembunuk, it togon inoone lek puk aret wonogogwaarik, “Ti kenok, Ala nen it endekem mendek nogo kunduk, it maluk eeko menggaarak iniki koombunuk mbo pugwi iinok, ineenik logorak koonogo piyareegerak kogo o,” yinuk, Ala wogoppereegwaarak.

Ala apuri o Andiyokiya eeko nogogwaarak wone

¹⁹ At Tepanut yugum toguurit wako nogogwaarik, it ando inooruwok nduk ale-pale eeginabit nogo mbareegwa, ma'nogo nogogwaarik, o nda time yanggwagak nogo logonet, o Penitiya inom, Tipurut inom, Andiyokiya inom, it Yakuri mendek mban wone konenuwak nduk, yoranet nugu nogogwaarak kwe,

²⁰ it ando o Tipurut mendek inom, o Kirene mendek inom, nen perak, o Andiyokiya unggwogo nogogwaarik, it aakumi Yunani mendek nogo inom konenuwak nduk, ninogoba Yetut wone obeelom wone nogo yorogo nogogwaarak.

²¹ Ninogoba omaawi eeppiige kagak yorogo nogogwaarak me, aakumi ambik iniki koombunuk, abet mbako nogogwaarik, ninogoba Yetut oone waganggo nogogwaarak.

²² It Ala apuri o Yerutalem kuwak eekwi nogo nen eereegwaarak nogo konembogo nogogwaarik, at Mbaranabat o Andiyokiya nappereegwaarak.

^23-24 At Mbaranabat nogo iniki kwi'ndak me, iniki abet mbake logonet, yungguppegak eeke logolik Aberiniki inikime mondok liinik wonage me, nappereegwaarak. Nappereegwaarak nage nagagerik, at Ala iniki kunik en eeppiige nogo enegen kage nagagerik, iniki ale'nggen ambik a'nuk, “Kit kiniki mondok nu'lek logonet, ninogoba Yetut oba panggombunuk logonip o,” yinuk, inaruk wake nagagerak. Inaruk wake inom wonage me, ambi nabek unggwagak mban eeko logonet, Ala apuri ambik aret ogogwaarak.

²⁵ Ti'nuk, peebi, at Mbaranabat nogo nen Tawulut kwaarikit nduk o Tarutut nage nagagerik,

²⁶ kwaappunuk wonok, o Andiyokiya wagagerak. Wonok wage nagagerik, imbirak logonet, Ala apuri inom kuwak eekwi, aakumi ambik wone mamunirogwe, eekwi iigak, tahun ambit aret eereegerak. It Yetut oone waganeegwaarak, “Keritut Apuri o,” yogwe nogo ti, aa'nduk o Andiyokiya nen aret yogo nogogwaarak.

²⁷ Time mamunirogwe iigak, it Ala nen yorage kagak yoraga mendek ando o Yerutalem nen o Andiyokiya lagi nogogwaarak.

²⁸ Lagi nogogwaarak nogo ambi endage Agabut mi'nage nagagerik, yorage logonet, “It aap o Oroma mendek unde menggam yi awi ndi awi abok aret mbi noogelo ambik arigin o,” yinuk, Aberiniki nen iniki nggaganogo yoge kagak, yoragagerak. (Ti arigin yoragagerak nogo ti, at Kelawuriyut endagembogut logonet wone lengganogo yorage kagak, a'me aret agagerak.)

²⁹ Yoragagerak nogo mbi noogelo age mbareegi, it Yetut oone waganggwi nogo nen iniki koonggo logonet, “Nit ninalitak ninamendek wonage nakkagak, kuwak eeppunuk, ninoreewi Ala apuri o Yureya wonogwe nogo inake nappiyaawok o,”

³⁰ yinuk, kuwak eerogo punuk, Mbaranabat Tawulut imbirak nappiya wogo mbareegwa, it nen wonok, Ala apuri o Yerutalem inarum menggaarak nogo ira wogogwaarak.