Nappiigak 1 - Ala Wone Peenok Peebi Mbanak

NAPPIIGAK

^1-2 Teyopilut wae. At Yetut nen yi eekak ndi eekak eeke, wone mamunnirage, eerikit nduk wagagerak nogo wareneegerak kuli nen nok, Aberiniki inikime logonet, at leeninabeegerak awuri nappiigak nogo wone lengganinake nagagerik, mbogut paga wonok laganeegerak kuli eeke nagagerak nogo abok aret mbuku aa'nduk nogo paga mbaneegirak.

³ At wareegwaarak nogo eenik age nagagerik, “It nawuri ti nen an abet aret neenik agarak ineenu aruwak o,” yinuk, nigiige, ndi, Ala abu'me piyoorak wone nogo yorage, eerit nage kagak, nogo 40 aret yege nagagerak.

^4-5 Ne ambi paga at awuri inom mbi nonggo logonet, it yorage, “At Yaya nen yiime wuppiige nagagerak kwe, ne mande negen logonuk Aberiniki kinoba wuppinagi woraagin me, kit o Yerutalem teppunuk nagup o. Nogoba nen, Wokkiraagin o, yinuk, abok yereegerak an yokkirage nagarak nogo, wokkiraawak nduk, tokkogo logonip o,” yinuk, wone lengganogo yoragagerak.

Yetut wonok mbogut paga laganeegerak wone

⁶ It nogo Yetut inom kuwak eeppunuk logonet, at yogwi, “Ninogoba wae. Aa'nduk nit Iterali mendek ninoweewi nen inabu'me pinaninuk wonogogwa kwak nit yogondak togop logowok nduk eeppinanumunggun ilik?” yinuk, yoreegwaarak.

⁷ Yogo mbareegwa, Yetut nen it yorage logonet, “Nineyom-naneyom eeko logorak nogoba Ala alik unde logonet, koonogo pereegerak ti, kit kineenu ariyak lek o.

⁸ Kit nogo Aberiniki kinoba wambi wage logonet, at omaawi eeppinagage kenok, o Yerutalem inom, o Yureya abok inom, o Tamariya inom, yi awi ndi awi irip-irip time abok aret inom, an eerit nege kinigen neego nogogutak wone nogo yoranet nugu logomunggup o,” yinuk, yoragagerak.

⁹ Wone ti yorage nagagerik, ina nigagik iigak, wonok lagi nage mbareegi, ameraakot enggela'me nobareegerak o.

¹⁰ At mbogut paga lagangge kagak, ina awo nigagik wonogwe me, aap mbere mbogoyum yanggwi negen yirik nu'lek me inowagam mi'nari wa'nuk, yorogo logonet,

¹¹ “Kit aap Nggalileya mendek yi wae. Nonggop nduk mbogut paga kina nigagik mban ogotik? At Yetut eebe kit kiigak mbogut paga wonok lagi nage kinigen kogotak ti, ndak-ndak peebi at eebe togop aret wambi wage kinigen kaamunggup o,” yinuk, yorogogwaarak.

Yurat obaane'me mippereegwaarak wone

¹² Yorogo mbareegwa, it Yakuri tamban eekwi paga tu nda noorak kenok, “Ti kuli mban ari nogo logorak,” yugu nogo ndak-ndak aret it puut Tayitun paga nen o Yerutalem iniyok paga wambi wogogwaarak.

¹³ O kota Yerutalem unggwi wogo nogogwaarik, it wonogo menggam tilaabaga nogome lagi nogogwaarak. It lagi nogogwaarak nogo ineebe ti, Peterut Yaya imbirak, Yakobut Andereyat imbirak, Piliput Tomat imbirak, Mbarotolomeyut Matiyut imbirak, Alepeyut aput Yakobut togon, at “Ninalik aruwok o,” yaga Timon togon, Yakobut aput Yurat togon, nogo aret.

¹⁴ It kumi ando inom, at Yetut agalo Mariya inom, Yetut awuri ambokan mendek inom, time inom lambunik logonet, iniki ambit a'nuk tamban mban eeko nogogwaarak.

¹⁵ It time wonogwe iigak, ne ambi paga it aakumi abet mbareegwaarak nogo ineebe seratus dua puluh negen kuwak eereegwaarak inenggela'me Peterut nogo mi'nage nagagerik,

^16-17 yorage logonet, “Nowe-nawot o. At Yurat ninom Yetut oone woppunuk, at eyabu eeko logowok nduk leenogo mippinaneegerak kwe, at eeriyak wone o aa'nduk togon Aberiniki nen Ndawut yoge kagak yereegerak Ala wone liiru mbanak nogo, a'me lik yuwak nduk, at Yurat nen yorage mbaki, Yetut eebe pigaganggaarak o,” yinuk, yoragagerak. (

¹⁸ At Yurat maluk eereegerak onggo wu pugu nogo paga nggween onggo pereegim taa'nogo aret ogobak toguk ngginnage nagagerik, aanogum tubuk ari logonet, aanagale tigitogon kilu-kilu wundeegerak.

¹⁹ Kilu-kilu wundeegerak yogwe nogo, it Yerutalem mendek abok inaruk koneneegwaarak me, nggween onggo pereegim endage it inoone paga ti, “Akendama aret,” yogo nogogwaarak. Ti nit ninoone paga, Amiya Wundeegim, aret o.)

²⁰ At Peterut nogo wone ti, yorage nagagerik, ambinom yorage logonet, “At ame nobok lek aret wonogwe, At wonagagim aakumi yinggak-unggwagak eeka'lek wonogwe, Eerak logowak o, yinuk, yereegerak. Ndi, ambi ari logonet, At obaane'me eeke logowak nduk, aap alik ambi mippuwak o, yinuk, mbuku Ndawi mbanak nogo paga mbanak wonage me,

^21-22 aap ambi Yetut eenik agago mippereegerak enegen kagagerak kenok, ninom wone ti paganogo yoranet nugu logowok nduk at Yaya nen Yetut yiime wuppereegerak kuli paga nen, nok, Yetut ninenggela'me nen mbogut paga wonok laganeegerak kuli it kulinik-kalinik ninogoba Yetut ninom nugu nogogurak nogo mendek kero ambi leenogo mippuurak agaarak me, mippuwok aret o,” yinuk, yoragagerak.

²³ Yorage mbareegi, mippuwok nduk aap mbere punogo piyareegwaarak. Aap eebe ambit aret kwe, endage kenagan, ambi Yutup, ambi Mbaratabat, ndi, peebi toonak, Iniki Koonak, nogo punogo pugwi, ndi, aap ambi endage Matiyat punogo pugwi,

^24-25 eeppogo nogogwaarik, tamban eeko logonet, “Ninogoba o. Yi aakumi ndi aakumi iniki mbakwi abok keenu me, at Yurat ninom kat keyabu eerit nugu logowok nduk leenogo pinaneegindak kwe, teppinaninuk at noorak miikkolagagim nogome aret nagaarak me, it aap mbere punogo pigoorak yi, at obaane'me mippuurak koonogo pegendak nogo, yo'niret o,” yinuk,

²⁶ tamban eeppogo nogogwaarik, “Aap yi mippuwok a, at yi mippuwok a?” yinuk, imbirak inendage liiru mbanogo punuk, Matiyat endage mbanak nogo waganggo nogogwaarik, it aap 11 nappiyareegerak nogo inom logowak nduk at Matiyat aret leenogo mippereegwaarak.