Nakum 1 - Ala Wone Peenok Peebi Mbanak

NAKUM WONE

¹ At Ala nen o Niniwe eeppiyoorak aap Nakum awi Elokoti mendek abinggaanggo paga yoreegerak mbuku mbanak nogo yi aret.

Ala anini inoba piyoorak wone

² Aliku ALA nen, “Nalik nalut eeruwak lak, it ando inalut eekwi yi, neebi a,” yinuk, mbake, At mbo pugwi iinok, onggo eeppiige, Aliku ALA mbo punuk, ugun eekwi iinok, onggo eeppiige, Anini lombok mi'nage logonet, maluk eeppiige, At Aliku ALA inom ogoorak nogo anini inoba kwippiige, At inom wim mbanak eeppiyoorak mbake nogo inikime tebenak wonage, Eeke menggerak o.

³ At Aliku ALA ti, iniki yanggoppunuk wonage, At omaawi mondok nggwok lombok wonage, Eeke menggerak kwe, It aap maluk eeko menggaarak inomaluk onggo eeppiyaagin lek ti lek, eeppiyaagin aret o. O wiya oone pu warit wage logonet, nombok-kombok eeke kagak at enggela'me wage, Aap tu paga nage logonet, iyok paga liirubu aa'ngga eerogo pit nage menggi kwak, At o ndugwi paga nage logonet, togop eerogo pit nage,

⁴ At nen niyo nggwok yenggenak laut nogo porok yuwak nduk, mberege, Niyo abok poro-poro nawak nduk, eerogo pege, Eeke menggerak o. At wage kagak, o Mbatiyan inom, Karemen inom, nggween mbuk arit nage, O Libanon iri'ngga ambiki warak nogo teebat neyo-neyo nage,

⁵ At wage kagak puut-puut na'ndo-wa'ndo eeke, Puut-puut teberogon amburu tigi-tigi wundit nage logonet lek age, At wage kagak o nggween inom, yi mendek ndi mendek nggween paga wonage nogo abok aret inom, inaganak wake, Eeke kagak,

⁶ Aliku ALA anini nen eeppiige nogo, aap ta nen ko wappunuk, logogin mbakop? At anini kani kunik negen eeke kagak, aap ta nen ogogumbuk puk arigin mbakop? Lek aret o. At anini kani kunik negen yumbunogo wuppi wage nagaarik, Enegen kagak, puut-puut yanggu-yanggu wambit wage kagagirak o.

⁷ Aliku ALA ti, obeelom lombok wonage, Aaninggin inoba kwi'nage kenok, ineebe op logorak eeppiiga at aret wonage, Iniki at oba panggonak wonogwe nogo, liirogon inarum wake, Eeke menggerak kwe,

⁸ Niyo wu'nuk wage logonet, yi mendek ndi mendek taanogo pit nage menggi kwak, At inom wim mbanak inenggaawak lek eerogo piige, At inom ogoorak nogo mugogo kanggo menggam o apit me nappiige, Eerigin o.

Ala nen o Yekura inom, o Niniwe inom, eeppuurak wone

⁹ It Niniwe mendek nen at Aliku ALA eeppuurak iniki koonggwi nogo, at nen lek eerogo pege, Ne mbere lek, ne ambit liingge aret lek eerogo piige, Eerigin o.

¹⁰ Alok ndele aago menggi kwak, Niyo kumili kunggwi mendek nenok neyak-kweyak agan nogo mengga kwak, at inom wim mbanak ti, togop aret agan nogwe iigak, Wiiringga wiirik kani ne ambit pup eerogo nengge menggi kwak, it togop aret lek eerogo piyaagin o.

¹¹ Aap ambi o Niniwe time mi'na'nuk Aliku ALA maluk eerogo puurak koongge, Maluk ndogop eeko logowok o, yinuk, koonogo punuk, yorage, Eeke me nduk, yagi o.

¹² Aliku ALA nen ari logonet, “It aakumi Atiyut mendek o Niniwe wonogwe nogo, ineebe enaani ndegenak inomaawi ambik aret wonogwe kwe, Inoorit namenggaarak inenggaawak lek aret arugun o. It an napuri ti, aaninggin-paaninggin kogo logowak nduk, eerogo piyareegirak kwe, ambinom eerogo piyaagin lek o.

¹³ Eyo aaninggin tapi inuut paga pogo mengga kwak, it Atiyut mendek nen aaninggin an napuri inoba kwippiyareegwaarak nogo, an nen kalenogo nappege, Ineenggi-iniyok keele maarak negen wonogwe nogo, an nen piinogo piige, Eerigin o,” yinuk, ari kagagirak o.

¹⁴ At Aliku ALA nen kit Atiyut mendek o Niniwe wonogwe eeko logorak yokkirage kagarak nogo yi aret. “It inendage ki eeko logowak nduk, inombowologwe nda'nogo logogun mondok lek aret o. Inagugi awi wurik me inagugi ogut aago wonage inom, mbuti paga inagugiwak eerak nogo inom, lek eerogo pege, It Atiyut mendek ti, ineraambe abu maluk lombok me, nggween taambiyoorak inake pipuk eerogo piige, Eerigin,” yegerak o.

¹⁵ Aap wone yonggo wonok puut-puut paga iyok pit wage logonet, “Kinagabiti lek kiniki ugun tayenak logonip o,” yinuk, agan wage ti, kinigen pekkaanip o. It aakumi kinom ogoorak nogo mondok lek eerogo piyaawak nduk, eeppiyaagin me, Ambinom tebenogo pinagawak nduk, woraagun lek o. Togop me, kit Yekura mendek yi wae. Laago lako logorak yugu nogo kinale'nggen paga lakwi, An yogop eeke logogin o, yinuk, kumbuk mbanggwi nogo ndak-ndak eekwi, Eeko logonip o.