Mika 7 - Ala Wone Peenok Peebi Mbanak

Iterali inobaabut maluk agagerak kenok yoragagerak wone

¹ An ti, nabuwa o! Anggur anggen irip me agaatak mbanggwi kwak, an anggen naakit nduk kwaarit nege kwe, togo'mbet yugu mban kage, Wuliinggen abe amburu warak, “Naakit lak, ao,” mbake kwe, lek kage, Eeke me,

² It aap Ala mugurok nogwe nogo, o yime inenggaawak lek aret iige, Aap iniki abe koonak ambiriluk ambi lek aret kage, Eeke agarik o. It abok aret aakumi inooriyak nduk, enaarak negen wonogwe, Towe yilunggagak yum yugu wonok nugu mengga kwak, it ambi nen inoreeluk ambi wariyak nduk eerit nugwi, Eeko agaarik o.

³ Maluk eeriyak abu ineenu paga eerit nugu agaarik o. Inarum waka inoweewi nen, “Onggo pinip,” yorogwe, Inowak loongga nen inawone abe mbanuwak nduk, onggo waganggwi, It aap inayuk warak nen it eeriyak mbakwi nogo mban wone lengganogo yorogwe, Eeko logorak wone yugu abe koonak kagak nomok-komok eerogo pugwi, Eeko agaarik o.

⁴ It aap ti abok aret ineraambe maluk lombok wonogwe kwe, inenggela'me ambiriluk ambi eraambe mbuuluk obeelom negen wonage nogo ti, alok kwak wonage, Ndi, it abok iniki nggolawe wonogwe kwe, it inenggela'me ambiriluk ambi iniki mbuuluk abe koonak wonage nogo ti, poondo alok kwak wonage, Eerak aret menggaarak o. It inigen wokkiren nega woroorak yokkirogo menggaarak nogo, ne muk ari wagaarak wonage, At Ala pekkiya woroorak ne nogo, muk ari wagaarak wonage, Eerak aret me, O yogondak naalop-kaalop eeginaburak abu aret agaarak o.

^5-6 Aap aput wulaga nen ogoba meek eerogo pege, Apuluk kolaga nen mi'nage logonet, agalo imbirak ogookkologwe, Enggelo nen enggelo imbirak ogookkologwe, Aap ambi inom wim mbanak ti, owe-awot aret wonogwe, Eerugun me, Kinom monggotak kiniki inoba panggombugwi, “Ninore aret o,” yinuk, it inoba panggonak wonogwe, Eeriyak mage o. Ndi, kwe ambi kinaawi paga windak aruk konengge kero, kinoone yogwe nogo liippogo logonip o.

⁷ Togop aret kwe, an nogo, an nen at Ala yoge nogo aruk konenigin me, Aliku ALA yeenggwa niri wage kero, nenegen wonage, Niniki lunik nagap ndaka ninogoba Ala nogo neya wage kero, tokkage, Eeke agarik o.

Ala nen inagap ndariyak wone

⁸ Ninawim mbanak kit yi wae. Nit yigeebu wanggoorak wonogwe kwe, mi'nogwe, Nit o apit aago paga wonogwe kwe, Aliku ALA nen eya eerogo pinanege, Eerigin me, Nit eeppinanegerak paga, “Op eeppiigi,” yinuk, ninagi'ndok kambuurak mage o.

⁹ Nit Ala abet aret maluk eeppogoorak me, Aliku ALA ninawone mbangge, “Eekaarak onggo ndogop eeppiyoorak o,” yinuk, a'me nggelok eerogo pinanege, Eeka'lek kagak, At anini eeppinanege nogo, “Op aret o,” yinuk, waganggo logogun o. Nit o apit me nen wo'niren o eya paga pinani wage, A'me nggelok eeppinanege, Eeke kaagun o.

¹⁰ “Kit kinogoba Aliku Ala nogo ngge o?” yinuk, yo'nirogogwaarak ninawim nogo nen nit ee'ninake ti, Inigen niigo logomenggaarik, inenggali nen inete wandinik logonet, nogo logogun o. It tebenogo piinok, purok tu paga iniyok amok mbanggo mengga kwak, togop eeppiige iyaagun o.

¹¹ Kat Yerutalem yi wae. Kayugum pak obaane'me wurogo pege, Kanggween kuli pugu ambe wigak togon eerogo pege, Eeriyak eyom panggoni woraagin o.

¹² Ne ti eyom paga aakumi o Atiyut nen nok, o Metit kota-kota kuli inom, O Metit nen nok, niyo Eparat kuli inom, Niyo nggwok yenggenak laut ambime nen nok, laut ambime kuli inom, Puut ambime nen nok, puut ambime kuli inom, abok aret kat Yerutalem aret keya unggwi wogo logogun o.

¹³ Aakumi o yime menggaarak nogo nen maluk eerit nogo nogogwaarak paga o yi, o wogo aret arigin o.

Iterali inabuwa mbareegerak wone

¹⁴ Kaliku ALA wae. Keyate negen kapuri kiniki kundugu ndomba kuwak aago kwak logonet, Eyonggaame iri'ngga abu mili nenet nugu menggam wonogwe nogo, yawi paga teeriren nege logot o. O aa'nduk togon iri'ngga mbanogo nenet nogo nogogwam O Mbatiyan paga, o Nggileyat paga, nenet nugu logowak nduk, teppiyet o.

¹⁵ O maan togon kat o Metit nen wogoren wundi wage logonet, eereegindak nogo kwak, Eerubok mendek ambi eeke keyaawak nduk, eerumunggun o.

¹⁶ Ti eeremenggendak paga yi aakumi ndi aakumi inigen kogo logomenggaarik, “Nit ninomaawi paga eeriyak meek kogo o,” yinuk, Inenggali nen inoone ambi yaga'lek inaruk logu negen eeppunuk logogun o.

¹⁷ Waalo liirubu paga amuli yenan-menan eerit nege menggi kwak, Yi waalo ndi waalo inaanogum paga tu agan nggween paga nugu mengga kwak, It togop aret iname nen inaganak warit wundi woraanuk, inagabiti mbakak Kaliku inogoba Ala kowagam wogwe, Kat paga inaganak warit wogwe, Eerugun o.

¹⁸ Keyate kwak kapuri kiniki kundugu ando yumbunik nogo, maluk eekwi iinok, inomaluk lek eerogo pege, Kat koone yugu taganogo pugwi iinok, mbo punuk, mari eerogo pege, Eeke menggendak kat Ala kwak ambi ta wonage? Lek aret o. Kanini mondok-mondok ninombaka'lek ninabuwa lombok ninombake logorak kinikilom mbake menggendak me,

¹⁹ Aa'nduk ninabuwa mbake nagagindak nogo ndak-ndak, yogondak ambinom ninabuwa mbake logonet, Ninomaluk kumaarogo kiyok libik-lebek eerogo pege, Nit maluk eeko nogogurak nogo abok aret niyo nggwok yenggenak laut nogo oolo kiiniki paga lombok mbo wuppege, Eerumunggun o.

²⁰ O maan iyaalok togon kat nen ninombomini kinom wone abuk nggaruk togon koonogo punuk, kumbuk mbaneegindak nogo ndak-ndak, Kat nen Yakup yoreegindak nogo liirogon eeppege, Abarakam yoreegindak nogo abuwa mba'nuk, ndak-ndak eeppege, Eerumunggun o.