Mika 6 - Ala Wone Peenok Peebi Mbanak

Iterali inawone mbaniyak wone

¹ At Aliku ALA nen ari yi, kinaruk konenggo logonip o. Aliku ALA nen ari logonet, “It an napuri mi'nogo logomenggaarik, puut-puut tiyarogon inenggaanom paga, Kat togop eekendak o, yinuk, an yo'nugwi, Puut-puut teberogon konenggwi iigak, Ndogop eeppinanegendak o, yinuk, yo'nugwi, Eeko logowak o.

² Naliku ALA nen it an napuri eekaarak ambi yorage, It Iterali ambi eekaarak paga inawone mbangge, Eeke me, Kit puut-puut yi wae. Naliku an ALA nen napuri eekaarak yorage yi, konenggwi, Nggween alom wurabit nagagerak itok negen wonage kit yi wae. An yorage yi, kinaruk konenggwi, Eeko logonip o.

³ Napuri o. An nen kit nano eeppinagareegirak o? An ngge eeppinagareegirak paga an ari koneniyak anggon eekkinake? Wone onggo mbet yo'ninip nda!

⁴ An o Metit nen wokkiren wundi wage, Aakumi inayeloman mini eeppinaganuk wonogwe me, wondet eerogo pinagage, Kit wokkiren woraawak nduk, Muta inom, Karun inom, Miriyam inom, kinowagam nappiya wage, Eereegirak o.

⁵ Napuri o. It aap Mowap mendek inowe endagembogut Mbalak nen pulunogo pinagawak nduk koongge mbareegi, Aap Mbeyot aput Mbileyam nen wone nogo abut laganogo onggo at yoreegerak nogo abekwi, Naliku an ALA nen abe koonak mban eeke minggirak kineenu arumunggup nduk, o Titim paga nen nok, o Nggilagan wogwe kiigak, nano agagerak nogo abekwi, Eeko logonip o,” yinuk, yokkirage kagarak me, yagi o.

⁶ Togop me, nit Aliku ALA owagam nogwe, At tiyarogon menggerak Ala abu'me tebe yinuk, alut eerit unggwogwe, Eeko logonet, Nano wonok ungguurak? Tapi aagalogwe ndarak kagak tahun ambi eerak warogo ake kani kuniyak nogo mendek wonok at owagam ungguurak op ilik?

⁷ Ndomba ngguunok ineenggi lingginiyak meek ambik lombok iri wogwe paga, Eyo tayitun amburu yi niyo ndi niyo yenggenak kwak ineenggi lingginiyak abu meek wogori wogwe paga, Aliku ALA inikilom mbarigin mbakop? Ndi, Ala wone taganogo pereegurak onggo ninapuri manggu ndarak nogo at ake piya wogwe, Nit maluk eekoorak paga ndaganako menggam nen ndarak nogo ake piya wogwe, Eeriyak op mbakop? Lek aret o.

⁸ Nit aakumi yi, obeelom eeko logorak ti, Aliku ALA nen muk yo'niragagerak o. Ndi, Aliku ALA nen eeko logorak ninombake nogo ti, ngge o? Lek o. Nit eeko logorak ninombake nogo ti, a'me nggelok eeppiinet nugwi, Aakumi inabuwa mbako logorak ninikilom mbakwi, Niniki tebeppatinuk, ninogoba Ala mugurok nogwe, Eeko logorak ninombake ti aret o.

Iterali maluk eekwi onggo eeppiyoorak wone

⁹ It aap iniki warak lombok wonogwe nen Aliku ALA endage konenggwi iinok, inagabiti mbako menggaarak me, Aliku ALA nen o kota yoge nogo kinaruk konenggo logonip o. Aliku ALA nen kota nogo yoge logonet, “Kat maluk onggo eeppagarak nduk, At mbim mbanak eenggime porogo wonage nogo, Nappi wagarak wage me, kiniki liippege logot o.

¹⁰ O kota maluk eeko menggam kat yi, It aap maluk mendek nen maluk eeppiinet nogo logonet, inamindik-inamendek onggo nggwok kame pateegwaarak wonage nogo, kobak eerogo pege, Ndi, wakkagak togolowak endak lek kagak, Ndak aga o, yinuk, wogorogwe pulunik nogo, an mari eerogo pege, Eeriyak op mbaken?

¹¹ Aap wi-wi aganaka wakkagak yugum mbuulogwe inom wonok wa'nuk, Aaninggin ndak-ndak lek kagak, Ndak-ndak aga o, yinuk, yaga nogo, eekwi iigak, teppiyoorak op mbaken?

¹² It aap ineenggi warak o kota kat paga wonogwe nogo inoone omaawi paga aakumi tebenogo piinok, inageerok waganggwi, Aakumi kat paga menggaarak nen pilit mban agan nugwi, Aakumi inambokan laganggo logonet, inoone pilit mban pugunit nugwi, Eeko menggaarak me,

¹³ An nen kat kooriyak nduk eeke, Kat maluk eeke paga kenggaawak lek eerogo pagakit nduk eeke, Eeke agarik o.

¹⁴ Kambi namenggendak kwe, ndonggoppaga'lek aret wonage, Mbi abu nen kiniki nggaruk-nggaruk mban eekkake, Eerigin o. Kat nen yi mendek ndi mendek kuwak eerogo patemenggendak nogo, an nen it wooluwak nutik wogwe nogo wogoraagin me, Yi mendek ndi mendek kuwak eerogo patemenggendak nogo abeelik-abeelek eerogo pigin o.

¹⁵ Kat nen anggen yumbunogo nappemenggendak kwe, anggen mbanggolage, Eyo tayitun anggen aambiranogo pemenggendak kwe, amburu koba mbenenogo pake, Anggur anggen aambiranemenggendak kwe, amburu toologo nengge, Eeka'lek aret logomunggun o.

¹⁶ Kat nen aap endagembogut Omiri nen wone lengganogo pereegerak nogo mugurok nage, Aap Akap apuri wiganak abok aret nen eerit nogo nogogwaarak nogo, ndak-ndak eerit nage, It eeriyak koonogo pugwi nogo kinom eerit nage, Eeke menggendak me, Keebe pup eerogo pagagwi, Kaagalogwe, Ha! yinuk, inagi'ndok kanggwi, Yi aakumi ndi aakumi abok aret meek eerogo pagagwi, Eeruwak nduk, Eeppiyaagin o,” yinuk, yokkege nogo karuk konengge logot o.