Mika 5 - Ala Wone Peenok Peebi Mbanak

Metiyat nen Iterali inagap ndari woraagin wone

¹ Togop aret kwe, “O Mbe'lekem-Eparata kat yi perak, It Yekura inanebunu mendek inenggela'me kat mbuuluk aret kwe, kat paga nen at ambi o aa'nduk iyaalok togon wonagagerak nogo, It Iterali inarum logowak nduk, mippigin o,” yinuk, yokkege kagarak.

² Togop aret eerigin me, kwe aagaluk nda'narigin yugu nogo aret nda'nage, Ndi, at oreewi Iterali ando mbo piya nogogwaarak wonogwe nogo, iniyokan Iterali inom lambuni wogwe, Eeriyak eyom awo aga'lek kagak it Iterali mbo piyamenggerak logogun o.

³ It Iterali inarum logorak woraagin nogo ti, mi'naremenggerak Aliku ALA omaawi eeppege kagak At ogoba Aliku Ala endage mondok iya abu abe me, ayuk wuke logonet, Ndomba ndegeninako mengga kwak, at apuri ndegeninake logogin o. At endage tiyanak menggerak nogo wiganinuk, o irip-irip time ari nagin me, apuri iniki ugun nu'lek aret logogun o.

⁴ At eebe paga iniki ugun tayenak nu'lek aganaka aret logogin o. It aakumi o Atiyut mendek nen nit ninanggween tebenggola unggwogwe, Ninobak wurik nogo langgunogo punuk, unggwi wogwe, Eeruwok nduk, eekwi iinok, Ndomba ndegeninako mengga kwak ninoweewi ineebe 7 ilik, 8 a, pilak yogo logonet, inoba kwi'naruwak nduk, mippiyaagun o.

Wondet eerogo piige, maluk eerogo piige, eeriyak wone

⁵ Mippiyamonggoorak inawooluwak paga it o Atiyut mendek kaliirubu pup eerogo piigwi, Inawooluwak nutik it o Nimorot mendek kunogo piinet nogwe, Eerugun me, Ninawi tebenggola unggwogwe, Ninanggween kuli pugu kagak, obaga mbo unggwi wogwe, Eekwi iinok, At nogo nen nit Atiyut mendek ineenggime nen ndinninabigin o.

⁶ Aliku ALA nen miinanggen nappi woramenggerak luurogo pege, mayu iri'ngga paga wangge, eeke nogo nen, “Nit wanggwi nogo aakumi nen niyaawak nduk, torinako logowok o,” yogwe, Ndi, “Lek ogwe niyaawak nduk, torinako logowok,” yogwe, Eekulik alik en wangge, lek age, Eeke menggi kwak, At Yakup mendek ando yumbunik nogo ti, yi aakumi ndi aakumi inenggela'me togop aret logogun o.

⁷ Singa ndiimbu-nggwiya eyonggaame mendek inenggela'me wonage menggi kwak, Singa awooluk kambin-ndomba inenggela'me unggwi nanuk, Yimbik togon eerogo nappiige, nibinik-ndelenak eerogo nenet nage, Eeke me, Ambeme nen ndiniyak meek menggi kwak, At Yakup mendek ando yumbunik nogo, togop aret aakumi inanebunu lombok inenggela'me wonogwe, Yi aakumi ndi aakumi ambik inenggela'me arit namenggaarak wonogwe, Eeko logogun o.

⁸ Kit Iterali kinawim kinom nambuko logonet, tebenogo piigwi, Kinom ogoorak nogo lek eerogo piigwi, Eeppunuk, “Nineegin tiyak yigi o,” yinuk, keekok piyanggogo logomunggup o.

⁹ Aliku ALA nen ari logonet, “Ne ti eyom paga an nen ina guda inenggela'me wonogwe nogo lek eerogo piige, Inanggweendo wim eeka nogo pup eerogo piige,

¹⁰ Inawi kota-kota lek eerogo pege, Ineebe op logowam inobak wurik nogo ndengganogo pege,

¹¹ Tili paganggwi paga pugu'ndalek eerogo piigo menggaarak nogo, lek eerogo pege, Inaguguruwo paga iniyok yilunogo piigo menggaarak nogo, lek eerogo pege, Eerigin o.

¹² Inagugi ogut ogobakkigirik nogo lek eerogo pege, Inagugiwak inenggela'me wonage nogo, yigirogo pege, Eerigin me, It ineenggi paga eerak ti, ayuk wuko logonet, alut eeko logogun lek aret o.

¹³ Inenggela'me inagugi arelen yinogo pugu nogo, kinogo mbo pege, Inawi kota-kota wurik nogo yinik-minik eerogo pege, Eerigin o.

¹⁴ Yi aakumi ndi aakumi noone koneniyak ineebi mbakwi nogo onggo nanini eeppiige, Nanini kani negen wunuk ari logonet, eekwi onggo inoba kwippiige, Eeke logogin o,” yinuk, yegerak me, yokkiragi o.