Mika 3 - Ala Wone Peenok Peebi Mbanak

Inarum waka inom, pilit yaga inom, mberiragagerak wone

¹ Ti yorage nagagirik, wone ambinom an yorage logonet, “It Yakup mendek inoweewi kit yi wae. It Iterali mendek inarum monggotak kit yi wae. Kit a'me nggelok eeko logorak kineenu ariyak op kwe,

² Obeelom eeriyak kineebi mbakwi, maluk eeriyak kinikilom mbakwi, eeko logonet, An mendek ineenik ngge-ngge inagabolo mbelanogo piigwi negen eekwi, Inowak kalenak-pugunik eerogo piigwi kwak eekwi, Eeko monggotak o.

³ An nowe-nawot inagabolo mbelanogo piigwi, inowak kalenogo piigwi, Wam kuwalina mbanogo lako mengga kwak, Wam enggaanggum nggarik-nggarek eerogo togolowa'na lako mengga kwak, It ineebe togop aret eerogo piinok, nonggo monggotak o,” yinuk, yoragagirak.

⁴ “Yeenggwa niru o,” yinuk, Aliku ALA yoriyak eyom ari woramenggerak yorumonggotak kwe, at nen kinoone konengge, Maluk eeko monggotak me, ne ti eyom paga kit tamban eekwi nogo, at etenggen kumaappatinuk wonage, Eeke logogin o.

⁵ Aliku ALA nen ari logonet, “It aakumi nen, Ndogop eeke kaamunggup o, yinuk, an napuri iniki nomonogo piya nogwe nogo perak, Inambi wogorogwe iinok, Kiniki tayenak ugun aret logomunggup o, yinuk, yorogwe, Ndi, wogoraga'lek iinok, Kinawim nen kinoori unggwi woraagun o, yinuk, yorogwe, Eeko menggaarak me,

⁶ Inabinggaanggo ambinom koorak iyo, o apit kwak eerogo piige, Tili paganemenggaarak kwe, irip narogo piige, Eeriyak eyom panggoni woraagin o. Ndogop eeke kaamunggup o, yinuk, yaga nogo oonegen kilu yi nage logonet, o yumaak age menggi kwak, eerogo piinet unggwage, O liingge kwe, yipit-apit eerogo piige menggi kwak eerogo piige, Eerigin me,

⁷ It inabinggaanggo paga yoraga nogo inenggali age, Tili pagangga nogo inagabiti age, Eeko logonet, Ala yoremenggaarak nogo onggo yoraga'lek kenok, inuut kuru agan wangge logogin o,” yinuk, yegerak me, yokkiragi o.

⁸ Togop kwe, an perak, it Yakup mendek Ala wone taganogo pit nugwi, It Iterali mendek maluk eerit nugwi, eekwi nogo Inaruk wake logokit nduk, Aliku ALA Aberiniki paga nomaawi lombok eerogo panege, A'me nggelok eeppiinet nage logonet, nagabiti lek yoranet nage logokit nduk, eeppanege, Eeke agaarik o.

⁹ It aap Yakup paga wiganak inoweewi kit yi wae. It Iterali paga wiganak inarum monggotak yi wae. Wone yi, kinaruk konenggo logonip o. Aakumi a'me nggelok eeppiinet noorak wone kineebi mbakwi, Obeelom eerit noorak wone nogo yaga-taga eerogo pit nogwe,

¹⁰ Aakumi maluk eeka'lek ugun iigak kwe, inoorogo piinet nogo logonet, o Tiyon wukwi, Aakumi inawu yowaarogo o kota Yerutalem wukwi,

¹¹ Wu kolaawok nduk, maluk eekaarak nogo yiluk-yiluk inowak loonggwi, Onggo wokkiraawak nduk, Ala unde nen wone mamunirogwe, Wu waawok nduk, Nabinggaanggo paga, Ndogop eekkinake kagaarak o, yinuk, yorogwe, Eeko monggotak kwe, Aliku ALA endage kumbunuk kinoone yogo logonet, “Aliku ALA ninenggela'me wonage nogo lek a? Wonage aret me, Maluk eeppinanigin mondok lek aret o,” yinuk, yogo monggotak o.

¹² Togop aret yogo monggotak me, o Tiyon ti, yabu kabunogo nippit nogo mengga kwak age, O kota Yerutalem ti, nggween yigirik-noonom eerak logonak negen age, Ndi, puut Ala awi wurik menggim ti, alok-palok mban kunogo pege, Eerigin o.